Fai quesu y ven

El quesu casín ye ún de los más vieyos d’Europa, al dicir de los espertos, pola testura, cola manera de facelo. Un quesu que nun dexa a nadie indiferente y que guarda, como tolo que tien que ver con Casu, esto ye, rellación ente les persones y el mediu nel que viven.

Imposible nun meter contra’l cielu la boca les esgaralles nes que ruempe dacuando y nun sentir ellí'l fríu de la caliza nes peñes, la yerba crespo de les mayaes, el pasu del iviernu pelos llagos altos, el cielu azul de los branos y el golor de los fayeos…

Nun hai falta más pa dicir que soi un namoráu de Casu y un incondicional de los quesos asturianos, pero sobremanera, del casín.

Veo con esmolición (fartona) el so futuru; como’l de tantes otres manifestaciones culturales d’Asturies.

Anguaño, namás hai dos queseríes que dediquen a la fabricación del quesu y que siguen los mandaos de la DOP. Sé que’l quesu casín ye más qu’ello. Sé que, sicasí, queden entá muyeres (porque nelles recayía sobre manera’l testigu, la heriencia, la memoria y cultura quesera) que guarden xunto a la receta, el cuñu de madera col que se marcaba, con figures xeométriques y espirales, coles iniciales de la casa.

Enantes, en La Collá d’Arniciu, entá se poníen estes muyeres de les cases a vender los quesos propios y, col sabor común del quesu casín, ún yera p’alcontrar los matices de cada casa; dizse que cada casa guarda un golor distintu. Col tastiu de los quesos pasa igual y xurgaba ente’l tastiu a dar col sabor de la mayada na que xubieren a pastiar les vaques y el camín fervollando del interiu...

Hai una cosa que nun se pon en valor y que cuerre, como’l quesu casín, pelligru seriu de desapaecer (amás de les madreñes, por cierto, que nenguna nun vi a la venta).

Nel certame del quesu casín d’esti añu l’asturianu tuvo ausente dafechu. La llingua na que se diz arniu, cuayarón, gorollu, l’interiu, mayaes…, presente en tolos momentos del procesu del quesu, nun se vio engalanada. Renegada. Marxinada. Como la tía fea a la que nun se convidaba cuando había invitaos y s’abría la casa. Prescindióse d’ún de los qu’habíen ser los elementos estratéxicos esenciales na promoción y na diferenciación de la calidá del productu, de la so singularidá.

Ye como si renunciaremos a facer el quesu casín porque ye fuerte, porque ye gordo, porque ye… Entós fadríemos otra cosa. Quesu de Burgos. Quesitos. Tranchetes…

Ye como si te dixeren, ¿pa ónde vas con esi quesu, que nun tien salida nenguna? Lo que se lleva ye’l provolone… Los turistes nun lu van comer porque nun entienden...

Pero col provolone nun tasties lo que ye Casu. Nun sigues cola heriencia que te dexaron de va tanto y que ye lo que da la valía.

Y ensin l’asturianu de Casu, tan guapu, tan enllenu de matices, tan de cada casa y de toles cases al empar, nun tasties tampoco lo que ye daveres el quesu Casín.

 A min, polo menos, nun me suena nin me sabe igual.

Fai quesu y ven.

Nun hai meyor reclamu.

Medraín seas.

 

¿Guatafac?

 

L’otru día cuidaba a la mio sobrina que xugaba a les cocinetes. Présta-y, como a tola guah.ería, cuando va a una casa que nun ye la de so, volcar y revolver per trastos ayenos; nosotros facíemoslo colos bidones de bilore y dixán; ella, coles malles de tela d’IKEA onde duermen el suañu de los xustos los cachivaches del primu.

Sentíala xugar en voz alta, como faen los neños qu’entá moren, poniendo voces a ún y a otro, y, de sópitu, aquella vocecina feble, más feble entá porque taba asonsañando una oveyina, reburdió: ¿Guatafac?

¿Qué ye, ho?, salté d’esmenu. Y quedéme mirando pa ella cola resquiebra xeneracional, cuido, cola que mio padre se sentaba al mio llau cuando yo llambía les ventoses del joystick del spectrum y tentaba desplica-y, a un mineru del Candín con pasáu d’arrieru, les estremaes armes del Dragón Ninja: daga, katana, shuriken, nunchakus, bo…

De dalguna manera, ye lo que me pasa dacuando al falar col mio fíu y me diz, por exemplu, qu’ún se refirió a min como “paisanu random de la cai” (y que yo interpreté, enchipáu, como paisanu Rambo de la cai).

Nun quiero ser un léxicupureta. Nun quiero ser un repunantón qu’eche pola perda del bon falar. Tengo memoria y tamién m’alcuerdo de que dacuando en vez costaba entendese con mio güela, cuando-y pidía ver los teleñecos o los aurones a los qu’ella se refería con una pallabra tan guapa que, como tantes qu’ella me deprendió, nun fui a sentir más: ¿yá tas viendo los tirineles?

Tamién mio güela interpretaba a la so manera les pallabres nueves d’esi mundu que yá-y taba dexando de pertenecer y la diba arrequexando: al videu vhs referíase como’l “vidriu ese”.

Cada xeneración aporta con una manera de falar nueva. Son los peldañinos, pequeñucos, de lo que se conoz como la variación diacrónica: la diversidá de la llingua, camudando a lo llargo del tiempu. El relevu de la novedá yá nun cai nes mios manes (o nos mios llabios). Habrá que preparase pa dexa-yos n’heriencia, quiciabes, l’alcordanza de les vieyes pallabres.

¿Guatafac?

¿Qué ye, ho?

Maneres de dicir "nectarina"

Si del cruce d’un burru con una yegua sal la mula, del enxertu d’una pescal con una cirolar xurde la nectarina, una fruta nuevo, saborgoso, que yá nel nome lleva la escelencia, porque la nectarina ye bien duce y xugosa. Una nectarina ye, entós, una fruta que lleva néctar o recuerda a él. Una fruta abondo apreciao pol zusmiu abondoso y pol sabor de postre.

Fáesenos difícil anguaño pensar nuna comida ensinz zucre, pero, nuna dómina na que nun había malapenes llambionaes sacantes los frutos secos y na que’l zucre nun taba a la mano, el miel y el néctar de les plantes yeren bien apreciaos. Entá m’alcuerdo de cuando de nenos andábemos a la flor del gochu, una flor lila que salía del trébol y a la qu’arrincábemos los pétalos pa chupar per baxo el zusmiu.

La nectarina había desendolcar un postre bien viciayón, non en devanéu’l néctare yera alimentu de los dioses.

La nectarina yera una fruta que salió del inxeniu humanu. Como Prometéu robando’l fueu, l’home axuntó una caña a otra, fexo un enxertu y salió la nectarina, una gota duce robada a los dioses.

Pero la pallabra “nectarina” dixérese mal. La riqueza del idioma ta nos falantes y en cómo resuelven, asumen, tresformen esa pallabra qu’ha ser un cultismu, una pallabra tomada, en parte, del llatín y del griegu.

Esti día, esperando la vez na frutería, poniendo la oreya, decatéme de la riqueza de la llingua. Cuásique cada quien que pidía nectarines lo facía d’una manera distinta pero aproximada (ensin qu’ello impidere que la comunicación col fruteru fuere efectiva).

