Capítulu XVIII
ATENCIÓN: Les autoridaes
sanitaries encamiente que si vusté nun pue tomar zucre nin-y va bien lo
duzayono, nun llea esti capítulu. Tamién pue saltáselu si quier siguir
calteniendo la imaxe del héroe d’esta historia como daquién duru, inamovible,
un paisanu fechu y derechu. Esti capítulu pue mancar la sensibilidá del públicu
llector y causar estragos nos matrimonios a cuenta de nun sentise nuna plenitú
amatoria como la de los protagonistes.
(Planu cenital. Vese un
colchón y enriba, tapaos con una mata y una colcha fecha de ganchiyu, MARIVINES
y SIMÓN. Tola escena trescurrirá asina, los dos mirando como pal
techu y falando)
SIMÓN: Marivines, voi
alcordame pa siempre, porque yes la primera muyer…
MARIVINES: Á don Simón,
nun esaxere, que nun ta bien visto…
SIMÓN: Ye la primera muyer
en munchu tiempu… Fai tanto, que… Como si fuere la primer vez… De verdá. Toi
namoráu como un rapacín…
MARIVINES: A ver si-y va
dar un complexu d’Edipu…
SIMÓN: Non, non, hipu nun
tengo nengún… Ye una afección respiratoria que me sal, como un xiblíu… De
verdá, Marivines, cuando te veo, ye como si se m’abriere’l cielu, un
rescamplíu, un clarión en metada de la tormenta…
MARIVINES: (Rise,
nerviosa) Ai, Simón, qué coses me diz, qué coses tien…
ASUNTA: (dende otru
cuartu con voz n’off, esto ye, que nun se-y ve) Á Vineeeess, fía… ¿Tas
bien?
MARIVINES: (lleva’l deu
a la boca pa mandar callar a SIMÓN) ¡¡Sí, mama!! ¿Por qué pregunta?
¿Quier dalgo? Mire que ye pronto pa la melicación y pa la merienda…
ASUNTA: Non, fía, non… Que
como te sentí solmenar tan fuerte al colchón y parar depués rosollando, y agora
nun te siento, pensé que te diere dalgo… Fía…
MARIVINES: Non, mama, toi
equí chucadina un poco. Priendi la tele, muyer, que van echar la novela… (Guarda
un poco silenciu. Siéntese la tele. De sópitu, la lluz del cuartu baxa. Fuera
ta de nube.)
SIMÓN: Marivines, yo pa
ti, ¿qué soi?
MARIVINES: El vecín d’abaxo…
SIMÓN: Non, quiero dicir…
Esto… Lo nuestro… Si ye que podemos llamar nuestro… Necesito sabelo…
MARIVINES: Dalgo apaecío a
lo suyo… Agora mesmo… ¿Quier saber agora mesmo lo que siento?
SIMÓN: Sí, por favor…
MARIVINES: Pues como que s’abren
los cielos tamién…
SIMÓN: Somos de
sentimientos coordinaos. ¿velo?
MARIVINES: Como que s’abre’l
cielu y apaez el deu acusador del Señor, non el del Nuevu Testamentu, qu’esi
perdónalo too, non, el Dios vengatible y atronicador del antiguu testamentu… Y
me señala y me llama adúltera… (Nesi intre un truenu relampia y l’estrueldu
ximielga la casa)
SIMÓN: ¡¡Hostia!!
MARIVINES: ¡¡Calla, fatu!!
(señalando pal cuartu la ma)
SIMÓN: Coño, la primer
confesión con efectos especiales…
ASUNTA: ¡¡Á Vines!!
¿Sentístelo?
MARIVINES: Sí, mama, fue
un rayu…
ASUNTA: Non, fía, un home…
¿Nun sentisti un home en casa?
MARIVINES: Sedría’l vecín
d’abaxo, mama, que taba asomáu a la ventana…
ASUNTA: ¿Y diba sentise
equí? ¿Tan cerca?
MARIVINES: ¡Coño, mama!
Más lloñe ta’l truenu y metióse en cuartu…
ASUNTA: Tienes razón fía,
voi apagar la tele nun vaya ser que s’estropie… Vaya vecín más cagamenteru que
tenemos… Primero discutía cola muyer, que yera tan curiosa y tan bona rapaz;
depués col fíu, probe neñu, con tantos disgustos… Y agora cola truena… Menos
mal que ye atéu y nun nos va tocar de penitencia compartir el cielu con él… Tol
día coles películes eses de tiros… Debe llevar viendo cómo se mata media
humanidá. (SIMÓN da-y un coldazu suave a MARIVINES y
señala col cazu pal cuartu y MARIVINES, muerta de vergoña y
riéndose, ximelga los costazos. Fuera entama a sentisa l’agua caer de torba)
SIMÓN: ¡Coño, vaya conceptu
que tien de min!
