Presentación del llibru El color de l'ausencia (Casa de cultura de L'Entregu, 17 de febreru de 2005)

PRESENTACIÓN DEL LLIBRU

EL COLOR DE L’AUSENCIA

CASA DE CULTURA DE L’ENTREGU 17 DE FEBRERU DE 2005

                                                                      

            Enantes de nada quiero dar les gracies. Gracies a les instituciones, al ayuntamientu, a la biblioteca, pero tamién a les persones que ficieron posible esti actu de presentación nel mio pueblu, dende Nacho, l’alcalde, a Nedi, la bibliotecaria, a la conceyala de cultura, a Chechu, al que yo creo qu’había que nomar l’arquitectu o l’inxenieru de la lliteratura asturiana, nun solo pola precisión cola que lo trata too, sinón pola so vocación de tender pontes –y dambos sabemos por qué lo dicimos-. Sobre too gracies a vosotros, que tenéis a bien tar acompañándome equí y dándome’l calor de la presencia, que nun ye lo mesmo que’l color de l’ausencia.

          

  Ye prestoso ver que los entreguinos y la xente del conceyu, cásique de tola cuenca, tamos dándomos cuenta de que tenemos un potencial que vender, que da-y al mundu: la nuestra cultura. Les presentaciones que lleven siendo tan avezaes, los grupinos, l’interés, los proyeutos de futuru y sobre too, l’apoyu que tamos teniendo (falo del calandariu que fizo l’ayuntamientu, de la recepción y de la disponibilidá que vienen amosando) faen que l’eslogan de la páxina web de Samartín se tea convirtiendo d’una promesa a realidá: un conceyu pa vivir, un conceyu pa invertir. Espero que nun se dexe amorecer esta llama que ta, al mio entender, acabántenes de prendese y qu’ente toos l’avivemos.

            A lo que díbemos, que pa eso tamos equí, quiero falavos d’esti llibru de poemes. Y nun veo otro meyor que dir, pasu ente pasu lleendo dalgunos dir desplicándovos cómo y d’ónde nacieron y sobre too, facevos ver, asina, que la poesía ye daqué cercano, que diz coses de nosotros, y que namás fai falta intentar saber qué nos quier dicir el poeta.

            El llibru consta de dos partes. La primera ye Tiempu de fruta maurecío y quier tresmitir, a través de la rellación que tenemos coles frutes del veranu, la relación cola mocedá, col ser non mozu, sinón mozacu, tener la vida per delantre, tiempu a esgaya y cásique nenguna responsabilidá. El primer de los poemes A CIRUELES fala de cuando, de rapazos, garrábemos les bicis pel veranu y díbemos hasta un saltu del ríu, a El Condáu, a bañamos en porriques, mientres pasaben, viéndomos, los coches colos turistes camín de Soto d’Agues y debíemos pensar que yéremos osos. Escribílu cuando yá nun m’alcordaba d’aquello, pero una vegada, recoyendo un premiu nel FUNDOMA, atopé a una rapaza que yera d’equí y díxome delantre mio ma: “ai Pablín, mira qué salinos escritor, ¡quién lo diba dicir cuando te bañabes en pelota picada n’El Condáu!”. La cosa tien gracia, nun solo porque m’escaeciere del episodiu aquel, sinón porque mio ma enteróse entós de que’l so fíu nun taba les tardes del branu na barriada de la güela, que diba pela xeneral hasta El Condáu –colo parribones que quedaba- y que se bañaba en porriques. Alcuérdome de baxar atropando cirueles y cola boca enllena d’elles, el vientu na melena que gastaba entós y aquella claridá del tapecer. Aquella ye la sensación a la que-y fici’l poema pero yá dende l’aposentamientu que dan los años.

            TASTIU A ZRECES ye un poema que fala d’una infidelidá fiel, ello ye, qu’a vegaes, les persones cambiamos cuando llevamos munchos años xuntos y un día alcordámosmos de cómo yera l’otru, o de cómo yera ún mesmu y de cómo dempués la vida foi cambiándonos y faciéndonos descreer de los suaños y de les coses qu’enantes compartíemos, diendo, por exemplu, a zreces.

            Dempués, na segunda parte, endientrámosmos na parte que da títulu al llibru: El color de l’ausencia. El títulu atopélu viendo un documental nel que salía yo, que se llamaba Lluvina y que trataba de cómo tán quedando les cuenques. La cita de John Berger dicía: “el carbón es el color de la ausencia”. Y yo fui retratando les ausencies que dexó’l carbón nes nuestres vides. A esta tierra que siento como se siente a la persona que quies, dediqué-y un poema que, a veces fala de la muyer que quiero y a veces de la tierra, fundiendo a les dos nel mio sentimientu.

