Capítulu XV. Lo que necesito, sélo yo.

Capítulu XV

Lo que necesito, sélo yo

(Capítulu dedicáu a Pili Fidalgo, nel día del so cumpleaños... Nun hai númberos romanos pa llevar la cuenta)

(Carbonera de Serrallo. Entra SIMÓN. Lleva’l calderu de la esllava y pica a la puerta del fíu.)

SIMÓN: Á guah.e, ¿tas ehí?

NINI: Non, si te paez, salí a dar una vuelta… ¿Ónde coyones voi tar, papa?

SIMÓN: Nun te quexes que güei tráigote comida latina.

NINI: ¡¡Hosties!! ¿Unos tacos? ¿Cebiche? ¿Asáu arxentinu?

SIMÓN: Nomenón… Una latina de verigüetos, una de muxones gallegos n’escabeche, unes parrochines… Latines de too… Y embutíu ibérico…

NINI: ¿Xamón? ¿Cecina de lo de Zequiel?

SIMÓN: Non. Salchichón y chorizón de revilla, que ye pura maravilla…

NINI: Mira, papá, si nun muerro del coronavirus, vas matame tu de colesterol.

SIMÓN: Esto ye colesterol de lo sano, home, que nun tien güevu… Y de postre, unes pastes. Mira sé que siempre nos pegamos poles de chocolate y poles de la zreza escarchao en medio, asina que… Tráxiteles pa ti… Tén cuidáu, qu’esmigayen toes… Voi pasate tamién agua. (Saca una garrafa y enchúfa-y una goma pa que pase. NINI chupa de la goma y va pasándola a una botella)

NINI: Papa, ¿quédame muncho?

SIMÓN: Dos llitros…

NINI: ¡¡Non!! De tar equí…

SIMÓN: Coime, sabráslo tu… ¿Nun vas marcando los díes con rayines na parede?

NINI: Non, ¿cómo voi facer eso?

SIMÓN: Vaya mierda presu que tas fechu, fíu. El primer mandatu d’un presu ta en fugase… Pero, claro, pónenvos una televisión y yá ta… Si al Conde de Montecristo-y punxeren una tele, la novela duraba un santiamén… Ai, fíu… Nin pa presu vales…

NINI: ¿Qué te pasa, papa? Nótote raru… Tas como mui… Nun sé, gachu…

SIMÓN: (Empapiella la voz) ¡Ai fíu! Estos díes dime cuenta del pufu que fui como padre. Nun sé. Yo trabayaba muncho y llueu diba a l’asociación, o al chigre, o a la casa’l pueblu… Venía pa casa y claro, contaba que to madre s’ocupaba de ti…

NINI: Bono, home, mama siempre me preparaba la merienda. Incluso si marchaba dexábame’l pinchu de fuagrás enriba la mesa.

SIMÓN: Caro, pero bono… Nun sé. De primeres entamasti a dar guerra coles notes. Llamábennos d’escuela, que traficabes cola plastilina, o del institutu y claro, yo nun podía dir, polo de los turnos y to madre, bueno…

NINI: A ver, papa, mama facía lo que podía. Ella diba y reñía a los profesores… Yera de les que dicía que si daba primero dabes dos veces. Enantes dicir ellos nada, atacaba…

SIMÓN: Yá, pero igual los mayestros teníen razón. Una vegada to madre vieno pa casa sulfurada y quixo denuncialos… ¿Alcuérdeste?

NINI: Sí, porque rayémos-y el coche al de física que nos tenía apolmonaos cola formulación y nun nos quería dicir cómo s’ellaboren les pastis…

SIMÓN: Alcuérdome qu’aquel paisanu, cuando lu fuimos a ver dixo que si nun t’enveredábemos, acababes en Villabona…

NINI: Aquel puntu yera mui esaxeráu…

SIMÓN: Bono, non tanto… Mírame equí, faciendo un vis a vis contigo. Envede en Villabona, na carbonera, pero lo que ye, ye… Yo creo que necesites una figura materna y paterna, Nini. Nun sé. Castiguémoste poco, cuento yo. Y agora claro… La varina que nun s’adoma de pequeñina…

NINI: Home, papa, llega un poco tarde… Anque tenga la ESO pa sacar, coime, que yá soi grandín… A ver si ye qu’agora vas adeprendeme a andar en bici.

SIMÓN: Creo que necesites tener unos bonos pas de referencia… Voi dir pelándote unos kiwis y pasándote les tayadines per baxo, ¿val? Qu’esto ye pal tránsitu intestinal como’l peaxe’l Güerna.

 NINI: (Asustándose) Vamos ver, papa, ¿de qué va esta movida? Esta ye una recatafila d’eses tuyes qu’eches cuando tienes dalgo pensao dafechu y nun sabes cómo dicilo, un rollu d’esos tuyos que faes como que nun los tienes pensao pero enguedéyeste y das más vueltes qu’un perru a la d’echase… ¿qué pasó? ¿Qué? ¿Vas dame n’adopción?

SIMÓN: Fíu, la nuestra siempre foi una familia desestructurada, d’eses que dicen agora. Hai que pensar en da-y forma…

NINI: Como nun garres un cortafríos y una radial.

