El pasáu sábadu acompañé a los mineros, mineres, familiares y amigos dende Barredos hasta'l Pozu Candín, onde trabayó mio pá y onde permenez encerráu un grupu de mineros de los munchos que tán lluchando pol puestu de trabayu. A ellos esti romance cola idea de que vuele, como hai tiempu facíen, de boca en boca llevando la noticia de la so llucha.
Vienen los mineros, madre,
cola llámpara encendida
y un silenciu tan escuru
enllena la lluz del día,
¡qué poques pallabres traen
na garganta renegrida!
Tantos compañeros tienen
encerraos na galería...
tantos brotos que florecen
nel corazón de la mina.
Van recorriendo la cuenca
que va quedando ensin vida
la sonrisa d'otres veces
¿ónde la traen escondida?
¿Quién-yos quitó la esperanza
y el futuru la familia?
Tantos compañeros, madre,
encerraos nueche y día,
¡Tantos son y nun se rinden
que -yos va nello la vida!
Van lleva-yos nesta marcha
apoyu, van da-yos tira.
Va xiblando suave suave
la mecha la dinamita
la rabia que va prendiendo
per esta senda marchita
enllena de castilletes
onde la rueda nun xira.
¡Tantos compañeros, madre,
abaxo na galería!
¡Esta llucha nun s'acaba
equí nun hai quien se rinda!
Pasen los mineros, madre,
y a l'altura'l María Luisa
el puñu ye un corazón,
¡¡Santa Bárbara bendita!!
No hay comentarios:
Publicar un comentario