Hai quien diz neztarina -como suel ser vezu pronunciar esa secuencia- y quien diz netarina, simplificando y reduciendo’l grupu cultu -ct- como pasa n’otres pallabres (fatura); hai quien diz nestarina y nastarina; hai quien camuda y asocia la pallabra, quiciabes, non col nectar, sinón cola nata y retafílense les natarines y les natalines; porque la r y la l, ye bien sabío, dacuando en vez altérnense n’asturianu (pescal y percar) y tamién ye fácil sentir netalina…

 Y tu… ¿cómo dices nectarina?

Amar una llingua

Soi filólogu, non porque lo acredite un títulu universitariu. Soilo nel términu etimolóxicu: “El qu’ama la pallabra, la razón, l’entendimientu”. Amo les llingües; toes m’ameriten respetu. Préstame incluso sentir llingües que nun entiendo; pasar los güeyos per una fueya escrito en llingües de les que nada sé. Respétoles porque son queríes pa daquién. Sé que tamién falen de min. Anque nun les entienda, hermánome con otres persones porque na so llingua saben del cielu, del agua, de la guerra y de la muerte; tienen una pallabra pal yo, pal tu, pal nosotros… De tolo que conforma’l ser humanu.

Amo sobremanera la llingua que me dexaron en prenda: l’asturianu. Ye una de les llingües que tuvi qu’adeprender a sentir, poner atención a aquel mundu que quedaba fuera de les clases y de los llibros. Amo esta llingua porque me devuelve les hores de la infancia y siento falar nel so sonsonar a la xente que perdí pel camín de la vida. Entá me xunce a ellos esti filu invisible del que tirar pa salir dacuando del llaberintu. Esta llingua abre y guarda un mundu que nos pertenez por derechu propiu; tien el derechu a esistir, como toes; nella asístenos el derechu a vivir y tamién tenemos el derechu a morrer, el derechu a que nos recuerden per ella. Tamién, como persones, como filólogos, asumimos la responsabilidá y el deber de reclamar esos derechos.

Soi filólogu. Sicasí, hai una pallabra afayadiza pa la xente qu’odia les llingües de los demás: xenoglosofobia. Esta xente hailo. Yo propongo fobólogo pa la xente medranoso pa coles llingües y misólogo pa quien les odia; pa quien-y molesta sentir falar n’otros acentos; pa quien que se ríe -como siempre ficieron los señoritos- de la xente de pueblu cuando va a la capital. Pa esa xente airoso y ufano, que nun sabe qu’hasta nesta llingua qu’ellos piensen tan pequeña, entra tou un mundu. Colo bono y lo malo. Tamién nesta llingua entra’l cielu, l’agua, el yo, el tu, el nosotros. Pa quien nun sabe que si esta llingua se mata, dalgo d’ellos morrera tamién.

La piedra de Sísifo

 

Lleo con plasmu l’artículu d’opinión “La piedra portuguesa” d’Ignacio del Valle.

Acabo de lleelu y garro’l convite, “de sentarnos en una mesa y conversar con tranquilidad” anque se fae difícil cuando se tresgreden les normes básiques pa un debate serenu.

De mano, pa quien diz que quier “conversar con tranquilidad”, sospréndeme esi tonu airáu, indignáu, cuásique revanchista y lo enquivocaes ya inciertes, supongo que por desconocimientu, más que por “aviesa intención” de munches de les afirmaciones.

Lo primero, nun voi a tachar a daquién que piensa como distinto nesti tema como “facha”, nin voi pensar “qué cabronazo”, porque toi fartu de que, por defender la oficialidá a min me digan “nacionalista”, “aldeano”, “paleto”, “subvencionado”.

Lo primero, que como asturianista y defensor de la oficialidá de la llingua asturiana, nun me reconozo nes sos afirmaciones. Nun voi a entrar nes sos opiniones. Caún ye llibre de pensar como quiera, faltaría más (y de falar la llingua que quiera), pero hai coses que nun se sostienen y que nun son asina como se dicen.

Entama l’artículu con una desautorización de les pallabres de Barbón. La so realidá llévalu a negar la máxima del argumentu de Barbón, al tomar por lliteral lo que Barbón espón de manera metafórica: los güelos y los pas (les güeles y les mas) nun son les de caún, sinón la heriencia d’un patrimoniu común.

Yo mesmu puedo sostener lo que diz él. Per parte materna los mios güelos vinieren de Valladolid, asina que, asturianu, falaben bien poco o cuásique nada: nin lu falaben nin lu entendíen daquella. Ello nun quita que l’asturianu nun esistiere; ye más, puestos a da-y la vuelta al argumentu, foron ellos los primeros en señalame que l’asturianu esistía.

Y eso que’l castellanu qu’ellos falaben nun yera’l constructu artificiosu de la RAE. Ellos falaben un dialectu del castellanu, de la zona rural de Valladolid llendando con Salamanca, de Fresno el Viejo. Nun dicíen “cuyo”, por exemplu, y nel so paradigma verbal nun traíen la forma dijeron, sinon “dijon”. A min, na escuela, enseñáronme que lo qu’ellos falaben taba mal porque nun falaben esa norma arbitraria de la RAE y porque empapiellaben al sentir pallabres inventaes como “semáforo”, “pedagogía” o “laringitis”.

Sicasí, con ellos, sintiéndolos y amando la so lingua tan fuera de la norma, adeprendí más que tola carrera y sobre too, aprendí a amar la llingua castellana verdadera.

Ellos fueron los primeros que se dieron cuenta de qu’esistía l’asturianu y los primeros en dicímelo: cuando llegaron cuásique nun s’entendíen y mio güela contaba cómo una vegada una muyer dicía-y “apúrremelo” por una ferrada onde llevaba la ropa. Ehí nació la conciencia llingüística de dos idiomes distintos. Llingüísticamente, fálase de dos idiomes distintos cuando yá nun hai intercomprensión ente los dialectos: el castellán y el asturián.

Personalmente, y como falante d’asturianu y castellanu, espero que tol mundu que quiera usalu lu use en toles estayes de la vida onde-y apeteza y quiera, y qu’esi derechu se respete. De mano, la primera parte de la comunicación nun se ta respetando: esi derechu a falalo que s’invoca nun ye tal na práctica. Los casos que a cada poco chisquen la prensa demuéstrenlo. Y seríen más si la conciencia reivindicativa fuere mayor, ensin dubia.

Y ye sangrante cuando esi derechu yá se recueye, en parte, na Llei d’Usu. La Llei d’Usu, de mano, namás qu’algama’l reconocimientu parcial d’una parte de l’alministración: la del Principáu (que tamién equí’l nome nun ye nada inocente).

La verdá ye qu’alrodiu d’esta llei podíemos falar muncho, d’una llei qu’entagüei, pasaos más de venti años, ta por desendolcar, y ye que foron los propios y sucesivos gobiernos del Principáu los principales insumisos a cumplir esta llei. La xente que la noma pa saciar la nuestra sede, quien diz que yá ye bastante, debería lleela. Asina nun s’estrañaría de lo que ta sucediendo (con venti dos años de retrasu). Esta llei recueye, por exemplu, l’establecimientu de la toponimia tradicional asturiana y la creación d’un cuerpu de traductores. Poro, nun ye entendible la sospresa y l’alarma de parte de los detractores de la oficialidá por dalgo que vien na propia llei que dicen que nos ampara y a la que nos remiten. Nesti sen, esa piedra portuguesa ye un fiensu que va tiempu debiere tar movíu, d’acordies cola propia llei -qu’ameritó’l consensu del parlamentu asturianu. Nun se trata de mover marcos mentales, sinón de tornalos al so sitiu, reconocer, por exemplu, que naide diz El Polledo y sí El Pullíu. Cuando se torga a una Conseyera de Cultura a dirixise al restu del parlamentu asturianu nuna de les llingües que se reconocen como propies, nel Estatutu d’Autonomía, ponse a les clares que la llei ye insuficiente.

