Capítulu XVII Horror nel supermercáu

Capítulu XVII

Horror nel supermercáu

(SIMÓN xube les escaleres con dos bolses de la compra. Andares derrengaos. Llega a la puerte del terceru y pica. Dindón.)

SIMÓN: Á Marivines, abri la puerte que soi yo… Simón el del segundu… (Posa les bolses en suelu y quita la mázcara rosollando)

MARIVINES: (Sal MARIVINES a abri-y.) Asina d’amarutáu nun te conocía… Nun esperaba yá por vosotros. ¡Yá pensé que marcharais pal estranxeru coles perres!

ASUNTA: (Con voz doliosa de vieya encamada) ¡Á Viiiiines! Mira ver, paezme que tán picando…

MARIVINES: Yá toi nello, mama…

ASUNTA: ¿Quiéeeen ye, fía?

MARIVINES: El repartidor, mama, (chisgándo-y un güeyu a SIMÓN, picardiosa) un rapaz mui saláu que nos vien a traer los recaos…

SIMÓN: Costónos un trunfu, y que nun nos vuelva a falar mediu Serrallo y los pocos qu’entá nos falaben de Sotrondio.

MARIVINES: ¿Entós?

SIMÓN: (Garra aire y ponse a entrar coles bolses que paña del suelu) Voi p’allá, hasta la cocina, ¿non? Agora te cuento… Lo primero, al llegar, pensaben que yéremos del exércitu… Como mandaron a los de la UME pa Blimea Ecuatorial, pensaben que nós yéremos una avanzadina. Y punxéronse a aplaudir… Entós Taulfo, que tien asociao lo de los aplausos col Dúo Dinámico, entamó a cantar lo de resistiré al alto la lleva…

MARIVINES: ¡Ai, madre! ¿Quién lo diría? Taulfo que paez tan seriu…

SIMÓN: Ye too la mázcara… Pa min que-y faltó l’aire… El casu ye qu’aparquemos la carretilla onde los carros de la compra y ehí vieno’l primer problema, porque como yera un carretillón d’obra, ocupábalo too y, ente eso y les maletes, que llevemos, les paisanes facíen degomán de protestar, pero nun s’atrevíen porque contaben que yéremos del exércitu y que veníemos a desinfestar too… (Mete les bolses na despensa) Nun se puen tocar hasta mañana, namás lo que sea pa la nevera pues metelo, primero de da-y con un trapu con llexía… Por si tien el bichu esi ehí… Pa que muerra de soledá, se conoz…

MARIVINES: ¿Cómo ye, ho?

SIMÓN: Taben diciéndolo dos muyeres a la cola, delantre de nosotros… Y a eses había que face-yos más casu qu’a les que veníen detrás.

MARIVINES: ¿Por?

SIMÓN: Porque les que taben detrás, a la cola, cuando nos punximos a pagar esti carretilláu de coses, y afixonalo nes maletes y en carretillu, dicíennos de too menos guapos. Les que veníen detrás entamáronla con nosotros y con Mari Pili, la caxera… La probe poníase toa nerviosa… Y elles: Llevo hores esperando, Mari Pili tas entardando, esta rapaza nun coordina, Maripili, venga, monina…

MARIVINES: La xente nun tien paciencia… Que madruguen, coime, si tanta priesa tienen. Total, pa quedar en casa…

SIMÓN: Amás, munches veníen detrás de nosotros tol tiempu porque claro, na charcutería como facíemos pidíos espaciaos: que si siete raxes de chope, que si agora ciento venticinco gramos separao… La xente pensaba que tábemos de goña. Llamaron a los municipales y too…

MARIVINES: ¿A los municipales?

SIMÓN: Bono, al ayuntamientu. Quexáronse al alcalde de que tando equí los de la UME nun previeren qu’esta xente come y que diben dexar ensin comida a tou Sotrondio, que cómo nun los echaben pa L’Entregu, que siempre teníen que cargar con ello los de la capital…

ASUNTA: ¡Á Viiiines! ¿Dexasti la tele encendida? ¿Colo que tira? Paezme que siento falar…

MARIVINES: Nun ye la tele, mama, ye la radio y tranquila, que va a piles… Toi escuchando a los del gobiernu…

ASUNTA: ¿A los de Madrí?

