Capítulu X. Cucurrucucú, palombu...

Capítulu X

Cucurrucucú, palombu

                (SIMÓN na cocina de casa. Mantel de tela y servilletes; platos nuevos y vasos. Mira ún al treslluz y cuspítialu)

SIMÓN: Agora, impecable. Esto nin cuando los nabos en La Cabaña…  (Mira’l reló) Ta yá por venir… (Mete los deos na boca y acuriosa’l pelo que-y sal percima les oreyes. Suena’l timbre. Va abrir. Siéntese saludar y dir guiándola) Pase, pase, sí… Yá sabe per ónde queda la cocina…

MARIVINES: Ui, qué elegantono punxo vusté la mesa, don Simón.

SIMÓN: ¿Paez-y? Nada… Ye una casa humilde. Mire, Marivines, estos platos estrenámoslos nesta cena, ¿sabe? Diérenmelos cuantisimayá al facer un seguru y siempre esperé una ocasión especial p’abrilos. Equí, el guah.e y yo, yá sabe, colo de tola vida apañámosnos. Nun hai un platu hermanu del otru, pero bono…

MARIVINES: Madre, la mantelería, cosa fino…

SIMÓN: Recién comprao de Portugal, de va diez… non… Quince años, o más… D’enantes del euro… De cuando fuimos colos del Montepíu a Ledesma. D’eso, del café y les toballes, traximos como p’abrir un conomatu nosotros. Les toballes tan perehí, per un armariu… Yo como les de la Hunosa… Pero bono, como taba barato, pues nun veíemos sebe. Fue la vez que más me sentí como un ricachón…

MARIVINES: Sí, en Portugal hai bona mercancía.

SIMÓN: Sí, mui bono too, pero agora yá nun sal a cuenta: el viaxe en bus, comer… Caro, colo del euru, enantes siempre había dalguien más probe que tu y dibes colos billetes de mil y avasallábeslos, pero agora… Bien doblada nos la calcaron col euru… Nada, agora somos toos probes…

MARIVINES: ¿Pa calentar esto?

SIMÓN: ¿Cómo lo quier calentar? ¿Al bañu María?

MARIVINES: Fornu, meyor fornu… O micro.

SIMÓN: Tienlu ehí…

MARIVINES: ¿Esto que ye mariellono y como con grasa?

SIMÓN: Sí… Nada, esti putu guah.e, que nun friega… Ye él el que más lo usa, porque ta tol día coles pizzes eses. Yo soi más del platu’l día. Un día equí, otru ellí.

MARIVINES: ¿Y nun cena?

SIMÓN: Pstcch… Asíasao… A vegaes pido que me dean pa llevar el segundu platu nun taper, pero non soi de cenar muncho… O si acasu, un poco pan con café, o abro una lata de dalgo, porque soi mui aficionáu a les lates. Conservacionista d’esos.

MARIVINES: (Abre’l fornu) ¡¡Madre!! Ta un poco puerco… (Pasa’l deu y sal una capa grasaza pingando)

SIMÓN: Na muyer, eso asoplando un poco… Sedrá de nun lu usar…

(Planu siguiente, yá tán dispuestos pa comer. Enriba la mesa hai un par de platos con arroz y carne de palombu. Ente ellos, dimpuestes ensin abrir del too, media docena de llates de conserves con unos palillos pa garrar que tienen forma d’espada toledana)

SIMÓN: Garre, garre.. Marivines… Estes mire, tráxiles de Candás, de l’antigua conservera, unes parrochines riques riques; y estes anchoes de cuando la escursión col centru social a Santillana. Puaf, tán de muerte… Díxome’l de la tienda que yera de les que come Revilla…

MARIVINES: ¡¡Ai!! Yo les anchoes nun soi pa con elles… Atraviésaseme’l pelu en gargüelu y nun lo paso…

SIMÓN: Garre, muyer… Que quien arrepara en pelu nun come gochu… Nun me faga’l feu. Que tamién les guardaba pa una ocasión especial. ¿Quier un poco más de vinu? Ye’l que venía col porfoliu del añu 2012… Bona añada aquel añu: mire que color espeso y qué caldu (Echa-y un poco na copa)

MARIVINES: ¡¡Don Simón!!

SIMÓN: Non, ye gazpachero.