Ta a les clares que l’asturianu nun va ser la solución a la situación económicamente desastrosa pela qu’atraviesa Asturies, (situación a la que se llegó esclusivamente d’una manera monollingüe, falando español, que nesto l’asturianu nun tuvo nada que ver, pámique), situación de la que nadie, dende los grandes partíos, rinde cuentes.

Lo que sí se diz ye reconocer y promocionar l’asturianu va contribuyir a crear una seña distintiva, una marca (non solo esiste la “marca España), un productu que defina y singularice los productos asturianos (el casu d’Irlanda, de Miranda de Douro o del País Vascu pueden servir de referencia). Y ye que l’asturianu, pongámonos como nos pongamos, suma. Nun vien a restar. De mano, una parte del presupuestu estatal debería destinase a conservar l’asturianu, como se fae coles demás llingües del estáu. ¿Acasu quien fala asturianu nun ta dientro d’esos “impuestos que pagamos todos”?

Supongo que’l pasáu más de recién ye lo que fae que se piense que la oficialidá traerá esi despilfarru de dineru y de “creación de chiringuitos y comisariados políticos”: casos como’l Niemeyer o’l casu Renedo, nel primer casu; el casu de los munchos festivales, selmanes de lo que seya… fáennos desconfiar d’ello.

Ye una visión pesimista, y como n’otres coses, ye facenos pagar les factures de quien nun lo fizo bien.

Fálase de la subvención de profesores (cuando garantizar el derechu a la educación y aprendizaxe n’asturianu vien recoyío na Llei d’Usu -de verdá que nun entiendo cómo nun se llee cuando ta tamién n’español). Esto pámique supón un desconocimientu insultante de la situación del profesoráu de llingua asturiana, condergáu a una situación d’interinidá perpetua, ensin una especialidá propia, lo que supón un agraviu comparativu col restu de profesores d’otres llingües y d’otres llingües peninsulares que sí la tienen. La subvención de profesores dase n’otra exa que nun tien que ver colo público…

Amás, el proyectu pilotu del aprendizaxe n’asturianu que se punxo en marcha en dellos centros y al que’l mio fíu tuvo la suerte d’asistir, garantizaba la voluntariedá y fízose con un presupuestu que cuásique m’atrevo a calificar como con gastu ceru.

Yo mesmu fui profesor d’asturianu. Soilo agora de castellanu: tan aprovecháu nuna situación como na otra; tan subvencionáu entós como agora… Con más estabilidá agora qu’enantes. Ser profesor d’asturianu nun ye tampoco nengún chollu. Sé bien lo que digo.

¿Quién tando nuna comunidá de falantes billingües nun aprovecha esa oportunidá? Como escritor fícilo nes dos llingües y salgo totalmente arriquecíu…

¿Qué frontera hai? Falar de que l’asturianu supón una frontera ye desconocer lo que cuesta’l peaxe d’El Güerna pa entrar o salir d’Asturies: esa ye la verdadera frontera, esi ye’l verdaderu impuestu que ta pagando la xente asturiano y que nos ta condergando al retrasu; falar de despilfarru ye desconocer la retafila de ceros ta suponiendo la llinia d’Alta Velocidá pa poder dir “de vinos” a Madrid. Falar de fronteres ye desconocer la situación de marxinación del mundu rural asturianu al que lu tán sometiendo los ideólogos de la ciudá única asturiana.

“La ingeniería social que tienen en cartera ciertos grupos radicales por crear padres de la patria” ye una de les afirmaciones que llega tarde: eso yá se fizo con Cuadonga y Pelayo, y sigue faciéndose por dellos grupos radicales y non tanto, y mira si somos grandones que lo punximos como cuna d’España.

Negar un derechu porque pue usase dientro d’un argumentariu que nun nos gusta llevaríanos a prohibir a los sindicatos pa que nun se diere otru ochobre del 34; y al exércitu pa que nun hubiere otru 36… Tutelar la llibertá y negar derechos básicos ye una manera d’empobrecimientu democráticu… Negar la oficialidá del asturianu polo que pasó n’otros llaos (sicasí nunca se cita Valencia o Galicia) ye desconfiar de la madurez del pueblu asturianu y de la so llibertá pa escoyer lo que quier ser; ye facenos pagar les factures de los platos rotos d’otra xente.

Dizse, allegremente, que la llingua asturiana nun ta en pelligru d’estinción. Una organización que camiento que nun ye pa nada sospechosa, como la UNESCO, yá la incluyía nel 2009 nel so Atles de llingües en pelligru d’Estinción; el Conseyu d’Europa recuerda cada ciertu tiempu al Estáu Español la situación pela qu’atraviesen les llingües que se comprometió a protexer al firmar a Carta Europea de les Llingües Rexonales y Minoritarias en 1992.

Pero lo peor de too ye que se diga que “pero me gustaría recordar que las lenguas desaparecen y las que sobreviven lo hacen imponiéndose al resto”. ¿Qué llingua ye entós, la que se ta imponiendo, la que nos tán imponiendo?

Esi argumentu tan reduccionista: “cada día desapaecen les llingües”, ye un argumentu que camiento aterrador. ¿Aplicaríemoslo tamién a la fauna, al mediu ambiente, a les obres d’arte, a les grandes biblioteques? ¿Pa qué recostruyir Nôtre Dame? Cada día quémense edificios… Cada vez que desapaez una llingua piérdese una visión del mundu. ¿Nun deprendimos nada de lo que ficimos en América empobreciendo el mundu imponiendo, a sangre, espada y fueu, l’español?

Llevo más de media vida militando nel movimientu asturianista, viendo como parte de la sociedá asturiana m’acompaña nesti viaxe. ¿Y nun hai demanda social? El movimientu asturianista lleva más de cuarenta años reclamando la oficialidá, nes cais, nes instituciones, nel día a día… Ye quiciabes el movimientu cívicu y ciudadanu del país (podéis escoyer la acepción segunda de la RAE, a ver si vamos tener tamién la culpa de la polisemia de los términos) carauterizáu siempres pol pacifismu col que defendió toes y cada una de les sos reivindicaciones que s’encuadren dientro d’un estáu democráticu y de les lleis vixentes. A quien defende l’asturianu naide-y dio nada; lo poco -que tanto-yos paez a los detractores- foi frutu d’esa demanda social, serena y constante… Exemplarmente democrática.

Y ta claro qu’hai munchos exemplos de combinar esta riqueza cultural. Cítase a Francia como exemplu: la mesma Francia na que l’añu pasáu se suspendió a tolos estudiantes bretones, del País Vascu francés, etc., porque punxeron el so nome na ortografía orixinaria. Que te suspendan l’equivalente a la EBAU porque uses la “ñ” (¡¡de verdá defende un español un país que prohibe la ñ!!) y obligaba a camudar el nome de los neños que s’incribíen con ella… Que torguen la to carrera como médicu, policía, arquiteutu, etc., por poner que t’apellides Núñez… ¿ye esi’l modelu a siguir que se nos propón? ¿Tamos d’alcuerdu, entós, coles polítiques estadounidenses qu’estigmaticen y prohiben l’usu del español?