MARIVINES: Non, a los de la comunidá (chisgándo-y un güeyu) que tán falando mui bien…

ASUNTA: ¿Al rapacín de Llaviana? Esi dicía Chento la de Sanamiés que taba mui estudiáu… Ai fía, a min abúltame tan mozu pa tanta responsabilidá. ¿Nun te paez?

MARIVINES: (Acariciándo-y la cara a SIMÓN y secándo-y el sudu) ¡Ai mama, pero ye tan saláu!

ASUNTA: ¡¡Á Vines!! Fía, tu últimamente debes tar de la tensión, qu’a toos los atopes salaos… ¡Madiós!

MARIVINES: Calla, mama, que nun lu siento bien…

SIMÓN: Y entós l’alcalde mandó a los municipales a ver qué pasaba… Debe andar mosquiáu dende lo de los Tedax. Pa cuando llegaron, Taulfo taba a la tema coles paisanes de la cola na charcutería, mentres yo siguía colos pidíos… Diba yá pidiendo salchichonería…

MARIVINES: ¿Por?

SIMÓN: Taulfo echó-yos en cara que vinieren de Sotrondio al Alimerka de Serrallo a dexar a la barriada obrera ensin provisiones. Taba sacando yá la xurisprudencia de la llende’l ríu como divisoria clara al aportar los municipales. Les paisanes queríen denunciar a Taulfo porque les llamara espansionistes y camudalletreros y eso pa elles yera un insultu.

MARIVINES: ¿Y qué ficieron? ¿Metiéronlu presu?

SIMÓN: Non. Los municipales son como los cascos azules de la ONU. Ellos lleguen a les zones de conflictu, observen, pero nun son d’intervenir en cuestiones territoriales. Vieron que tábemos comprando y quixeron mediar un poco, pero atayólos Taulfo…

MARIVINES: ¿Qué-yos dixo? Tien salida pa too esi home…

SIMÓN: Que cuando los llamaba él nun aportaben tan rápido y que si taben vixentes les cartiyes de racionamientu, que taben nuna sociedá llibre de mercáu llibre y que falando de mercáu, ¿por qué Sotrondio tenía mercáu y Serrallo non? Maniobra de distracción tamién…

MARIVINES: Madre… ¿y funcionó?

SIMÓN: Sí, ho, Taulfo ye mui finu pa esto. Nes barricaes siempre lu mandábemos a él a negociar colos antidisturbios… Cuando se punxeron gafos yá mercáramos hasta’l roti de pavu light pa Miss Daisy, que dígotelo, si s’enteren les paisanes que mercamos roti de pavu pa un perru nestos tiempos, sáquennos les coraes ellí mesmo… Y depués, pasemos a mercar lates al pasiellu de les conserves. Detrás de nosotros sentíemos dicir: Mari Pili, rica, guapa, de bonitu nin una lata… Barrío lo dexemos. Compra de primer día de llibramientu…

MARIVINES: Pero, ¿fue pa tanto lo que vos pidieron?

SIMÓN: Taulfo, que diz qu’hai atrincherar comida y ta colocándolo na carbonera como fondu de resistencia pa nun tener que salir… Tuvimos que decidir: ente papel hixénico y lates de bonitu, pimientos y calamares…

MARIVINES: Claro… El papel hixénicu ocupa muncho…

SIMÓN: Taulfo, que tien un maxín que pa inxenieru valía, dígotelo yo, escurrió lo siguiente: el papel hixénico ye lo último del procesu: si la xente nun come, nun caga; si llevamos la comida, la xente que vien detrás nun caga; si nun caga, nun compra papel hixénicu y podemos venir por ello a otru viaxe…

MARIVINES: Home, asina pensao…

SIMÓN: Y amás, como diz Taulfo: podemos atopar un sucedaneu…

MARIVINES: ¿Cómo’l Príncipe?

ASUNTA: ¿Sal el príncipe pela radio? ¡Ai, esi sí que ye saláu…! ¡¡Y preparáu, como’l de Llaviana!!