            Otra de les ausencies que va quedando ye la de los pueblos que vemos que tán desapaeciendo, poco a poco: les cases queden trancaes, podrez la madera y un día, o una nueche, la muerte españa saltando enriba’l teyáu y estrozándolo too. Nun nos damos cuenta de que los artales que zarren los caminos vienen a por nosotros y qu’un día vamos tenelos a la puerte casa.

            L’últimu de los poemes ye ún de los que más me presta pola historia que ta tapecida debaxo y que nun sal a la lluz. Hai dos años, per estes feches, a la mio muyer, entós la mio moza, tocába-y facer les práctiques de pedagoxía na Residencia de la Tercera Edá de Laviana. En viendo que les persones que taben ellí teníen inquietúes y que queríen siguir realizándose como persones, dio en facer con ellos un grupu de teatru, Mayor Amor, pa siguir non solo realizándose sinón entreteniendo y premiando con ello a los demás.

Foi provechoso ver cómo esa xente tiraba p’arriba poco a poco y tresmitíamos a los demás les sos ganes por siguir viviendo y por demostrar qu’entá teníen capacidá pa eso y pa más. Pero too esto ye mui guapo de nun ser porque teníen una traba fundamental: nun había nenguna obra que s’adaptase a les sos necesidaes.

Dalgunos d’ellos teníen una movilidá reducida; otros nun podíen memorizar muncho, asina qu’a esti que vos fala tocó-y facer una obra de teatru al corte, adaptándose los papeles a los actores y non los actores al papel.

            Hubo varies representaciones: una na residencia, otra en L’Agüeria, otra en La Felguera y otra na Universidá, onde llevantaron de los asientos a tola Facultá de Ciencies de la Educación, qu’enllenó’l salón.

La propia decana dio-yos un diploma d’agradecimientu por demostranos les ganes de vivir.

Nestes representaciones, ente actu y actu, salíen otros actores a cantar asturianaes, y una d’elles yera bien significativa pa min.

Ye la que diz “ónde puedo dir”, y cola que yo fici esti poema que fala d’esa xente qu’al final de la vida namás tien silenciu, y abandonu, y entá asina siguen con ganes de superase y demostrar que son quien a facer más coses que mirar pa la paré, son quien a realizase como lo que son: persones con esperiencia que nos pueden dar una llección de cómo encarar la vida.

Pa acabar, prestábame recitar un poema inéditu, como premiu a tolos que tais equí. Ye un poema que tien que ver muncho cola mio manera d’agradecer les coses.

Yo fago anís de guindes y nun hai cosa que más me preste que brindá-yoslo a los amigos que lo merecen de la que paren per casa.

Güei, como toi ente amigos y nun ye plan de venir con llicor a una casa de la cultura, tráigovos esta oda que compunxi al anís de guindes. Con esti poema prestábame zarrar la presentación pola mio parte, pa que marchárais d’equí contentinos y col sabor duce que dexa l’aníes, les guindes maceraes, l’azúcare y la canela col pasu del tiempu.

 

ODA AL ANÍS DE GUINDES

 

                                   

                                    Rescamplen del veranu

                                                                                   los primeros

                                    díes, aquellos nos qu’amatagaos

                                    nes solombres furtemos de les cañes

                                    la vida que tan recién

                                                                       retueyaba

                                    en forma

                                               de guindes pequeñes

                                    que fuimos apicando.

                                                                       Hubo díes

                                  estensos y sorrises clares y hubo

                                    manes amigues qu’abrieron caminos

                                    ente los artales del tiempu. En casa

                                    cola piel saciao y la sede llimpio

                                    tola nueche pasemos

                                    escoyendo

                                    qué frutu había

                                                           quedar na memoria

                                    d’aquel veranu, col arume duce

                                    del zucre, del anís y la canela

                                    y la llingua que rescataba

                                    d’ente los llabios tuyos

                                    guindes machacaes que naide quería

                                    -sangre de veranu, savia de la risa-.

                                   

                                    Dalgún prunu echamos tamién

                                    del tastiu agrín que tien la vida.

 

                                    Y agora

                                    reposao

                                    el tiempu

                                    foi faciéndote, macerándote

                                    como l’anís de guindes

                                    nel que rescampla’l calor

                                    de los primeros díes

                                                                       cuando yera

                                    veranu nel corazón de la nuestra alma.

 

                                    Y zarres los güeyos, moyaos

                                    los llabios nesi sangre, zarres

                                    los güeyos y too vuelve

                                   

                                    rescamplu de la sede non saciada

                                    la piel y les rises enriedaes

                                    ente los dos cuerpos

                                                                       tres de la sebe.

