lunes, 28 de octubre de 2013

Nel dialeutu del grisú...

Rodia una tristura la to mirada
que fala nel dialeutu del grisú.
Petezme ser un Dios
y facer migayinos
d'esa seronda que tanto camientes
d'esti silenciu nel que nun m'atopo.
Pero nun soi un Dios.
Y un brillu probe de carbón
tarrezme la vida.
Y ye'l mio coral
lo que s'esmigaya.

Cuando entamé a escribir n'asturianu apasionábame dar cuenta del mundo de la mina. Una de les primeres composiciones qu'escribí foi esti poema nel que facía ver que les emociones nes cuenques mineres falen un dialeutu propiu. Emparentábalo nesa ambigüedá  del amor y de la muerte, de les ganes de vivir y de la presencia tan cercana de la muerte.
Güei, por desgracia, toca recordalo.
Y garro eses pallabres del pasáu, porque güei nun atopo otres.
¿Por qué siempre s'escriben negro sobre negro y siempre en clave de traxedia les páxines de la historia de la mina?
 
 
 
 
 
 
 

viernes, 25 de octubre de 2013

Solu énte l'escrache


Momentu de la presentación (Semeya sacada de Biblioasturias)
Va unos meses presentaba’l mio últimu poemariu Mil desiertos llugares na Biblioteca d’Asturies. Nun esperaba muncha xente, la verdá. A estos actos, polo xeneral, suel dir la xente que lleves y lo qu’engañes. Aquel día’l salón taba a reventar. Conté sesenta persones, tirando a lo baxo. Como esi día presentábase’l llibru Percebes (premiu de teatru) y muncho de lo fuere yera xente de teatru, pensé que diben ver al otru autor. Miré pa él y sonrí, asustáu pola so capacidá de convocatoria. Él devolvióme la sorrisa.
            L’actu trescurrió normalino. Hasta la xente paecía atento y hasta dalgún había qu’asentía (quiciabes cabeciaba) cuando lleí los poemes.
Acabó l’actu. Firmemos llibros y marchemos. Nunca tuviere nuna presentación con tantu éxitu, la verdá. A los pocos díes nel institutu, comenté-y a una compañera que viere al so hermanu na presentación.
            —¡Ah, coime! Sí, lo del escrache.
Otru momentu de la presentación (Semeya sacada de Biblioasturias)
            Punxi cara de nun entender un migayu. Desplicóme que la xente del teatru taba ellí pa face-y un escrache a la política de turnu que, pispándose del marrón, delegó n’otra subalterna, dexándonos solos ya inorantes ente l’escrache.
            Entós entendí la sorrisa pintada na cara del David Barreiro, l’autor de Percebes. De xuru que me sonría asombráu del mio poder de convocatoria.
            Quiero creer que foi la so muncha educación y la cara de felicidá que trayíemos dambos al presentar el llibru lo que desinfló les ganes d’armentíu de los compañeros teatreros, qu’acabaron aguantando’l chaparrón de poemes y cediéndonos el protagonismu.
Nun quiero maxinar qué cara se me quedare si viere qu’a min, poeta miagón del orbayu, a esti cenicellu y tristayón perru caleyeru, me facíen un escrache, asina, a les braves, ensin comelo nin bebelo.
D’entós p’acá, cuando voi a una presentación crucio los deos y cuento la xente… Si hai más de diez persones que nun conozo, desconfío y póngome no peor; toi más pendiente de los sos eslóganes afogaos que de los mios versos que recitó, empapiellándome, amedranáu.
 
Pa ver el reportaxe del actu de presentación clica equí.

