Capítulu XII La vida ye como una caxa de bombones

Capítulu XII

La vida ye como una caxa de bombones

(Salitina de casa SIMÓN. Pela parte d’atrás del sillón oreyeru asoma la calva de SIMÓN y una mano que garra’l mandu de la televisión. Fae zaspios camudando la canal. Nuna d’estes, dan les noticies de la TPA. Dexa’l mandu nel reposabrazos y escúchase al llocutor)

LLOCUTOR: Anueche nun fue una nueche tranquila nel popular barriu del Serrallo y nun fue una nueche tranquila, dicimos, dempués de qu’un camión de la basura volcare pol pesu del contenedor. Al estrueldu del camión de basura siguiólu la voz d’alarma que dieron los trabayadores muncipales ante lo que paecía ser un atentáu con ardiluxos caseros… Ello fexo que dispositivos de la Policía Nacional y de los TEDAX se desplazaren. Tien más información la nuestra reportera, Mariana Robles… Mariana, escuchámoste.

MARIANA: …too comenzó anueche, nel popular barriu del Serrallo, cuando equí nesti contenedor, daba cama un camión de la basura al tentar vaciar un contenedor. La sospresa fue mayúscula al ver lo que contenía: media docena de bombones con cinta d’embalar, polo que, pensando que podía pertenecer a dalgún grupu terrorista, llamaron a la policía nacional.

(Escena testimoniu de TAULFO, con palillu na boca y camisa desabotonada)

TAULFO: Yo qué sé, sí, fue ayeri… Sintióse un españíu, ¡¡PUMM!!, como cuando tiren un volador, y digo yo, vaya comedia, estos nun s’enteraron del confinamientu y faen espicha, pensando que yera pa Sanamiés, porque a ver, que yo nun digo nada, pero los que mercaron oricios y cocieron güevos, ¿qué diben facer?

(Escena testimoniu d’AMPARÍN, paisana ruina gafes de pasta arreglaes con esparadrapu, pela cera, paseando a Miss Daisy)

AMPARÍN: ¡Ai, fía! Tábamos en casa y ¡¡¡pooom!!! Un golpetazu… ¿Tu sabes? Y asoméme y vimos a los del camión echando les manes a la cabeza, y dando berríes (lladra’l perru, un ratoneru que nun llega con cruce de Chiuaua y aguarón, güeyos de vaca llambiona birolos del too y tira de la correa) Mis Daisy, ven… Compórtate… Lo que te digo fía… Esti barriu ta poniéndose imposible pa vivir. A ver si entra’l virus esi y fae un poco llimpieza, porque falta fae…

VECÍN: (Voz n’off dende la ventana) Amparín, ¡¡va llevate’l bichu a ti primero, muyer!! ¿Cuántes vegaes caga’l to perru al día?

AMPARÍN: (Nerviosa ya indignada) ¿Veslo, fía, veslo? Xentecaya, puro… Vamos Miss Daisy, vamos…

(Retómase la conexón)

MARIANA: Los dispositivos de la policía nacional averáronse llamaos polos propios trabayadores del conceyu al entender que podía tratase d’una bomba de fabricación casero. Equí, nos ochenta, xurdió un grupúsculu que pidía ser barriu llibre asociáu de Sotrondio, Serrallo Llibre, que se dedicó a boicotear les fiestes, faciendo coincidir les del barriu coles patronales y reivindicado los nabos como platu orixinariu d’equí. Temíen que cola nueva situación d’incertidume volvieran a les andaes…

(Imaxe entrevista de YOPLÁI, tien la voz pausao y chungo de la xente qu’atravesó los ochenta y parte de los noventa a caballu, chándal de tactel y debaxo camiseta de tira del economatu, sobeteada. Corte de pelo a lo McGiver y pendiente d’areta con un crucifixu.)