Sicasí, hasta Francia va adulces abriéndose a esa diversidá y esti mesmu añu adoptó la grafía “ñ”, gracies a (o por culpa de, depende quien lo mire) la movilización bretona.

A mín préstame más citar el casu de Suiza, un país que nun ye sospechosu, precisamente de tar en ruina económica, pese a que falen, y son oficiales, polo menos cuatro llingües: francés, italianu, romanche, alemán.

Precisamente, y eso ye lo que nun entiendo, trátase de sumar. A la escontra de lo que se nos acusa, quien defende l’asturianu vien a sumar y nun restar: castellanu, asturianu, llatín, rusu y mandarín, claro que sí…

Ye’l nuestru derechu y, como tou derechu, supón la obligación de respetalu (y establecer los cauces amañosos pa ello). Una sociedá democrática nun lo ye solo porque cada voz cuente lo mesmo, porque se tenga el mesmu derechu a usala; yelo porque esi derechu fáese con independencia de la llingua na que se fale.

Tou derechu implica el deber de respetalu por parte de los demás, pero ensin l’ánimu de dir contra naide: sí se trata del derechu a falar, y lo más importante, del derechu a que t’escuchen, que fue lo que nun se respetó nel casu de Berta Piñán.

Si-y faen eso a una conseyera de cultura, ¿qué nun-y fadrán a un probe ciudadanu o ciudadana? Por eso, pa garantizar el nuestru drechu a ser sentíos y sentíes na llingua que queramos, pa exercer el derechu al votu, doctoranos, pagar los impuestos, mercar, estudiar pidimos y demandamos, demientres más de cuarenta años yá, la oficialidá.

Pites, pites...

Zequiel, un amigu mélicu, andaba en Cuba nun programa. Yo sabía d’un descendiente d’asturianos que guardaba en casa, escondíos baxo una parva de Gramma, llibros colos qu’un tíu arrampló del Centru Asturianu. Vendíalos de secultres, gotu a gotu, esperanzáu en que nuna dómina más bonancible, aquellos llibros-y sirvieren p’abrir un negociu.

     Mandé a Zequiel a que me dixere lo qu’aquel paisanu tenía. A vuelta de email contóme lo que-y pasara.

     «Nun lo vas creer», entamaba.

     Perdiérase y nun daba coles señes. Metiérase nun llaberintu de casi y entró-y mieu entrugar, porque nun quería que lu reconocieren como estrañu; tentaba dar la vuelta y apaecía nel mesmu sitiu: cais esfarraplaes, bohíos… Y de sópitu sintió enduvielláu nun son caribeñu llamar «pites, pites…»

     Tres d’una tapia vio a un vieyín engurriáu llamando a les pites nun patiu. Sintiólu falar y, tres de vencer l’espeyismu de sentir la llingua propia nun acentu estranxeru, saludó y púnxose a charrar. Llamábase Fabricio y yera de Cabaños. Por nun dir de quintu escapó pa Cuba y anduvo a lo que pudo. «Poqueh perreh truxi, compay, que nin ruxíen en bolsu».

     El mio amigu faló-y de Llangréu y costó-y reconocer aquel otru Llangréu deteníu nel tiempu, na memoria. «El paisanu falaba un asturianu guapu, curiosu». Exóticu, pensé yo.

     Pero lo increíble vieno dempués, cuando s’asomó la fía y lu vio falando.

     «¿Uhté entiende al auelo? Poh no fue que nohotroh creímoh que se vorviera loco, de la demensia, tú sabe, y que se le había ío lo de hablá»

     El paisanu tenía alzheimer. La enfermedá sumía-y la memoria más recién: nun reconocía a los allegaos, pero dacuando llevantaba y dába-y porque yera día de mercáu en Sama y que marchaba sentir a Xuacu cantar.

     Zequiel dolióse del paisanu. Exiliáu otra vegada de la vida, lloñe de les persones amaes, a les que l’escaezu nun permitía reconocer, y solu, tremendamente solu, porque tornara a falar nuna llingua de la qu’entá conservara memoria.

     «¿Qué te paez, amigu? Tamién equí creen que tán llocos los que falen asturianu», finaba con amargor.

     Créote, concedí yo.

     ¿Cómo nun lu diba entender?

https://pixabay.com/es/photos/la-habana-cuba-ciudad-urbana-1982410/

Imposición

El mayor trunfu de la democracia sedría facer que toles voces cuenten lo mesmo con independencia de la llingua que falen. Por esto, choca l'argumentu de quien afirma que la oficialidá del asturianu traería una imposición. Si la sabiduría popular nos ponía al quite d'esa xente que ye quien a sacase un güeyu con tal de qu'otros nun vean, cuido qu'esti ye'l casu de quien quier imponer a los demás la so probeza llingüística, remedando'l vergoñosu autoemponderamientu de Cherines: «hemos logrado que el español sea la única lengua que se hable en la Junta». Que la diversidá llingüística seya un fechu a defender y cuidar nun lo digo yo. Dizlo Europa, la tan socorrida Carta Magna de la Constitución y cualquier otra persona que nun raspie la mediocridá de querer imponer la so pobreza llingüística a los demás. Porque eso ye lo qu’ocurre agora col asturianu. Asturies ye esperta en perder tolos trenes –trentran, Feve, Alta velocidá o soterráu- y mentano gallegos, valencianos, mallorquinos, vascos y catalanes disfruten a tou tren de la so riqueza, la nuestra clas política prívanos de la nuestra.

     El monollingüismu -la imposibilidá de manexase en dos llingües- ye, amás de reduccionista, minoritariu. Son pocos los Estaos que se correspuenden con una sola llingua nes sos llendes, y por esto, son munchos los que nagüen por mandase d'un monolitismu absurdu. En Suiza, por exemplu, les cuatro llingües que se falen son oficiales (francés, italianu, alemán,romanche). Y nun me paez que seya un Estáu al que-y vaya mal –lo mesmo que les comunidaes autónomes billingües españoles. Llingües y poder económicu nun son equiparables, nin pa lo bono, nin pa lo malo. El tratamientu que se da a les llingües (y a quien les fala) y el nivel democráticu, sí. Quien tien dos maneres de ver el mundu duplica les sos posibilidaes de facer frente a los problemes y algamar soluciones pa los problemes. Ciega, la clas política asturiana, ve un problema onde pue tar el principiu d’una solución. La verdadera imposición ye la que vien d'imposibilitar que cualquier persona desendolque les sos posibildaes. Ye de mediocres.

Cereces, arbeyos, fariña de maíz...

Mandáronme facer los recaos y acabé pidiendo la vez na Plaza d’Abastos, na frutería de Fredo. De la que voi comprar, pongo la oreya –deformación profesional- pa sentir cómo fala la xente. Na frutería de Fredo manéxase un asturianu bien guapu, frescu y con tastiu, como la mercancía que viende y de la que te cuenta la historia. Ye lo que tien el pequeñu comerciu, lo que lu fae grande: son únicos. Envede manexar el rexistru neutru uniformáu,la sorrisa profiden fotocopiada, Fredo y Yoli son naturales, como la fruta que venden. Pero esta mañana nun diba chocame tanto cómo falaben…

     -… unes cerecines…

     Y al ticar les cereces, na máquina rellumó en verde: CERECES.