 

Vocación

 

El diccionariu de l’Academia de la Llingua Asturiana define la vocación como “l’enclín natural que tien una persona pa una profesión o una actividá”. Por embargu, cuido que facemos mal en xulgar a los profesionales pola so vocación más que polos resultaos o’l desendolcu profesional.

Lo qu’importa d’un panaderu, por poner el casu, ye que faga curioso’l pan; si vas comer y te ponen el cocíu fríu o a medio facer, de xuru que te va dar igual la vocación del cocineru; lo qu’importa d’una abogada, independientemente de la vocación, ye que te gane’l xuiciu.

En determinaos trabayos la vocación ta usándose como una mena de chantax profesional: suplir colo personal la falta de medios, de formación, les hores que nun s’echen, aquello colo que nun se ta en traces de tragar viéndese, nesti mundu desclasáu, como una falta de vocación.

Más d’una vegada lo sentí dicir cuando daquién se tien negao a tragar con carros y carretes: nada, ye que ye una persona que nun tien vocación… Ye que yá perdió la vocación… Non, si esto pasa cuando se mete xente ensin vocación…

Dacuando tien ún el sentir de que la vocación ye como’l llamáu divín que facía a la xente metese en conventu o abrazar la vida relixosa, una voz albanciando ente la nube: “tu, fáete ministra; tú, fáete enterrador; tú, revisor de contadores…”, una revelación mística que marcha de la mesma manera qu’apaez: como si saltaren los plomos.

Y cuidáu coles llamaes divines, qu’igual te faen una perdida, o lo entiendes mal…

Alcuérdome d’una vegada en qu’acusaben a un compañeru de falta de vocación porque se negaba a un trabayu que nun-y correspondía. Naide-y cuestionó’l trabayu como profesional, pero…

“Lo que pasa ye que nun tienes vocación de serviciu públicu”, -y dixeron, a mancar, a lo qu’él, risonderu, contestó: “La vocación ta bien, pero ente que m’opere una mélica que sepia y una con vocación, quedo cola primera, ¿qué quies que te diga?”

Y dempués, socarrón, remató: “Ye una suerte que nun tenga vocación de serviciu públicu, porque, de tenela, igual yera un váter.”

Fredy, chilenu

 Llamábase Fredi, yera chilenu y vendía los llibros bien baratos. Asina se me presentó la primer vez que-y merqué dos llibros nun puestu que punxo pela Selmana Negra.

Atopélu tiempu dempués, cuando punxi clas en La Pola, allá pel 2013, nel puestu d’a la salida del ayuntamientu. Taba más vieyu y enanchara’l negociu: traía llibros; y monedes; plumes y bolígrafos; y tebeos; películes, dvds y cintes vieyes… Toa una cacharrería onde dar colo imposible.

Él y la muyer entamaben a armar el puestín (naide nun sabe lo que pesen les caxes de llibros) y diben asitiando, llendándolos con espetos, los de 1x2, 3x5; 1x3, 2x5; y 1x5, 2x8. Dacuando en vez había que mirar na primer fueya porque dalgún de los llibros escapaba, siempre de los más caros a ponese nos más baratos. Cuento que nun acababen armar el puestín, malpenes-yos daba tiempu tomar un pinchu, calecer al sol si’l día yera bonancible y yá se poníen a recoyer.

Dalgo tienen los puestos de segunda mano que nun gasten les llibreríes de primera: esa capacidá d’atopar lo imposible: los llibros descatalogaos, los que nin siquier sabíes qu’esistíen, aquellos que traíen les fueyes escribayaes o pintaes; con un marcapáxines o una notina…

Como llector débo a Fredi y a la compañera tantos y tantos llibros (¿pa cuándo una biblioteca ordenada polos llugares onde comprasti los llibros?), tantes y tantes bones llectures, tantos y tantos momentos d’esparder revolviendo ente la so mercancía. Hubo descubrimientos, sobremanera impagables, como la Temporada de caza, de Camilleri y el primer Montalbano que cayó peles mios manes…

Dalgo tienen los llibros que suerben la sencia de quien los garra: de quien los escribe, de quien los diseña, maqueta, imprenta; de quien lu compra y pon el so nome o l’exlibris o quien lu llee y anota, sorraya, dibuxa, enmienda.

Tamién guarden la sencia de quien lu acueye y lu vende de segunda mano.

Veo los llibros que me vendisti, Fredi, chilenu, bien baratos y yá tengo señardá d’esos momentos que marcharon pa siempre nos que nun volveré a visitar les fileres de llibros que llendabes con cartelos.