YOPLÁI: A ver, bueno, pos que sí, qu’a eso de les nueve o asín empezó a vese movimientu, pero bueno, ¿sabes?, esti ye un barriu mui amigu de los picolos y de los maderos, munchu-yos debe gustar que tol día ensamen perequí, asín que vamos, yo pensé que era una movida d’eses d’aplaudir, ¿sabes? y salí y canté-yos, resistiré, asín, en versión metalera, y con los cuernos, ¿sabes?, pero ensin ánimu nengunu d’ofender, pos namás como tributu… ¿sabes? Y me diz uno de los putos picolos, asín, en plan chungu, que me meta pa la puta casa y tranque les ventanes que m’arrevienta, ¿sabe?, a ver, que porque tenía’l día tranqui… ¿Sabe? Asín qu’eso fici, pero enantes metéme glayé viva la guardia civil y los mozos de cuadra, plan puñu en altu, ¿sabe?, que sé que -yos ruempe el alma… Y vamos, porque no sé ónde lo tengo que si non, ponía-yos un tema guapu de Kortatu… ¿Sabe? O de los Negu, que como canten en vascongáu escuez-yos más, ¿sabe?

(Voz n’off del VECÍN)

VECÍN: ¡¡Anda, Yoplái, tira pa casa!! Que como te vean esos dientes tos estremaos vas espantanos el turismu, cabrón, lo tuyo con fociquera tenía que ser pa siempre…

YOPLÁI: ¡¡Vete a la mierda, cabrón!! ¡¡Tócame los güevos que vas a ver cómo te tatuo primero el coche y ya después la cara… Que sabes que tengo una navaya que paez una katana de los chinos… (Aselando) Pero que vamos, esto, aquí, na de nahhh, esto ye un barriu tranquilu… Vieyes, paisanos… Si’l más yogurín soi yo, que por eso me llamen el Yoplái…

VECÍN: Tira pa casa qu’entovía vas cobrar y pasar la nueche en cuartelín, zamarru…

YOPLÁI: ¿A min? A min vais comeme los güevos per detrás, ¿oyisti?

(Vuelve la conexón)

MARIANA: Nostante, el comisariu tuvo a bien dar parte a los Tedax y acordonar tola zona.

COMISARIU VALLEYA: (Corte marcial y estiráu, uniforme enllenu de perendengues y falando como surniando les últimes sílabes) Recibióse parte y desiguida llevantóse un atestáu de sitiu. Media docena de bombones con cinta d’embalar y cables sueltos ficiéronnos pensar que podía tratase d’una serie d’artefactos caseros, que los del Serrallo Llibre decidieren entregar les armes, o peor, que podíen aprovechar esti contestu de crisis internacional pa semar el caos, y claro, yo al llegar vilo vlaro: yera un asuntu de los tedax, y más en cuantes que nos dixeron que vieron a un encapucháu pela zona…

MARIANA: Al paecer dalgunos vecinos alertaron a la policía de qu’ente ún home y media docena fueron vistos acercándose n’actitúes rares al contenedor.

(Corte p’Amparín)

AMPARÍN: Sí, fía, sí… Diben encapuchaos, cola fociquera, qu’a ver, la bona xente nun tien problemes en llevala pero esta xentecaya, dime tu a min, ¿pa que lo lleva? Dalgo, dalgo tendrán qu’esconder… Esti ye un barriu d’asesinos: con dicite qu’intentaron una vegada matame al perru..

ATAULFO: (Dende’l balcón) Yeren los vecinos, home, que diben tirar la bolsa basura, namás… Amparín, di-yos quién mató a Kennedy… Si esti ye un sitiu tranquilu, aburríu pordemás… ¿Nun veis que nun hai un chigre en tol barriu?

MARIANA: (Otra vuelta delantre del portal de la casa del Serrallo) Nostante, nosotros, redacción, nun llabor d’investigación, dimos cola persona que presuntamente, y digo presuntamente, baxó les bombones, un señor que diz qu’actuó asina por mandatu espresu y siguiendo órdenes del conceyu…

(El planu agora enfoca a SIMÓN, a la puerte, con fociquera y un cayáu)

SIMÓN: A ver, tu, de la cayada p’acá, nun pases, que cobres. Anduviesteis con unos y con otros y a saber si taréis enfestaos o non… ¿Qué ye lo que queréis?

MARIANA: ¿Ye verdá que fue vusté la persona que tiró les bombones? El testimoniu de dalgunes vecines asina lo afirmen…

SIMÓN: Mecagüen la Rosalinda y l’Amparín… Vamos ver: yo fici lo que fici por mandatu del conceyu, del chaval d’obres.

MARIANA: ¿Cómo? ¿L’Ayuntamientu pidió-y que tirare seis bombones de butanu a un contenedor?