MARIVINES: ¡¡Simón!! ¡Pare, pare!! Paez que me quier emborrachar, ho…

SIMÓN: Non, muyer, ye que nun quiero que diga que nun ta bien servida nesta casa.

MARIVINES: ¡¡Ta faciéndome sentir culpable!!

SIMÓN: ¡Ai, madre! ¿Entós?

MARIVINES: ¡¡Ta vusté estrenando tolo que guardaba pa una ocasión especial!!

SIMÓN: Marivines, créame. Tener una muyer equí en casa, por voluntá propia… (MARIVINES míralu con espantu. SIMÓN empapiella) Quiero dicir… Que nun-y pague… Vamos ver… Nun m’entienda mal… Que nun-y pague por fregar, qu’un par de vegaes al añu pago pa que me fagan llimpieza xeneral… Pues eso…

MARIVINES: Don Simón, nun quiero semar en vusté falses esperances… Yo soi una vecina. Toi agradecida pola comprensión y el favor del otru día y… Namás.

SIMÓN: (Con un biecu de tristura) Yá, sélo, sélo…

MARIVINES: Vamos, que de ser otres les circunstancies. Nun sé… Nun-y diría que non. Pero fágase cargu: tenemos una edá. Y llueu, mio madre, el so fíu…

SIMÓN:…la mio muyer. Sélo, sélo. Namás una merendola como les de cuando la xira, en prau… Sí, ne… Yá, si fueren otres les circunstancies… Voi dir poniendo’l café pa que se faga…

MARIVINES: Amás, que malpenes nos conocemos. ¿Yo qué sé de vusté? Lo que se diz: qu’intentó matar a Mis Daisy…

SIMÓN: (Enfocicáu y atristayáu) Mecagüen el putu perru de Dios… Nun fue asina, déxeme que-y lo desplique. Como siempre me taba lladrando quixi faceme amigu…

MARIVINES: Nun pasa nada, don Simón…

SIMÓN: Sí, sí, que ta tol mundu col cuentu esi y yá tengo fama de Simón Mataperros. Quixi ganámelu y tenía equí un tucu de mortadela con aceitunes y claro, baxé a da-ylu… Pero’l perru esi ye un esquisitu. ¿Vusté sabe que la dueña-y merca xamón de pavu curao ensin sal a costafecha? Vamos que nun -y lo da cuando caduca, que lo compra espresamente al perru…

MARIVINES: Sí, sélo… Dalguna vez lo tien comentao na charcutería.

SIMÓN: Pues claro, al da-y mortadela con aceitunes, infartó. Nun sé, la grasa, el sabor… O igual veníen con güesu les aceitunes. Cayó pates p’arriba y ehí se punxo a gritar la dueña.  (Priende la cafetera) ¿Qué más coses sabe de min, a ver?

MARIVINES: Que la muyer lu abandonó y marchó con un vixilante y colo que-y tocó nuna bonoloto, que lu abandonó porque yera vusté un mandilín, un pocasangre, sangre de coríu…

SIMÓN: Mecagüen la Rosalinda… ¿A que fue la vecina? Tovía piensa que me quedé con parte de lo xugao… Debe pensar que la muyer respetó los bienes gananciales… Págalo comigo, como díbemos a medies. Yera una combinación que xugábemos ellos y nosotros… ¿Qué más?

MARIVINES: Poca cosa. Que ta vusté pálidu como la muerte de nun salir a tomar el sol al balcón porque lu tien tremáu, de va años, de bombones. Que-y gusten muncho les de vaqueros, qu’usa una cincuenta y seis de pantalón, camises d’Elviro, que cuando gana’l Sporting ponse colonia de lo caro porque ta de meyor humor, que dacuando en vez tien insomniu, que tien la ropa interior de mou que nun se-y vean los palombinos; que diz que nun fuma, pero cuando ta d’insomniu arreblaga peles bombones y echa un pitu; que-y gusten les rancheres, porque les tararia cuando fuma; que se preocupa muncho del futuru del fíu y anda moviendo filos pel sindicatu por ver si lu pueden emplear; que nun plancha curioso les camises y que güel la so ropa a pieces de xabón de la Hunosa… Al principiu, cuando marchó la muyer quixo usar el Chimbo, pero agora non…

SIMÓN: (Güeyipláticu) Sí, más o menos… Ye que'l chimbo recordábame a ella. Amás, como vien en pieces grandes, al metelo na llavadora facía munchu estrueldu y tenía mieu que me jodiere los rodamientos. Agora yá nun meto les pieces de xabón enteres… ¿Sabe lo que fago? Peles mañanaes entreténgome y ráspiole contra’l cepiyu del quesu. Una vez nun m’alcordé de llimpialu y el guahe comió la pizza con burbuxes. Bono, asina llavó la boca a la vez que comía, ¿nun-y paez? Y vusté, eses coses, ¿sábeles de casualidá o por afición?