Bibliófagu

     El poeta chinu Chuang-Tzu suañó que yera una caparina y al despertar nun supo yá si yera un poeta que suañaba con una caparina o una caparina que suañaba con un poeta.

     L’escritor ribeseyán Xandru Martino quier ser n’otra vida una viquina y esnalar, dende’l cielu azul ver el país verde a los pies.

     Yo, que yá nun exerzo’l noble arte de pintar en versu la esperiencia del mundu, suañé que yera una cenciella poliya. O quién sabe, como a Gregrio Samsa, pasó qu’al despertar yera un bichu bien feu y abegosu. Nun volaba ente l’albar de les ñubes nin de los pétalos de les mazanales en flor, nun me posaba nel artu albar sarapicáu del pulgón.

     De siempre me dixeron que devoraba los llibros, que yera un bibliófagu.

    Quiciabes por eso suañé que yera una poliya de les que, de la que duermo, ruquen peles fueyes sarapicaes de lletres de los llibros, envede de los árboles: tastiaba la poesía de Seferis y Elitys; fartábame col mugor de Dostoyeski; qué duzayona la prosa de Balzac y cómo me prendía de llume, tanto que me daba un aire a un cocucenondu, les noveles y cuentos de García Márquez…

     Tamién espicotiaba peles d’antoloxíes, como quien prueba d’equí y d’acullá por entretener les hores y variar el gustu, cansu de tanta escelencia.

     Miraba pa l’alacena de casa y metíame pela bona poesía de Miguel Allende o Lurdes Álvarez, qu’abríen los güeyos y la fame y tornaba, nuna llacuada ensin fin, esnalando, al aldu del arume a Mediterraneu, aceituna ya uva pasa de Camilleri; esi saborguín saláu y fríu del atlánticu Manuel Rivas; el posu a volador de sidre que dexa la prosa de Sidoro Villa, y como na so novela, siguía a estaya metiéndome pelos llibros…

     Na novela de L’inmoral del yerbatu Xulio Vixil, el protagonista come caparines y papones; yo, pela cueta, yera una cenciella polía devorando mundos, un monstru de película de serie B que trayía conmigo la maldición del escaezu, la Nada qu’avanzaba nel mundu de fantasía de la historia interminable.

     Sicasí, al despertar, la biblioteca siguía ellí.

Contar

 

     Acabamos d’entrar n’otru añu contando, a papu enllenu, les campanaes que casamos coles uves.

   El ser humanu tien el viciu de contar. Nesa imaxe matemática del mundu namás somos lo que contamos, traducíos a una fría cifra esponencial. Pero somos tamién cuánto contamos y pa quién contamos. Sicasí, granín a granín vamos faciendo copín de les coses más absurdes. Apilamos datos y númberos a los que nun damos vuelta na boca.

    Contamos los años que tenemos (anque seyan n’iviernos o en nevaes, como los indios) y les ausencies que dexamos y que nos dexen; contamos los suaños que perdimos y, con pelos y señales, aquellos que consiguimos; contamos avarientos les monedes que fuimos echando nun tarru del vueltu de los recaos. Contamos pa nos dean pa ún d’esos caprichos, anque al final marcharán nun imprevistu col que nun contemos.

     Contamos con máquines que son a contar por nosotros: el contador de la lluz, el contador de pasos, agora ye un reló que lleva la cuenta de los pasos que damos –sean p’alantre o p’atrás, al derechu o al revés y hasta la computadora debe’l so nome a computar, esto ye, contar datos.

     Contamos los díes que falten pa los acontecimientos importantes y los kilómetros y los metros que nos queden pa llegar a meta (seya cual seya esa meta); y contamos con compartilo cola xente que ye importante pa nós.

     Llevamos la cuenta en cifres arábigues y en númberos romanos; contamos con númberos y contamos con lletres; a vegaes tamién usamos les pallabres pa contar lo que nos pasa, que ye una manera de contanos a nosotros mesmos.

    Había un oficiu que yera contable y otru que yera cuentista. Nun sé bien por qué había dos pallabres pa dicir lo mesmo. Y veis… Yá toi contando…

   Contamos los llibros que lleímos, los besos que dimos, les traiciones que cometimos (contámosles, eses, cola boca pequeña).

    Contámoslo too como si nos fuere la vida nello, y a mayor númberu, más importancia.

    Como si nos fuere la vida nello anque, en verdá, pa la vida contamos mui poco.

    Eso por descontao.

