Vusté quiciabes nun lo sepa, pero ta inmersu nuna guerra
silenciosa. Vusté nun sabe que'l so mundu ta camudando por mor de les redes
sociales. Sí. Vusté abrió una cuenta nesi bancu capitalista de l'amistá; añedió
amigos, conocíos, xente de lo que nun sabe nada y xente de lo que creía sabelo
too. Sicasí, bien enquivocáu taba. Hai amigos que nun-y dan tanto al “me gusta”
como a vusté -y prestaría; hai semeyes d'eventos a los que nun fue invitáu;
“esos cabrones”, diz pa vusté rucando los dientes, “mira que nun avisar que
diben a la feria ensin muyeres”.
Si escacipla ente los perfiles, decátase de qu'él tien el
doble d'amigos que vusté, y que munchos son moces curioses que-y ríen les
gracies. “Cómo nun diba separase”. Apaña una cita filosófica: “Nun importa la
cantidá de los amigos, sinón la calidá”, al llau de Paulo Coelho, que vusté fae
un xugador del Depor, cuando-yos daba por traer tantos brasileños. Y sigue
escaciplando.
“Amás, míralu, tien d'amigu a esti, que fue un atecháu tola
vida y agora va de guerreru.”
Y al día siguiente, cuando él lu saluda, vusté amaga una
sorrisa falsa, un biecu repunante.
El so amigu preguntaráse qué-y pasa. Nel chigre, frente a la
pinta, restola pel móvil, que ye más discreto y menos violento que pregunta-y de
frente, como cuando taben nel pozu y los abrazos combayones yeren el meyor like
y les risotaes, el meyor emoticón. Y verá que vusté ta cabreáu con dalguién,
pero nun acierta a saber con quién. Mira peles sos amistaes, ¿qué fae esti col
vecín que nun trago? Mecá, si tien a la mio exmuyer d'amiga; y dacuando,
charren; y ella pon el corazonzucu esi de “préstame pola vida”.
De poco en poco, nel chigre los focicos y los silencios
fáense llargos y atemplaos. Yá nun hai contemplaciones nin me gusta. Nun sabéis
quién fue'l primeru n'añedir al otru, a lo zorro, a la llista de conocíos. Y
esa tarde, en llegando a casa, de xuru que lu va borrar de la llista d'amigos,
enantes del pasu definitivu: bloquealu.