MARIVINES: Calla, mama…

SIMÓN: Non, eso ye un sucederu… Un sucedaneu, desplicómelo Taulfo, ye lo que pones en cuenta d’otra cosa: ¿Qué se t’acabó la cinta islante? Pones esparatrapu…

MARIVINES: ¡Ai, home, yá caigo! Bono, entós el príncipe ye un sucedaneu… Que te cayó’l rei: pones el sucederu…

SIMÓN: Bueno, pues eso. Y diz Taulfo: ¿Qué se t’acabó’l papel hixénicu? ¡¡La Nueva España!! Diz Taulfo que La Nueva namás val pa los pasatiempos d’Ocón d’Oro, pa les esqueles y pa llimpiar el culu, y esto último si nun suelta tinta… Que sabe él d’un casu que… Mira… Como pasemos tantes vegaes la tarxeta pa pagar los tiques… (Saca un mazu de tiques del bolsu) Si quies déxote dalgún… Esvarien, pero pa un apurón…

MARIVINES: Dexa dalgún… Pa mirar peles ofertes… ¿Sabes? (Mira ún y llee) Xel del amor afrutao… Pa enduzayar estos momentos de confinamientu… 50%

SIMÓN: Creo que garremos un par, pa ver cómo sabíen… Como taben d’oferta…

MARIVINES: (Cambiando de tema) Bueno anda... De lo malo, nun vos aburristeis…

SIMÓN: Calla, ne, calla… El peor paráu fui yo… A la hora pagar… Resulta qu’al poner el monu esti nun me di cuenta de que tenía la cartera nel bolsu d’atrás del pantalón y… (Enséña-y una raxa que tien penriba del cadril, onde asomen unes gotes de sangre) Taulfo tuvo qu’abrímelo con una tisoria que-y emprestó Mari Pili, la caxera y… Ente los guantes, nun te muevas, tate quietu… ¡¡Plam!! Metióme una puñalada raspiada…

MARIVINES: A ver, a ver… (Mete la mano y saca los deos empapaos de sangre. Estázalo ente los deos y llévalo a les ñarices. Surnia fuerte’l golor y el xeitu camuda, cayoncu)

SIMÓN: Resquema la de Dios… ¿Tu sabes? De la que venía p’acá mareábame y too a cuenta perder el sentíu…

MARIVINES: Buff… La que ta perdiendo’l sentíu dafechu soi yo, don Simón, soi yo (Mordigáñase los llabios y españa, azotándose-y al pescuezu y metiendo la mano ente la raxa del monu pa tentar del sangre) Vamos, vamos… (Arrástralu pa un cuartu)

SIMÓN: Marivines, por favor, ¿qué dirá so madre?

MARIVINES: (Xuxuria) Mio madre ta encamada y ye raro que salga. Tien la chata pa un apurón… Asina que nun pierdas tiempu y mira ver cómo t’arregles pa estazate con esi traxe, soldáu del amor. (Gritando en dirección al cuartu de la madre) Á mama, voi aprovechar pa variar el colchón de la cama, por si sientes ruíu que nun t’asustes…

ASUNTA: ¿¿¿Agora, nenaaaa???

MARIVINES: (sacándose’l xersé) Mama, el colchón hai que varialu cuando te lo pide…

(Fundío a negro. Unes lletres remanecen diciendo: media hora enantes… Va apaeciendo la contorna de la carbonera y TAULFO guarda les llates na de so. Tán acabando)

SIMÓN: ¿Qué fago cola cuenta?

TAULFO: Tírala, ho.

SIMÓN: ¿Tas seguru que nun habremos rindir cuentes?

TAULFO: Eso ante Dios namás…

NINI: Ante Dios y ante el xulgáu de Llaviana, en saliendo d’equí… Voi llantavos una denuncia…

SIMÓN: (Dobla la cuenta y métela perbaxo de la puerta) Toma, fíu, pa un apurón… (Garra les bolses y encara a TAULFO) ¿Tas preparáu?

TAULFO: ¿Díceslo de verdá?

SIMÓN: Completamente… Tuvi pensando nello a la vuelta… Nun te lo pidiría, pero yo nun llego…

TAULFO: Ye que… Una puñalada, anque sea raspiada… A un amigu…

(TAULFO saca la navaya de Taramundi y acércase per detrás. El xestu de SIMÓN ye de dolor agradecíu. Tres d’un ¡PLOF! apaez SIMÓN DEMONIU)

SIMÓN DEMONIU: De verdá, compañeru, va quedate un alma que nin pa farrapos de gaita…

TAULFO: ¡Dios me perdone! Una puñalada raspiada y a traición, y a un amigu…

SIMÓN: Más puñalaes da la fame, anque seya fame d’amor.