Dar les gracies

Toles mañanes, enantes de trabayar, paso en coche pela panadería. Busco un sitiu p’aparcar, o paso l’apurón de dexalu unos minutos tiráu de mala manera; entro, doi los bonos díes, pido un mediu y, enantes de marchar, doi les gracies.

Esti día, la dependienta, sosprendida, retrucó: «Nomenón, les gracies hai que dáteles a ti, nun les tienes que dar tu». Na parede tienen puesta la receta cola que trabayen. Acaba con “una plizca de respetu”. Señalé y dixi: «dar les gracies ye esa plizca de respetu que fai falta».

Cuento que nun taba enquivocáu en dar les gracies. A cualquier persona que trabaya y de la que nos beneficiamos del trabayu, hai que dar les gracies, independientemente de que nos cobre.

Contaba Fermín Cabal nun taller de teatru la siguiente anécdota del escritor Boris Pasternak. Pasternak sufriere l’arrequexamientu na URSS hasta’l puntu de que tuvo qu’arrenegar del Premiu Nobel que-y concedieren. Hai una semeya na que, al pie, anuncien que sal escribiendo esa carta. Un periodista entrugába-y cómo yera posible que, tres de tolo que pasare, siguiere tan contentu y animosu. Él respondió que tolos díes se llevantaba y almorzaba:

―Veo’l tazón de lleche y pienso: daquién se llevanto primero y foi catar y traxo la lleche pa que yo desayunare. Veo’l pan y pienso “cuánto me quier el panaderu que se llevantó primero pa min”; veo la marmelada y decátome de la confitera, que tuvo díes pa preparalo… Y nun puedo dexar de sentime, toles mañanes, especial.

Por eso convién tener presente el trabayu de los demás, del que nos beneficiamos el restu. De la que salgo en coche pa trabayar, pienso nes persones que se llevantaron hores primero pa que la cai arume a pan cande; tengo en cuenta a les dependientes que salieron de casa primero pa poder despachar y abrir la tienda a les ocho en puntu.

Como Boris Pasternak, nun puedo dexar de sentime afortunáu, porque pienso qu’ellos abrieron y trabayaron pa min. Ente munches otres persones que van dir a merca-yos. Pero tamién pa min.

Por eso, emocionáu, doi les gracies.

Yoli, llibros, maxa

Si dalgo de maxa queda nesti mundu atopase nel arte, na lliteratura: bruxos y bruxes apaecen arrodiaos de llibros.

     Les tapes d’un llibru abren les puertes a un mundu, vieyu o por llegar. Nuevu siempre. Les ringleres son carreros del llinguax que nos lleven como un fechizu.

     En L’Entregu entá resiste la Llibrería Sol. Yá falé d’ella. Esti día, una de les sos fundadores, Yoli, cumplía noventa años. Una iniciativa popular escurrió da-y un homenaxe en pueblu. Enterése asina de cómo Yoli y Sol fueren un refuxu, cuando los tiempos buxos, onde agospiaben pa falar de la maxa de la llibertá y de la democracia. Aquella xente con inquietúes alcontraba en Sol y na sorrisa de Yoli, una casa na Tierra Prometida. Casa que, como nun podía ser d’otra manera, trayía les paredes enllenes de llibros.

     Nos noventa, en segundu de BUP, gané’l premiu d’escritura nel institutu. Cinco mil pesetes nun vale pa mercar llibros qu’al final fueron en perres. En casa, daquella, pasábamoslo mal y, como Charlie, col billete, allegué a casa y conté-ylo a mio ma. Dexé una copia del relatu, El mensaje del relicario, y el sobre col billete.

     ―A ver qué diz to pá.

     Mio pá llegó de nueche. Yo taba en cuartu, estudiando. Sentílos falar llueñe. Entardaron en venir. Mio pá traía la copia na mano y la cara de les coses series. Nun sé por qué, pero bien pensé que me diben reñer.

     ―¿Escribisti tu esto?-Asentí. Allegóme’l sobre-. Si te lo dieron pa llibros, creemos que tienes que gastalo en llibros.

     Quiciabes ellos vieron daquella en mi dalgo que yo nun acolumbraba.

     A la mañana siguiente, de sábadu, entraba na llibrería Sol. Severino, el que fuere maestru míu en Bosquín, taba ellí. Allegróse al contá-ylo.

     Llegóme’l turnu y Yoli miró pa min con aquella sorrisa, idéntica a la qu’esti vienres, cuásique trenta años más tarde, entelada pol pasu del tiempu, me dedicó na comida.

     De quedar maxa nesti mundu, nun lo duldo, ta nos llibros. Y nes persones que los guardien. 

     Gracies, Yoli.

    Gracies, Félix.

    Gracies, llibreros y llibreres, por resistir.