domingo, 20 de octubre de 2013

Actos de fe

     Una vegada escacharróseme l’ordenador. Por suerte pa min (y supongo que pa desgracia pa él) tengo un amigu de la infancia, Manzano, que ye un fenómenu no de la informática. Yo quedé poco más allá del Spectrum 128, pero él siguió porque ye curiosu pa esto, y mui finu. Aparte, servicial: vieno a casa, estripó l’ordenador y maricó dientro. Sacó una plaquina y dixo: “va ser esto”. Después sopló l’enganche, sopló la plaquita, frotóla contra la pernera’l pantalón y ¡voilá!, l’ordenador volvió a funcionar.
¡¡Que funcione, que funcione!!
    Pregunté qué pasaba y díxome que nun sabía, que n’ocasiones estos cacharros son asina de caprichosos y qu’a él, que tien polo menos una carrera d’informáticu y ta estudiáu a maza, tovía-y paez un milagru tolo qu’apaez cuando calcamos un botón.
     “Cuestión de fe”, sentenció.
      Nun me voi poner relixosu nin evanxelizador, pero quien diga que nun tien fe, miente. Los actos de fe mostrámoslos nes coses más cotidianes, y son cuestiones a les que nos agarramos y que, nin siquier pa nosotros tienen desplicación: si una máquina anecia y nun fae otro que devolvenos les monedes, rascámosles contra les chapes; si’l dichosu mandu a distancia nun manda y nun cambia de canal, pegámos-y na tapa de les piles un par de golpes; si’l boli nun escribe, echámos-y l’aliendu calentino; si dos enganches nun conecten o los conectores nun enganchen soplamos un par de vegaes; frotamos y pegamos, son dos movimientos básicos, como l’aliendu primordial qu’echó Dios al barru y el golpe col que damos un toque divín. ¡Y la de veces que-y tenemos pegao, primero suave, dempués unes bones palmiaes hasta acabar en puñetazos, a les máquines que traguen les perres (que son munches más que les tragaperres) o qu’entarden un migayu en funcionar!
     Quiciabes los científicos tengan una desplicación racional pa los actos de fe (que, por exemplu, l’aliendu calentino fae que se desfaga la costra de tinta), pero pa min esi proceder ye un estadiu, quiciabes el primixeniu o primordial, onde quedó arrequexada la mesma fe cola qu’antaño s’enfotaben nos santos pal lluchar contra’l xarabatiar qu’estropiaba la collecha, o p’acabar cola seca.
      Y lo peor de too –y por eso seguimos cometiendo estos actos de fe-, ye que funcionen.

miércoles, 16 de octubre de 2013

Grandonismu estatutariu

Dizme una amiga de p’allá del Payares: “Lo que más me gusta de ustedes, los asturianos, es que siempre están empleando el diminutivo: ¿tienes una cucharina? ¿dasme un pocoñín? Nun eches cuenta qu’entardo un minutín namás”
     “Nun te fíes:” respuendo, “l’asturianu de puertes pa dientro ye asina d’humilde, pero en sociedá vuélvese bien grandón. Nun hai nada que nos preste más qu’esaxerar les coses, y sinón mira les estatues capitalines”.
L'asturianu tien aires de grandonismu.
     Esti perru caleyeru ta avezáu a andar de romería peles capitalidaes asturianes y velo a les clares. Paez haber una guerra abierta ente Uviéu y Xixón a cuenta de les estatues. En Xixón toles estatues tienen nomes populares grandonos: La muyerona, les chapones y hasta la de Chillida, que como nun s’atopaba nome amañosu punxéron-y “el cagaderu de King-kong” (qu’hasta paez que lo de kong ye tomao pa da-y más aquello de grandono); ¿y el campu fútbol del Sporting? El Molinón. ¿Y el puertu? El del Musel que col hormigón que-y tán echando va acabar siendo “El Muselón”. De xuru que Xixón de mano nun se llamaba Xixón, sinón Xixu, y que foi esta manía d’engrandar les coses lo que dio col nome actual, qu’al pasu que va nun vamos entardar en conocer a la ilustre villa de Xovellanos como Xixonón.
     Nesti sen, Uviéu nun se queda atrás, pero les estratexes de la capital son más variaes: son quien a llantate un culu monumental en metada d’una cai y llamalu "culis monumentalibus", que los d'Uviéu siempre foron asina de finos, con zarzuela y too; también son quien abandonar un sombreru que debe ser pa que lu cale King Kong enfrente’l Campus El Milán o una gordona bien gorda na Plaza de la Escandalera. Y mira, de mano, cuando empezaron colo de poner fontes y caños a les rotondes, la xente conocíales como les gabinones. N’Uviéu rúxese que la catedral entamó queriendo costruyir una ermita y ¡míralos!, tuvieron que-yos echar l’altu porque si se descuiden pónen-y hasta la segunda torre. Pámique hasta quitaron El Carbayón porque-yos abultaba cada vegada más que se daba un aire a ún d’esos bonsáis; y envede tener Torres Ximielgues naguaben por tener Torres Trillices. ¡Ah! Y namás tienes qu’echar un güeyu a la ñoclona esa que fizo’l Calatrava pa que veas como foi’l desquite o cómo arrepararon la xirafona.
      Por eso un te fíes: cuando un asturianu diz qu’entarda un minutín va ser en verdá un minutu bien llargu (anque toos tengan sesenta segundos), cuando te diz que entá-y queda un pocoñín de trabayu ye pa echase a temblar; ¡¡y guárdate de los platinos de fabes!!