    Diba tiempu que nun comía cereces.Dizque hai xente qu’apuesta que los tomates yá nun saben como enantes. A min pásame coles cereces. La de puñaos que tengo comíos de neñu, saltando a los praos, andamiáu nes cerezales que teníemos en Sorriego… Pero de va muncho que les cereces yá nun saben igual. Con too y con ello, al velo escrito, asina, peteciéronseme. Nun lo tenía nel guasap de la compra que me mandare la muyer. Al finar el recáu (cuatro o cinco moniquís) pidí un cuartu quilu cereces.

     -Pero vas dexame que-y saque una foto a la máquina.

     Fredo y Yoli quedaron plasmaos. Nun entendíen.

     -Ye que tiéneslo n’asturianu –despliqué-, y eso prestóme pola vida.

     Riéronse y dixéronme que teníen más coses: cereces, arbeyos, fariña de maíz…

Diba tiempu que nun comía cereces tan prestoses. Refrescaes n’agua, después de comer, en casa comíemosles. Les cereces yeren les llambiotaes de la nuestra neñez, llavándoles pa qu’enfrescaren y nun nos cayeren pesaes nel estómagu; poníemosles, cuando les garrábemos colos rabicos, na oreya, como si fueren perendengues.

     Y entós cayí de la burra. Fredo apurriérame un puñáu de cereces de les de la mio infancia. Cuando’l mundu yera tan cande y cenciellu (altu, lluminosu, esbeltu, al dicir del poeta) qu’a les coses les llamábemos pol so nome, na nuestra llingua. Cuando les ceres yeren cereces; y los arbeyos, arbeyos; y la fariña de maíz, fariña de maíz…

Crece el acoso al asturiano en España: “Mis compañeros dicen que mi idioma es feo”

Crece el acoso al asturiano en España: “Mis compañeros dicen que mi idioma es feo”

En España existe un incipiente brote alérgico contra los asturianohablantes. En cada nueva generación de asturiano se pierde más el idioma.

FOTO: Una banda de gaiteros canta fuera de la oficina de un partido político, que protagonizó un episodio de discriminación. AP / EPV

TOña del canto.Oviedo.

 29 MAY 2018 - 17:40 CEST

La hija de María Infiesta evita hablar asturiano en la escuela concertada a la que asiste en La Gesta, Oviedo. “Dicen que es feo”, le cuenta la niña de seis años a su madre. Cuando un asturiano habla en su idioma, sus compañeros le hacen sentir mal. “Ella me dice que la mayoría de los que fastidian son de origen asturiano. Yo creo que replican la discriminación que han sufrido sus padres”, supone Infiesta, de Tolivia, radicada desde hace dos años en lacapital asturiana. 25 kilómetros al norte, en un McDonald’s de La Calzada, Gijón, trabaja Malena de la Cruz, ayerana de 35 años. A ella no la molestan si habla su lengua materna, simplemente no la dejan. “Nuestra jefa dijo que algunos clientes se sentían incómodos si hablábamos en asturiano, así que nos obligan a comunicarnos en castellano”, cuenta de la Cruz y agrega: “Yo le respondí que eso es discriminación”.

En una tierra donde se ven anuncios en asturiano, donde algunos, pocos, servicios públicos ofrecen atención por teléfono en los dos idiomas y en donde es común que te tome el pedido un asturianohablante, sería una falsedad decir que no hay facilidades para los 150 mil asturianohablantes  que viven aún, el 13,5% de la población. Pero cada vez son más frecuentes los episodios del brote alérgico al asturiano sumados a las grietas xenófobas que ha abierto la administración de algunos sectores políticos. El último caso fue el de los abucheos a la megafonía del Teatro Campoamor cuando anunció el inicio de la ópera en asturiano. Hace unas semanas se viralizaron los gritos de un abogado amenazando a unos asturianohablantes en un restaurante. “Esto es España”, les advirtió. Y a comienzos de este mes unos empleados de una cadena de supermercados demandaron a la marca por una supuesta política de No bable, incluso en los recesos, que se habría aplicado en 2012 y 2013.

Asturias es la región de España donde más asturianohablantes se encuentran, pero no el único. Aproximadamente entre 120.000 y 150.000 (un 12,5%) lo hablan en sus casas. Aunque, según un estudio del Instituto de Estadística Lingüística (IEL), hay que algo está cambiando: La población asturiana crece, pero el porcentaje de los que hablan el idioma cae. “Es una tendencia pequeña, pero avanza más rápido que antes”, apunta Íñigo Noriega, director de investigación asturiana en IEL. López sostiene que los menores de 18 años nacidos en el asturias con padres asturianohablantes serán los reflejen la pérdida del idioma.

Más allá del asunto demográfico, lo relevante para Naciu Texón, director del Instituto Jovellanos de Nueva de Llanes, es que desde hace 1 año Asturies está saliendo de su aislacionismo lingüístico, con la introducción del programa piloto de las escuelas bilingües . “Hace 20-25 años atrás, el asturiano era el idioma que hablaba tu carnicero, las vendedoras de los mercados o la cajera, pero hoy es el idioma que aprende tu hijo en el colegio”, explica. Aunque reconoce que la discriminación se ha espoleado en la era Cherines. “Se ha acentuado la sensación de impunidad en esta sentido, incluso han interpuesto un recurso contra las escuelas piloto; pero también crece el rechazo a ese tipo de actitudes, esa es la tensión que estamos viendo”, analiza.

A pesar de que se respira un ambiente más hostil en los últimos dos años, a nivel laboral, por ejemplo, no ha variado el número de denuncias por discriminación que ha recibido la Academia de la Llingua. En 2017 admitieron más quejas, asesoradas de forma gratuita, decisiones arbitrarias por el lugar de origen, acoso, entre otras. “Hay que entender que la política ‘solo español’ no es ilegal cuando está motivada por cuestiones de seguridad (como el caso de los bomberos) o garantizar el funcionamiento del negocio (un dependiente y un cliente) y se implementa por motivos no discriminatorios”, aclara José Oliveros, portavoz de FACE.

La multiculturalidad que ostenta España en su historia la ha conseguido integrando. Pero eso ya no es tan así. Ante este fenómeno, “cierta población asturiana tiene miedo a que su comunidad deje de ser lo que era y ese temor tiene tintes discriminatorios”, afirma Olmos.

Si usted leyó hasta aquí y ve que ciertamente la política "solo español" es acertada, le invitamos a que lea la verdadera noticia y se de cuenta de cómo su actitud hacia lenguas minoritarias o cooficiales, tiene que ver mucho con lo que le ocurre al español en otras partes del mundo. Esta noticia es reformulación de esta otra, un ejercicio para comprobar sus prejuicios lingüísticos y hacer que tome conciencia de que su visión de supremacía lingüística es extraña completamente a criterios lingüísticos:

https://elpais.com/internacional/2018/05/29/actualidad/1527608109_981506.html

Ortigues y cieno

El maestru viniere dende Uviéu, cola carrera recién sacada, los llibros persabíos de memoria, los santos memorizaos. Coles gafes de metal –un poco tintaes pal sol-, brillantes, pedagogu enfrente una reciella revolvina. De lengua sabía muncho (recitaba y declamaba como un feriante de tómbola); de sociales y d’historia, ¡¡recitaba de siguío los trenta y picu reis visigodos!!; de música, ¡¡tocaba’l pianu meyor que los xitanos que pasaben cola cabra!! De matemátiques, arreglaba los quebraos…

     Yera un fenómenu, taba estudiáu, pero…, en Ciencies, los rapacinos ximelgaben la mollera, taba como un pollín.