SIMÓN: Pues sí. Y tengo pruebes. Dende qu’una vez me l’armaron agora rexistro les sos llamaes nesta cinta. (Saca un radiocassete de cinta del añu la polca y da-y al play presta. Na tele la pantalla ponse fixa con una semeya de Serrallo. Embaxo, en negro, van trescribiéndose la grabación ente SIMÓN y l’operariu del ayuntamientu)

SIMÓN: A ver, ho… ¿eh?

OPERARIU: Bonos díes…

SIMÓN: A ver, ho, ¿ye obres?, mira ye que tengo bombones y nun sé qué facer.

OPERARIU: ¿Cómo ye, ho?

SIMÓN: Bombones, tengo bombones… ¿Nun ye obres?

OPERARIU: Sí, y l’obrador de La Palermo… (Cuelga. Tonu.)

SIMÓN: Oye, que se cortó… Entós, ¿qué fago?

OPERARIU: ¿Qué fae de qué?

SIMÓN: Tengo’l balcón enllenu bombones. ¿Qué fago? ¿Pasáis a recoyer o non?

OPERARIU: Oiga, mire, nun sé si ye una broma o qué, pero ta l’asuntu seriu con esto del confinamientu… Porque esto ye un confinamientu, non un confitamientu. Si tien bombones, allá vusté, como si tien bombes de meregue en váter y piononos pelos cuartos…

SIMÓN: ¿Y nun me dais razón? ¿Qué puedo facer?

OPERARIU: Venda…

SIMÓN: ¿A quién? Ya -yos pasó’l tiempu…

OPERARIU: ¿Caducaron?

SIMÓN: Home… Tienen hasta verdín…

OPERARIU: Pues entós, al contenedor…

SIMÓN: ¿A cuál? ¿Al de reciclar?

OPERARIU: ¿Cómo se van reciclar? ¡¡Al gris!!

SIMÓN: Asina, ensin más…

OPERARIU: Home, pues pone-yos la caxa collorada de Nestlé o esperar que venga l’embaxador a celebrar la fiesta cola Preysler…

SIMÓN: O sea, qu’al contenedor… Ye que paezme raro…

OPERARIU: Más raro ye que tenga bombones con verdín en balcón y que nos llame pa ver qué fai…

(Devuélvese la conexón a Mariana)

MARIANA: Na casa conceyu declinaron facer declaraciones, aunque reconocieron qu’esa conversación telefónica prodúxose. Simón, el vecín que tiró les bombones, ratifícase…

SIMÓN: Vamos ver, cachindiela y nun fago baxar tolos santos porque ye pa la tele y nun quiero que digan mira esi home qué burru, pero ye verdá: yo soi un home de partíu y un ciudadanu exemplar. Llamáronme tres veces pa una mesa electoral y fui; y les que non, de vocal pol partíu: llamo a la casa conceyu y dícenme esto, pues esto. Acato les normes: ¿nun nos dicen con fociquera? ¡¡Pues con fociquera tol día!!

MARIANA: Pero… ¿Y la cinta d’embalar?

SIMÓN: Coime, moza, p’amarrales a esti troli. ¿Qué queríes? ¿Qué les baxara a llombu cola hernia que gasto? Ellí dempués cortaba la cinta con una navayuca y hala… Al contenedor…

MARIANA: Poco a poco’l barriu paez que vuelve a la normalidá y la xente vuelve al confinamientu normal (Apaez Rosalinda sacudiendo les alfombres y dende’l cuartu asómase’l YOPLÁI)

YOPLÁI: Moooza, ¿quies qu’andemos?

AMPARÍN: (Confidencial) ¿Y quién dicís que fue? ¡¡Maaadiós!! ¡¡Malamán!! Esi fue’l que tentó d’envelename’l perru… Simón… Mal bichu, mal bichu… Tenía eses bombones ehí p’azota-yles a daquién según pasaba, seguro… ¡¡Ai, Miss Daisy!! Tuviemos enriba la bombona de Damocles ensin lo saber…

(Planu Cenital. El brazu mueve’l mandu y apaga la tele. Enfócase agora a Simón, con cara de circunstancies. Enriba’l costazu apaez, nun plof, el SIMÓN DEMONIU)

SIMÓN DEMONIU: ¡¡Mira que te lo alvertí, Simonín!!  Si l’amor llama a la to puerta, echa-y doble llave y la pesllera, home…