(La lluz parpaguia y de sópitu, marcha. MARIVINES grita)

SIMÓN: ¿Qué ye namás equí? (Mira fuera y ve qu’hai lluz)  ¡¡Mecagüen la hidroléctrica y la Ercoa y la Fenosa!! ¡¡Nini!! ¡¡Volvió a marchar coles perres de pagar el recibu!! ¡¡Gondiós!! ¡¡Qué vergoña!! ¡¡Un llampisteru al que-y corten la lluz!! ¡¡Nun hai respetu yá!!

MARIVINES: ¿Nun lu tien domiciliáu?

SIMÓN: Non, tamos engarriaos cola caxa d’aforros dende que nun nos dieron entraes pa la Feria Muestres. Pagámoslo too en mano, y pído-yos xustificante por triplicáu, ¡¡qué s’arruinen a papel…!! ¡¡Ala, apunte, otra cosa más que yá sabe de min!!

MARIVINES: Voi marchar, creo que sedrá meyor que marche… Nun vaya ser qu’en cuenta un virigüetu coma’l corchu la botella…

SIMÓN: ¡¡Non!! Nun se preocupe qu’esto arréglolo yo agora… (Llevántase apalpando y cola llama d’un chisqueru. Vuelvi con dos velones prendíos d’esos que se forren con plásticu coloráu pa los cementerios) Equí traigo, veles. Al día siguiente a los difuntos paso pel cementeriu y fago provisión, ¿sabe? Si tán mediaos, tráigolos. Córtolos con una navayina y…

MARIVINES: ¡¡Ai señor!! Que yo soi andaluza y esto dame resquiciu… ¡¡Llargatu, llargatu!!

SIMÓN: Mire, eso ye una cosa que nun sabía de vusté.

MARIVINES: Creo que voi marchar…

SIMÓN: Non, por favor. El café y una copina d’El Gaiteru que la tengo equí…

MARIVINES: …pa una ocasión mui especial.

SIMÓN: Sí (atristayáu, como quien nun consigue l’efectu esperáu). Espere que priendo un poco la radio… Va a piles, ¿sabe? (Pon la radio. Suena música de fondu) Namás garra Radio Samartín… Ye que Radio Samartín presta muncho porque nunca te ponen dos al dereches: una cumbia, una asturianada, una de flamencu, un chunda chunda… (Saca’l café de la cafetera elléctrica. Toca la xarra) Ta tebio. ¿Quier zucre o sacarina?

MARIVINES: Sacarina, si me fai’l favor… (SIMÓN abre la puerte d’un armariu de la cocina y cai-y la cuyarina del café. Agáchase y da col picu de la puerte na frente)

SIMON: ¡¡Puta que lo parió!! ¡¡Escalabréme!! (Lleva la mano a la cabeza y agárrase a la piedra mármol de la encimera)

MARIVINES: ¿¿Fue pa muncho??

SIMÓN: Di-y con tol alma. Nun la saqué del marcu de petaca… (Quita la mano y vese que-y arrolla un pingón de sangre)

MARIVINES: ¿A ver? (Quíta-y la mano) Sangre… Ta vusté sangrando muncho… (Entama a alendar fuerte y de poco en poco a mordese los llabios. Va tocando la sangre colos deos)

SIMÓN: Nun se ponga asina, Marivines, nun se ponga asina que’l que se tien que marear soi yo, que nun veo más que chiribines…

(Amoria y va sentase. PLANU CENITAL. Marivines, escitada síguelu, y va besándolu. Siéntase acaballada enriba d’él y bésalu como si tuvieren nun reserváu de Kaos, cola pasión alloriada d’un reserváu de la Madison. Pela radio, ente’ ruxir de los llabios y la saliva siéntese’l cantar de Cucurrucucú, paloma.)