MARIVINES: ¿Qué quies que
faga? Y eso qu’entá nun sabe que’l vecín -y ta deshonrando a la fía…
SIMÓN: Pero, ¿eso soi yo
pa ti? ¿La to deshonra?
MARIVINES: Ye vusté un
remordimientu, Simón… Nun sé… Marchará agora pela puerta y xuraréme non volver
a velu. Nun quedré saber más nada de vusté. Golpearéme en pechu y diré, pola mio
culpa, pola mio culpa…
SIMÓN: ¿Tan malu soi?
MARIVINES: Mañana, miraré
pel tendal la ropa sucio, los calzonciellos daos de sí y enllenos de palombinos
pa odialu; acusbiaré les sos camises acartonaes pel sobacu de la pastia d’henu
de Pravia, pa tarrecelu; fregaré’l portal y goleré esi arume ranciu de tabacu y
paisanu que sal del pisu pa desprecialu… Y echaréme na cama pidiendo al señor
que me quite de la tentación tarrecible de tar con vusté…
SIMÓN: Casi prefiero cómo
m’emponderaba to madre…
MARIVINES: Pero’l señor
nun m’escucha y téntame y soi de carne feble… Simón… Atorméntame. Ye la so esistencia
pa min como uno d’esos cantares de Vicente Díaz, o de Geogie Dan, que s’escuchaben
nel puestu cintes del mercáu y que nun yera a quitar de la mollera en tol día…
SIMÓN: Home, yo prefiero ser
Vicente Díaz… O’l Tordín de Frieres…
MARIVINES: Simón, pa vusté
ye fácil porque ye un atéu, un paganu, milita nel sindicatu y ye del Sporting.
Ta acostumbráu a sufrir… Pero ¿y pa min? Yo vivo ensin vivir en min… Esvélome
pensando en qué parará too esto en pasando la cuarentena… Llevo una llista de
tolos pecaos que cometemos pa contá-ylos al cura…
SIMÓN: ¿Entós? ¿Qué pinta
esi? A ver si…
MARIVINES: Vusté fixo de
min una pecadora. Y lo peor de too, ye que nun m’arrepiento, Simón… En pasando
la cuarentena diré a confesar y nun me quedará vida pa penitenciar los pecaos:
amontonada con un home casáu, refocilando en cuartu, al llau d’una ma
morrebunda…
ASUNTA: ¡¡Nena!! ¡¡Hai que
vaciar la chata, que col ruíu del agua yá la enllené!!
MARIVINES: Val, mama,
agora mesmo voi…
ASUNTA: Nun entardes, fía,
que llueu evapórase y güel esto a mexos que tresciende…
SIMÓN: (Xuxuriando)
Marivines, pa min ye vusté la única muyer nel mundu. Si hai falta separáse pol
tribunal esi de la ilesia, como si tengo que pidir un préstamu pa contratar al
meyor abogáu casín… Si hai qu’escribi-y al papa, que nun sé cuál ye’l que gobierna
agora, pero entérome, pues escríbo-y… Una hermana de mio güela pidió-y permisu
pa casar con un primu. Si hasta la reina ta deseparada.
MARIVINES: ¿Y si morriere
en pecáu, Simón?
SIMÓN: Acompáñote yo per
tola eternidá, Marivines. De verdá… Mira. Yo tengo una preba pa saber si una
muyer me presta o non, pero prestar pa vivir, non solo pa esto, pa salir los
domingos garraos del brazu, a tomar el vermu; pa sentase onde la terraza del
Alba o en Les Carboneres y tar viendo pasar el mundu y falando, pa contar los
díes que queden pal baile sociedá…
MARIVINES: (Intrigada)
¿Y qué prueba ye esa?
SIMÓN: Maxínome xuntos un
branu diendo a toles escursiones de la HUNOSA, de les que se facíen enantes…
MARIVINES: (Ablucada)
¿Cómo ye, ho?