     Ponía-yos dibuxos d’animales y daba en llamar “ciervo volante” a la vacalloria; gusanos tanto a merucos como a cocos; una vegada castigó a Chilu porque dicía que les gates atopábense también nes fueyes de la llechuga; a min púnxome contra la paré por dicir que mio pá tenía los meyores coyones de fraire de tola rodiada; al piescu, melocotón; y fresas salvajes a los miruéndanos (que yá me dirá que tienen los probes de xabaces).

     El mayestru sabe muncho, dicíen los críos al recréu, pero llama-y celidonia a la cirigüeña ye por dase importancia, home, bah.

     El mayestru chiflaba nes clases de naturales. Gochu, ¡¡cerdo!!; nates, ¡¡cieno!!; fabes, ¡¡judías!!

     -Mayestru, si empieza a soltar cagamentos, malo…

    El maestru sabía muncho de coses que veníen nos llibros, de les guerres y los reis, y les lletres y Lope, y los polinomios, pero de monte…

     Llegó la primavera. Salida de fin de cursu al monte. El maestru, con mapa y brúxula, andaba tres los rapacinos qu’atayaben y s’esgolaben per praos y regatos. Y nuna d’estes Chilu, resabiáu polos recreos que chupare castigáu, patió pela menta hasta qu’arumó tol camín y el maestru gusmió y dixo qué bien güel y quixo llevar un poco d’eses plantes pal pisu de San Llázaru y entrugó ónde s’atopaben y Chilu señaló col cazu pa un matu: "Ye menta, señor, ehí la tien".

Y taben floríes les ortigues. Sentímoslu clamiar. Agullíes de dolor de la que Chilu, zorramplón, dicía:

-Eso, non, maestru, eso son ortigues, ho. Agora va

tener que meter les manes en “cieno”.

Cherines y l'asturianu

Desconfiái de los políticos cuando se nieguen a falar d'un tema, cuando dicen «esto nun toca», nun lo pide la xente, hai coses más importantes... 

     Tán tratando de ser de too menos políticos. De marcavos el tiempu. De guiavos como a oveyes. Por ellos Pokemon nun tocaría, la xente nun demandaría qué pasó con Villamadalena y la Gürtel nun interesaría a naide… 

     Desconfiái, pues, cuando vos digan que nun van permitir que dalgo se politice, porque lo que quieren dicir ye que nun van permitir qu'otros -yos ganen terrén nesi tema. Tenemos una política que nun debate pa llegar a alcuerdos sinón pa nun perder los sos reinos de taifes.

Cherines y el cuartu rural

     Pa Cherines y parte de los sos copartidarios el mediu rural nun ye un mediu, sinón el cuartu rural d'onde saquen la macona de votos qu'agora, cautives y desarmaes énte otres fuerces polítiques les «grandes ciudaes», -yos permiten amarutar los resultaos (más probes con Foro y Ciudadanos arramplándo-yos puestos).

     La xente del agru siempre fue, por natura, muncho más conservadora, impermeable a los cambeos que la de ciudá. 

     Asina que Cherines, sabedora de que nesi cuartu rural se-y va la casa entera, lleva un tiempu volcada a caltener y contentar, a dexase ver y prometer el cielu onde esnalen los sos gaviluetos nel escaecíu, necesariu y necesitáu mediu rural (que p'Asturies, señores, a ver si se-yos mete na mollera, ye too).

     Cherines va a los pueblos como marquesa delibesiana a solliviantar a los sos santos inocentes, a los últimos de les filipines asturianes que siguen teniendo pol corazón d'Asturies. Cherines tien reserváu un día pa ellos, los miércoles, nos que monta na furgo popular como l'equipu A o Scooby Doo, y va visitar esa Asturies que dicen qu'esiste y a la qu’ella asoma’l focicu. L'Asturies de les ales que tán atrofiando pa que nun llevante'l vuelu. Va col vistíu de Ramos y el foulard de Cachemir; sube al tractor como quien sube a los caballitos de la Selmana Negra; baxa pela subidoria l'horru cola elegancia de quien desfila peles pasareles del Senáu; aceuta'l café puro de los centros sociales, y hasta si fuere posible, se dexa ganar al parchís; pregunta ya intercambia carambelinos d'ocalitu coles paisanes y a los mozos garridos entrúga-yos de xuru per ónde queden los topónimos castellanizaos de la nuestra xeografía. Comprueba, pa marchar, que l'agua fluya de los caños, y tea fresquino (sábelo porque-y chisca les dees qu'asomen pelos coturnos) xube a la furgo, diz aquello de, cómo me presta que los planes salgan bien, y manda al xofer que ponga tierra pel mediu. La misión (porque pa ella, defensora del inglés bilingüal, esto ye como dir a misiones) ta cumplida y de la que xube les semeyes a la so cuenta de facebook, a ver na siguiente curva si hai cobertoria, Sebastián, que ye del pueblu, garra adréi un bache que fae que s'espelurcie y añade: «Van tener razón, mileidi, y esta carretera necesita un arreglu».

     Yá ta, pasó la curva. Pue ver les semeyes que'l so comunity manager (el que sabe d'esos tinglaos, vamos) xubió a la cuenta (igual pensabeis que lo xubía ella, bobonos y borbones). Y esta nueche, neses cenes en casa del embaxador, cuando-y entruguen por qué llegó tarde, enseñaráles como rei borbónicu que torna de facer patria de tantes hurdes asturianes: “¡Qué abandonaos tán!”, dirácol biecu heriede de les Dames del Domund Asturianu.

Cherines y l'asturianu

Ye pena que seyan semeyes y non videos. Cuando Cherines fala nesi castellán tan castizu y nada arteficiosu que-y deprendieron nos collegues del área metropolitana, ¿en qué-y arrespuenden a esa marquesa delibiana, a esa prencipesa rubendariana? ¿Falen nun castellanu manchegu?

     Pue ser que clisaos pol so áurea mediocritas-y arrespuendan les primeres pallabres en castellán, víctimes de la diglosia. (Yá, yá lo sé, que tampoco-y arrespuenden nel bable académicu, yá lo sé, repuntantes). ¿Esconderán les sos metafoníes, los sos tiempos verbales, l’allugamientu de los pronomes átonos, el riquísimu léxicu? ¿Cómo pue ser posible que nel país de los milenta bables Cherines pueda falar los miércoles en rutaen toes y cauna de les zones onde diz ella que nun s’entienden ente ellos? ¿Ye que los miércoles apósase enriba d’ella la llingua de Pentecostés? ¿Ye que los falantes del cuartu rural empleguen esa koiné española?

     Pue ser que desconoza Cherines en qué llingua falen los votantes. Pue ser. Porque a Cherines nun-y importa gotera nin lo que-y falen nin lo que-y dicen. Ella va al agru asturianu como'l tíu Gilito diba pañar perres. A ella pónense-y nes neñines, non la señal del dólar, nin del euru, sinón los palombos (uno en cada güeyu) de les papeletes del votu.

