lunes, 27 de febrero de 2012

40 en 34: la mio crisis particular


Tengo una crisis. Tanto andar pregonando y dando la vara cola crisis (que paez lo de morri morri), apegóseme. Tengo la crisis que dicen de los 40 a los 34 recién cumplidinos. Pa dir adelantando trabayu, supongo. Y agora que venga Sarkozy, la Merkel, les axencies y la zona euro a arreglalo.
     La primer vegada que supi que diba pa vieyu ficiéronmelo saber. Son coses que lleguen asina y ún nun se da nin cuenta, que diz el cantar. Caminaba pel caleyu que pasa per detrás de los bomberos, pel que se llega al día y un guah.acu que venía en bicicleta dixo: “Cuidáu paisanu”. Tenía ventitantos daquella y dixi pa min, esti guah.e ta alloriáu, “¿ónde hai un paisanu si namás toi yo?” y cuando me decaté, grité, “sinvergüenza, yá verás si te pillo”, que ye dalgo mui de paisanu, como lo de “conózote a ti y a la to familia y sé ónde vives”.
     Daquella acá'l tiempu va dando señales: apaecen quilos onde nun los había; van saliéndome canes perdayures (y yo digo que me les van sacando), y voi consintiendo en que meyor canes qu'entraes; voi repitiendo, esautu como un relós suizu, los mesmos chistes que faen que la mio muyer ponga cara cafiante como diciendo, “que pesadín yes ricu”, ente otres munches llaceries. Amás, lo que más me preocupa ye'l tema de sentime dicir lo que nunca creyí que diría. Dicir, por exemplu, que los guah.es d'agora yá nun son como los d'enantes; que nun saben xugar a nada; qu'enantes sí que...; dicir que yo de la vuestra edá... que yera (llei de vida) lo que me dicíen a min. L'asuntu, creeime, ye bien seriu. A min preocupame esti repunu que crez dientro. L'otru día, ensin dame cuenta, sosprendime mirando pa una obra cinco minutos de siguío y cásique a puntu tuvi de gritar al capataz que nun tenía nin idea. Cada día me gusta más la petanca y arreparo nos cartelos de los especialistes. Y de xuru que pal añu que vien guardo cola na Feria pa la gorra de la caxa y hasta armo barullu si daquién s'intenta acolar...
     ¡¡Cágonmimantu, lo que faltaba pal duru!!
     Voi pa vieyu. Hai síntomes ineludibles: cada día esti perru caleyeru ta más famientu de mimos.

7 comentarios:

  1. Bienveníu al club.... aunque esto tien más pinta de crisis esistencial que d'otra cosa.
    Más que na porque quédente un par de xuventudes tardíes tovía por delante pa llegar a los mis años.
    ¡¡¡ jajjajaj, muy bueno ...préstome mucho lleete!!!!

    ResponderEliminar
  2. Arriba terciu, siempre mos quedará Carla von Düssel pa sufrir, que súfrese muncho...

    ResponderEliminar
    Respuestas
    1. sufrir súfrese, pero ¿habrá cosa más guapa? Eso, consulator, bien mos lo enseñasti tu: cultura Atlántica, pero de la cuenca del nalón, ríu arriba...

      Eliminar
  3. Bono, a min con 22 años un rapaz mayor díxome "oiga, señor".
    Con 23, una compañera de trabayu echóme 34 y dempués quixo encalomame.
    Nun me salen canes, pero echo bandullu al tiempu que mio padre.
    Coincido no de los guah.es.
    Llevo cuntando los mesmos chistes (el del tomate!!) dende qu'empecé la pubertá (que nun tengo claro si ye un ciclu o una recta).
    Dícenme que soi'l bichu más repunante del catálogu de bichos conocíos pol ser humanu.



    Y vivo de mirar pa les obres.


    Nun tas en crisis, tas como un rapaz de 29!

    ResponderEliminar
    Respuestas
    1. Ruben, l'otru día na tele Risto Mejide díxome una cosa que me fixo alcordame de ti (qu'al empar dicía Chesterton, vese que Risto ta estudiáu): "La sabiduría pue aparentase, pero l'inxeniu non". Gracies pol mimín...

      Eliminar
  4. "Esto antes yera too praos", Pablo.
    Un abrazu.

    ResponderEliminar