SIMÓN: Sí… Mira, Marivines…
Maxínome la nueche enantes preparando los filetes de carne empanao; la tartera;
les silles plegables y madrugando pa dir col serón y la nevera portil, que pesa
casi tanto como una de verdá a la parada. Entardar tres hores ente que pañamos
a la xente y llegamos: Rodiles, Perlora, El Sablón, Poo, La Griega…
MARIVINES: (Divertida)
Ye vusté mui raru…
SIMÓN: De mozu díbemos
colos amigos. Veía a aquelles pareyes que discutíen, chanciaben, tomaben el sol…
La muyer, que si t’echo crema, nun vayas quemar; l’home, que si voi al chigre,
¿quies dalgo?, traime una tarrina o un xeláu de corte, que yera lo que tomaben
les muyeres, porque dába-yos rabia comer un conu o un cornetu, yá sabes…
MARIVINES: Non… ¿Por?
SIMÓN: Porque -yos paecía
que yera otra cosa, una gochada… (Cambia’l tonu) A la hora de la siesta,
veníen y dicíente: oye un momentín, mozos, ¿echaisnos un vistazu a les coses,
que vamos dar una vuelta? Y víeslos caminar a saliase… Y yo creía qu’eso yera’l
termómetru de la felicidá…
MARIVINES: Simón, ye vusté
un románticu. Pero eso yá nun se lleva…
SIMÓN: Sí, Marivines, sí
se lleva. Llévolo yo equí, en papu… Camudaríen les playes, qu’agora tán feches
un cristu col galipote y tola broza que se-yos echa… Igual yá nun hai autobuses
los domingos subvencionaos pola HUNOSA… Pero da lo mesmo: en Benidorm, en Roquetas,
En Sanxenxo, en Los Narejos o en Los Alcázares, hasta nel Caribe soi a
imaxiname contigo de la mano, pendientes l’ún del otru hasta pa tarrecenos…
MARIVINES: Nun sé si lo
que me diz ye guapo, pero atalanto que quier que suene guapo… Y eso bástame…
SIMÓN: Mira, Marivines… Yo
pensé que diba morrer d’esta, ¿sabes? Soi silicosu por proximidá, trabayé na
mina y tengo yá un tiempu como pa saber que toi mui cerca de debela. Pero
agora, dende la cena de l’otru día, nun me da más…
MARIVINES: ¿Tan fuerte fue’l
golpe na cabeza pa facelu camudar d’opinión?
SIMÓN: Marivines, nun
embromies. Yo soi un paisanu y nun se me da bien esto de dase, d’abrime. Nun me
fagas paecer más ridículu de lo que yá soi… Yo, en pasando la cuarentena, si
nun vamos tar xuntos, si nun vamos siguir asina, goliendo la naftalina de la to
ropa, olivando por ti, prefiero que me lleve l’andaciu…
MARIVINES: (Tentando
disimular la emoción) ¡¡Ai, Simón!! Qué coses más guapes me diz… ¿Nun
sedrán raposeríes d’amante?
ASUNTA: ¡¡Á Vinessss!! ¿Dormístite?
¡¡Qu’esto güel a amoníacu puro, fía!!
MARIVINES: ¡¡Toi pigaciando
un poco, mama!! ¡¡Yá voi!!
ASUNTA: ¡¡Á fía!!
¿Asonambularíes? Nun faes más que reburdiar en suaños… Eso ye mala conciencia…
SIMÓN: Non, Marivines… Mira…
Sálenme d’equí, del corazón… Y eso que tartamiella un poco porque tien un
soplu. De cuando pequeñu. Por eso nun pudi ser picador d’arranque… Llampisteru,
sí, pero llevo la mina col tientu del artilleru, del barrenista, cola
disposición del camineru, cola inocencia del guah.e, cola maña del postiador y
l’arranque del picador… Un soplu arrincóme de trabayar nel interior, pero llevo
la mina en corazón… Y llévote a ti… Nun sé… Nun m’imaxino la vida ensin ti en
pasando la cuarentena…
MARIVINES: Sigui, sigui,
Simón… Nun apares de xuxuriame eses coses tan guapes…
SIMÓN: Mira Marivines, por
ti… Por ti soi quien hasta dir de la mano a la Feria Muestres el día de la Caxa
y aguantar les tres hores de cola pa que nos dean una d’aquelles gorres que
namás valíen pa dir a la yerba y dir a comer el pinchu calamares al pueblu d’Asturies…
ASUNTA: ¡¡La chataaaaa!!
No hay comentarios:
Publicar un comentario