    A Cherines nun-y da más en qué llingua falen los sos votantes, mentres la voten. Ella apaezse como’l Marqués de Carabás, pero nun son botes, non, son coturnos (¡ai, por Dios, Cherines, cómo vas dir cuchar d’eses traces!).

     Y por eso nun ta dispuesta a reconoce-yos la voz. Porque pa ella too ta bien como ta (¡ai santina, déxame como toi!) y nun se ve como Feijoo falando en na llingua provincial, nin como l’Arrimadas, falando en secesionista. Cherines nun ta pol asturianu porque teme que si-yos reconoz la voz, -yos reconoza un derechu y claro, yá se sabe, esto de reconocer derechos, nun ta nel so ADN. Entames reconociendo la so llingua y llueu igual van querer opinar. Teme qu'igual en dalgún pueblu d'esos que visita los miércoles, dalgún paisanu s'entere de que la so llingua, l’asturianu, esa que fae por esconder por puru conductismu –foron munchos varicazos na escuela-, esa que lleven falando xeneraciones, ye dalgo col mesmu valir que'l repulido castellano de la señora de la furgo; Cherines esvelase cola escena de preguntar polos melocotones, y que’l paisanu la corrixa y que-y diga que los piescos danse bien esti añu, o que'l pueblu llámase Pe!!uno y non Pelúgano, por muncho que -yos lo aporfiaren nos papeles.

    ¿Qué pretendemos? ¿Reconocer derechos? Entamamos asina y... Igual se nos ponen dignos. Igual quieren separase y formar la República Independiente d’El Pullíu. Otra vuelta'l mieu. Claro. A Cherines y a los diputaos básta-yos colos miércoles. Pa ellos lo qu'en verdá preocupa ye'l tema del llobu (que nun ta pa nada politizáu, non, nin ye populista, y nun da votos) y mantener los baches na carretera pa poder dici-yos al posase lo abandonaos que tán, y qu’o son los baches de la carretera o’l bable. A Cherines & Furgo lo del asturianu da-yos mieu. Porque saben que dominen (anque la maltraten) la llingua A, esi castellanu de senáu y contuberniu. Porque embabecen falando esi castellán que s'esmeren académicu y vallisoletánicu y -yos sal cañí, dacuando nel esfuerzu. Pa ellos ye lo mesmo falar cola xente del cuartu rural que coles vaques rumiantes (sí, dieron un mitín nuna nave de vaques, nun invento nada). Ellos van pa impresionar y dicen: los asturianos nun quieren nada d'oficialidá, anque haya un 53% al favor. Ellos dicen los asturianos quieren esto y colo qu'hai ye suficiente, como aquella marquesa que mandaba dos maestros peles nueches a poner clase a los sos súbditos y cuidaba qu’asina yá taben satisfeches les sos necesidaes. Pa Cherines too ta mui guapo. Ella defende l'asturianu como dicen defender los cazadores a los xabalinos; cree que lo del asturianu ta bien pa pone-y nome al quesu «Ahoga el pollo», y poco más. ¿Pa eso traemos a los bobones y los Borbones al Principáu? ¿Pa esto los premios y la ópera y la zarzuela y la feria d'abril? ¿Pa poder llamar Uviéu a Oviedo?

     Desconfiái de Cherines y de los políticos que dicen escuchar la voz del pueblu y dempués nun saben en qué llingua falen.

L'Academia

     El funcionalismu llingüísticu enseñónos que l’artículu, amás de ser un morfema, yera un actualizador. Actualmente l’Academia de la Lligua Asturiana, l’Academia, tien el futuru colingando d’un filu delgáu y burocráticu, d’un enguedeyu llegal que, como suel ocurrir, paga siempre la víctima.

     Al dicir l’Academia, asina, col artículu, cuento actualizar lo que foi’l meyor llogru alministrativu ya institucional pa la llingua asturiana nos sos sieglos d’historia, el suañu de Xovellanos, de los erúditos del XIX, de los escritores del Rexonalismu…

     L’Academia de la Llingua Asturiana vien faciendo un trabayu científicu axeitáu y amañosu, como diz con sanu arguyu la so presidenta, Ana Cano. Nos sos pocos años d’historia sacó alantre les tres ferramientes del estándar normativu (Normes, Gramática y Diccionariu), amás d’echar andar publicaciones, xornaes, Universidá de Branu y asitiar, col so bonfacer nes universidaes europees el reconocimientu pa una llingua románica a la que sistemáticamente la clas política asturiana ignora, desprecia y marxina; de la que, convién facer autocrítica, parte del so pueblu, parte de los sos falantes faen chancia y s’avergüencen a cuentu d’una diglosia que los medios de comunicación incentiven y alimenten.

     Consiguió ello de la que velaba polos derechos de quien quier usala; defendéndola de los ataques, de los escaezos, ensin importar les sigles. Soportando, amás, les consecuencies d’esi enfotu.

L’Academia de la Llingua Asturiana ye l’ultimu rescualdu d’una llucha que muerre. L’asturianismu llingüísticu, de va tiempu, ta esvertebráu. Y como cualquier organismu ensin vértebres, ye informe, amorfu. Poco áxil. Presa fácil.

     Si dalgo creíemos fixo, seguro; si dalgo llográremos afitar, yera esa institución que poco a poco vio amenorgáu’l so presupuestu, foi arrequexándose inda más…  Agora nesti postrer episodiu llega cuestionase incluso la so naturaleza xurídica. Faciéndola feble, domestícase.  Una Academia fuerte ye una Academia independiente.

     L’asturianismu ta a puntu de perder  l’únicu elementu vertebrador que nos queda, la talaya dende la que mirar un ámbetu pa la nuestra llingua, pa la parte más vieya del nuestru patrimoniu inmaterial.

Pa una llingua que nun ye patrimoniu esclusivu de los asturianos si non, que como  toles llingües, ye patrimoniu de la humanidá. 

Amontonase

La llingua plasma los usos y vezos culturales de la sociedá. Val d’exemplu l’emplegu del llinguaxe non sexista en busca la igualdá nel idioma (esa proliferación de bomber@s, de  paisanu/-a, de lxs, neñxs…)

            El cambéu social y cultural arrambla con pallabres qu’enantes se dicíen y agora non tanto. Una d’elles ye “amontonase”.

            Enantes yera un estáu civil poco avezáu –quiciabes más de lo que supongo-, sancionáu socialmente col usu de la pallabra.

Ún podía ser tolo anticlerical que-y peteciere, y cantar la internacional puñu n’altu a la tercera cacipla, pero eso nun taba reñío cola decencia, y nel asuntu del cohabitar, había facese como Dios mandaba (anque se-y negare la existencia).

            Si daquién se separaba (o vivíen estremaos, como dicen per La Bárgana) y s’arrexuntaba; si daquién marchaba (¡¡gritu nel cielu de la familia!!) cola pareya a vivir ensin pasar a echar la robra pela casa parroquial, naquelles conversaciones qu’entreteníen les atristayaes tardes de tele con dos canales (y ún yera la UHF), dicíase pelo baxo que taben amontonaos.

            “¿Nun sabes Fulanito y Zutanita –evito lo de Fulanita pol chiste fácil- viven amontonaos?”, marmuriaba Purines de la que venía de la frutería col cabás atarraquitáu y la mesma dilixencia en contalo que’l corréu del zar.