SIMÓN: Yo nun puedo dame, fíu… Equí tamos tu, que tienes que sanar, y yo, que tengo que cuidate, pero fáltanos una figura materna… Ye que nosotros somos mui matriarcales. La nuestra sociedá, anque te paeza que non, ensin el gobiernu d’una muyer en casa, esfarrapla…

NINI: ¿Vas dir a buscar a mama?

SIMÓN: Yá sabes que punxi detectives a buscala y que me denunció por acosu, fíu… Busquéla pel facebook y bloquióme…

NINI: Meca, papa, ye que nun se t’ocurre más que a ti canta-y les cuarenta y pone-y la semeya d’ella col cantar de David Civera, "Que la detengan…"

SIMÓN: Tu sabes que to madre fizo que m’echaren de cuásique tolos llaos: venti años preparando les fiestes y echáronme de la Xunta directiva…

NINI: Echáronte porque ficisti firmar a Ráfaga, callandino, una cláusula pa que-y dedicaren el cantar d’”Engañadora”… Nun te fagas el pitín…

SIMÓN: Sabes que lo de to madre y mío yera una relación toxina.

NINI: ¡¡Tóxica!! Papa, dizse tóxica…

SIMÓN: Bueno, y enllena tosines, que yera venos pela casa y danos allerxa… Los últimos venticinco años nun foron los meyores…

NINI: Si tuvisti diecinueve con ella… Y va pa seis que nos dexó… Pero, ¿qué ye? ¿Qué nunca vos quixisteis? ¿A cuenta de qué vos casasteis, entós?

SIMÓN: Lo nuestro fue un amor d’orquesta, fíu…

NINI: ¿D’orquesta? ¿Quedrás dicir orquestáu?

SIMÓN: Non, d’orquesta… Primero toquemos la trompeta y llueu yá vieno to madre col bombu… Ehí tuviesti muncho que ver, Nini.

NINI: Claro… O sea… Que dientro’l bombu diba yo…

SIMÓN: Por eso, fíu… Y de tanto chunda chunda, salisti, atronicáu… Pero ye hora de que tou esi sufrimientu s’acabe… Too tien un ciclu. El ciclu de la vida, como nel Rei Lleón; el ciclu de Quini, el de Guardiola, el d’Abelardo, el de Preciado, el de Van Gaal…

NINI: Papa, ¿nun fadrás una llocura, eh? A ver, que yo nun sufro… Mama marchó y yá ta… Allá ella… Dacuando en vez mandaba una cartina pa min, pel cumple, dába-y un me gusta a dalguna semeya mía en facebook… A ver, maternidá na distancia, asistencial…

SIMÓN: Esi ye’l problema, Nini, que siempre foi una telemadre. Ye como los de la telecomida. Si lo necesitabes, pues llámeslos, gárrente’l teléfonu cuando -yos peta, y cuando llegaba, taba rancio, comíeslo anque nun te gustares de tanta fame que tienes… Yera un amor de madre acartonao…

NINI: Bono, ye lo qu’había. Pero, ¿nun tendrás pensao matate? A ver, piénsalo bien: yo toi a favor de la eutanasia y tal, pero piensa en min un poco…

SIMÓN: Lo que voi facer ye pensando en ti, fíu, espero que lo tengas presente… Fágolo por min, pero tamién por ti…

NINI: A ver, que si lo tienes decidío y tal, pues bono, lo único que… (Como si sufriere una revelación) ¿Sabes si me queda de la pensión tuya? A ver, qu’una madre ye sagrada, pero la pensión yelo más…

SIMÓN: ¿Quién ye a pensar eso cuando lu atrulla’l corazón? Llevo díes ensin dormir, alloqueciendo… Fágolo, nun lo fago; fágolo, nun lo fago…

NINI: Bueno, tu, lo que quieras, pero dexa dicho onde toi…

SIMÓN: (Ta a apuntu de llorar) Lo único que me para yes tu…

NINI: Papa, si lo tienes que facer, fáelo… Pero déxalo too atao y bien atao, y la puerta abierta…

SIMÓN: Pero voi facelo… Voi facelo por ti, ¿oyisti? Porque lo que necesites, sélo yo… (Recueye too y va saliendo de la carbonera)

NINI: (Xuxuria) La puerta abierta, el pisu y un poco paga, papa…

SIMÓN: Necesites una ma… Y voi dátela.

NINI: ¿Qué dices? ¿Cómo me vas dar una ma?

SIMÓN: Y una güela, esta vien con güela nel pack, ¿qué te paez? Al dos por ún… Y nun creas que, si llego a tiempu, igual hasta un hermanín, o una hermanina… Yá ta, fíu, ya te lo dixi… Trayía un papáu… Lo que necesites, sélo, yo: amor, responsabilidá….

NINI: ¿Qué ye, ho?

SIMÓN: (Xubiendo escaleres arriba y apagando la lluz) …y lo que necesito, sélo yo tamién: a Marivines la del terceru. Y nun hai quien me pare, fíu, nun hai quien me pare…