            Les primeres vegaes la pallabra resultábame chocante. Yo namás conocía’l significáu (ensin malicia nin doble sentíu) de poner una cosa enriba la otra, y aquel otru xuegu nel que gritando “¡¡Al montonín!!”, escorríemos a daquién y echábemonos enriba hasta aplachalu, xuegu que güei taría sancionáu pola moderna pedagoxía y les autoridaes llegales, fiscales y paternomaternales.

            Asina me los imaxinaba yo, viviendo nuna casa pequeña, nun amontone continuu, entamanaxs, malcuriosxs, amontonaos.

            Agora la pallabra nun s’usa. Pero non porque esa realidá desapaeciere. Tolo contrario. Nun s’estila porque son tantxs lxs amontonaxs (en qué familia nun hai ún o una) que se prefier esi eufemismu de “viven xunt@s”, que queda como más fino y más curioso. Xuntos, pero non revueltos. L’amontone yá nun ye lo que yera.

            Güei Purines vendría escandalizada, los güeyos arremellaos xuxuriando la causa del desconciertu: “¿Nun sabéis que Zutanito va casase con Fulanita?”

Prestoses fiestes

Maxinémonos un folletu de propaganda turística d’Asturies. Pero envede traer l’Urriellu, los bufones de Pría, Gulpiyuri, Redes, Muniellos, trae la Gran Muralla China, el Monte Fuji, la Estatua de la Llibertá, la Sagrada Familia, el Parthenon, el Taj Mahal.

Maxinémonos un recetariu de gastronomía asturiana, namás que col cuscús, les pizzes italianes, el ratatouille francés, el sushi xaponés o la paella valenciana.

Maxinémonos un dossier de xente illustre d’Asturies, pero envede Xovellanos, Clarín, Ochoa, la monarquía asturiana, saliere Gandhi, Einstein, el Che Guevara, Mandela o el últimu mandarín de la dinastía tercera del imperiu chinu.

La felicitación políglota.

¿Qué pensaríemos? ¿Representaríanos? Nun respuendan tan rápido.

Maxinémonos, agora, una felicitación del Presidente d’Asturies, escoyíu pol entendimientu de dos partíos políticos, que felicita les navidaes en catorce llingües y nun tien en cuenta la llingua milenaria d’Asturies.

Sí. Pasó. Llamentablemente. Nes llingües ta l’alemán, el francés, el griegu, el castellanu, l’italianu… Menos l’asturianu.

Paez ser qu’una vez más el nuestru representante s’escaez de nós. Nun lu hai que culpar: anda esmolecíu col problema catalán y busca unidá de destín común de la qu’Asturies s’esgoncia cada vez más; esmolezse col mediu ambiente y grava con un céntimu l’usu de les bolses de plásticu de la qu’Uviéu y Avilés tienen alerta por contaminación y los mentes preclares del so partíu aguarden como mures pa poner la gasificadora, la incineradora ya inundar Caliao col banzáu; atérralu, como bon ciudadanu del mundu, el peligru d’estinción de les ballenes y de los elefantes monárquicos, pero nun mira pal plan de conservación del osu y del gallu montés y si pudiere, ¡¡ai del llobu!!

Don Javier Fernández, esi mierense de Somió, vive nun estáu santateresianu, nun “ vivo ensin vivir en min”, nun “muerro porque nun muerro”, esperando tan alta política; medita y siente como princesa rubendariana y modernista, amurniáu como alondra bella, y la FSA entrúgase (nesi amestáu tan íntimu que gasten los sos miembros y les sos miembrereses):

“¿Qué tendrá’l nuestru Javierín?”

Porque don Javier, de Requejo de Cagüeñes, ye un home de profundes paradoxes, un líder asturianu pero pal mundu; un republicanu fondu con más fonda llealtá a la corona; un socialista neolliberal; un políglota mudu; un dientro pa fuera y un fuera pa dientro.

Y asina sabe que, con eses paradoxes, con esi mundu interior tan complexu (que non acomplexáu), si fala asturianu igual nun lu entienden. Y asina, por eso namás, tien que falar en catorce idiomes (de los que dalgunos duldo que sepia hasta de la so existencia).

Don Javier pasa del mutismu absolutu a un poliglotismu que lu fae paecer tocáu de la gracia divina o paecer un endemoniáu (que namás-y quedó felicitar en sánscritu, pámique) a la espera del padre Carrán pa que lu asperxe del agua bendito.

Y too por esa necesidá de llegar, de facese entender que nun consigue col asturianu.

Sicasí, agora hasta l’últimu chinu de la República Popular China se siente reconfortáu porque don Javier, esi presidente magnánimu y pentescostianu, -yos desea bon añu (anque seya’l del Cuélebre o’l del Cachiparru y venga a destiempu, que l’añu chinu nun ye agora). Esi chinu (o esa china) diría –si lo que trae nos ideogramas ye eso y non “too a un euru”): yo si pudiere escoyer presidente del partíu comunista chinu, escoyeríalu a él.

Don Javier sabe qu’hasta’l últimu francoparlante de Francia o de Canadá sabrá d’él. Hasta l’últimu griegu machacáu por esa crisis de la que don Javier y los suyos son parte (escueya’l llector de si lo son del problema o de la solución) mirará con aliendu anovao los recortes de la troika y dirá, “polo menos, don Javier Fernández, de Mieres del Camín del Xixón del alma, deseóme felices fiestes y bon añu pa siguir sufriendo esti embargu.”

Yo creo que’l nuestru presidente, con destín universal en la unidá constitucional, representa atol mundu y a toles cultures sacante a quien fala asturianu. Yo creo qu’a los sos asesores-yos va la marcha (¡¡qu’esto yá pasare con Sanjurjo, carape!!) y que nun tomaren nota, namás significa una cosa (aparte de que-yos presten los dèja-vu): que-yos la trae floxa floxísima l’asturianu. Que yá nos lo dicía’l presupuestu. Que’l plan de dignificación propuestu y robláu ye porque creen que la llingua asturiana y la xente que la fala ye (somos) tan indigno qu’hai qu’entamar esi procesu. Que la meyor forma d’acabar col procesu de diglosia ye desaniciar el patrimoniu inmaterial d’un pueblu.

Señores asesores, sé que lo faen a lo foíno. Pero anoten: incluyir l’asturianu ente les catorce llingües llámase normalización a coste ceru; ponela enriba, la primera, llámase compromisu mínimu; incluyila destacada llámase rendimientu diferencial, (llámase saber aprovechar lo propio pa tar y ser nel mundu).

Pero penriba de too, anoten, la felicitación de don Javier (con jota aragonesa) Fernández de Oñón, namás significa incompetencia. La mesma que ta depauperizando Asturies; la mesma que ta condergando a una xeneración al exiliu del país.

El presidente universal que debiere selo de tolos asturianos ye namás presidente de los asturianos que falen en castellán.

A los demás, yá se sabe, niégasenos la pallabra, la existencia. Ódiasenos con una rensía paraniodesquizofrénica paquidérmica.

            Nun hai problema. Tamos avezaos, señor Javier de Castillo de Somió.

            Prestoses fiestes y bon añu 2016. Un añu más onde celebrar que la llingua asturiana vive y que la cultura que la fala sigue en camín.