Capítulu II. Aplausos, por favor.

Capítulu II

Aplausos, por favor

(Pisu de la Barriada de Serrallo. Planu detái de la mirina de la puerta. Camuda la lluz. Entiéndese que daquién al otru llau ta mirando. Planu detái d’un güeyu apestañando. Planu traseru d’una muyer en bata mirando pela puerta. La cámara va acercándose y xubiendo hasta consiguir un PLANU CENITAL. Darréu, vista suxetiva -ye dicir, veríemos lo que ta viendo ella: el descansín de la escalera deformáu pola mirina. La puerta vecina que s’abre y una muyer azorada, col fociqueru quirúrxicu enllenu sangre y un bultu traponeru nes manes, sal de la casa y echa a correr escaleres arriba. Dende la escuridá, la figura de SIMÓN apruz, sigue a la muyer cola mirada y mira pa la puerta d’enfrente, dándose cuenta de que lu tán achisbando. Ciérrase la puerta. Suena doble vuelta de llave y pasador)

ROSALINDA (Entra na salitina onde l’home ta lleendo faciendo’l crucugrama del pariódicu, con unos lentes rectangulares, d’esos de visión cercana, y un boli de publicidá “LA TAYUELA. COMIDA CASERO APRECIAO NEL MUNDU ENTERO. ESPECIALIDÁ EN CALLOS Y NABOS”,): ¡Madiós, Taulfo, lo qu’acabo ver!

TAULFO: (Ensin dexar de mirar el periódicu, indiferente) A ver, sospréndime.

ROSALINDA: (Siéntase al pie d’él, palmotia nes pates) Madre, nun sé, tán pasando coses rares… El vecín, Simón…

TAULFO: (Col tonu impasible) ¿Qué pasó con Simón, muyer? Tiénesla con él…

ROSALINDA: Una muyer, creo que yera Mariví, la del terceru.

TAULFO: A ver, ¿Simón o Mariví? Aclárate… Que se me van cruzar los datos colos del crucigrama.

ROSALINDA: ¡¡Los dos!! Abrióse la puerte de Simón y salió Mariví…

TAULFO: Sí: ye lo que tienen les puertes, sirven pa entrar y pa salir…

ROSALINDA: ¡¡Col focicu enllenu sangre!! Déxate de gaites y atiende.

TAULFO: (Llevantando la mirada percima los lentes y asonsañando plasmu) ¡¡Madre!! Mariví ¿Quies dicime que ye una vampira…? Y Claro, foi a pol vecín, porque-y gusta muncho el tetabrick de Don Simón…

ROSALINDA: (Engrifada) Eso, eso: tu ríete de min. Pero equí ta pasando dalgo.

TAULFO: Sí, que te tas volviendo lloca y quies apegámelo. Vamos ver, dende que volvimos de la estación d’autobuses de Mieres tas asina, como más alloriada.

ROSALINDA: Taulfo, nun empieces…

TAULFO: Non Rosalinda, nun empieces tu. ¿Qué te pienses? ¿Qu´a min nun me fastidia tar equí, en casa, encerraos, pudiendo tar en Benidorm? Y agora a ver si nos devuelven les perres los del INSERSO… Pero si tas cabreada, nun la entames col vecín…

ROSALINDA: ¡El guah.e! Va tiempu que nun se ve al guah.e, nin lu sentimos…

TAULFO: Meyor, ¿non? Siempre andabes quexándote de que ponía la música al alto la lleva y agora, ¿quéxeste de nun lu sentir?

ROSALINDA: (Falando como pa sigo) Simón nunca me dio bona espina… Intentó matar a Miss Daysy… Díxomelo la d’Antromero.

TAULFO: Mira, el perru esi, esa ruindá que paez un aguarón, ye un cafiante y un amargáu,  como l’ama… Y tiróse-y a mordélu, a él y a toos. Amás, lo de la esternina nun ta comprobao que fuere Simón.

ROSALINDA: El primer día, a la de volver de Mieres, cuando tabes a llevar les maletes a la cochera, vilu antroxáu. Venía como de pescar na ducha y fregar platos ellí… Y amás, ¡¡baxa tolos díes a la carbonera con un calderu!!

TAULFO: ¿Y? ¿Prohíbelo l’estáu d’esceición? A ver Perry Mason, llamamos a la policía pa dici-ylo: ¿Policía? ¿Sí? El mio vecín que baxa tolos díes a la carbonera… Sí. ¡¡Con un calderu!! ¡¡Ta tizando percima de les sos posibilidaes!!

ROSALINDA: ¡Qué fatu yes, de verdá! ¡¡Que tien gas ciudá!! ¿Pa qué quier el carbón, eh?

TAULFO: Tará poniendo el nacimientu… A min qué me cuentes…

ROSALINDA: Pero baxa escondíu: aprovecha lo de los aplausos, a les ocho, pa dir al sótanu. ¿Nun te paez raro que nun salga al balcón a aplaudir?

TAULFO: Mira, Rosalinda: dexa al probe Simón en paz. Al marchar la muyer, cola que nun te llevabes, anduvisti contando perehí que de xuru que la matare y escondiere’l calabre, y elprobe vieno a llamame l’atención a min, que bastante yera que lu abandonare la muyer pa que-y sacares llevantos…

ROSALINDA: La muyer nun apaeció.

TAULFO: Ye lo que tien la xente qu’escapa, Salindina. Que nun suelen volver. El probe col disgustu y tu sacándo-y llevantos. Por culpa vuestra, Simón y yo, que yéremos bonos vecinos, distanciémonos. Yá nun sacó más l’abonu del Sporting pa nun coincidir comigo.

ROSALINDA: Eso yera la muyer, que nun lu dexaba dir… Menuda bicha…

TAULFO: Agora, que si desapaeció’l guah.e. De primeres, cuando la neña y él refrescaben, garráste-y una tirria al rapaz que nun yera normal, hasta que lo dexaron.

ROSALINDA: Miraba pola neña, porque esi nun ponía traza d’estudiar nin de nada… Amás, coles compañíes que gastaba…

TAULFO: Yá. Pero fízote’l culu pesicola cuando t’enterasti de que taba con un salmerón de los de La Montera, home, claro, siendo de Sama. Y agora ta viviendo él, con esi músicu que tocar toca en condiciones namás que los…

ROSALINDA: ¡¡Taulfo!! Un respetu al Toni, que pue ser el to xenru…

TAULFO: El Suzuki. Vamos ver, Rosalinda: un gaiteru, como Valiente, pase; un tamboriteru, como lo yera El Machacón, pimpanudo, fiestes romeríes, pasucáis…; un d’esos que toca la batería, l’órganu, la guitarra pa emplease nuna orquesta, fenómeno. ¡¡Pero tocar el Suzuki!! ¡¡Que ye un coche, hosties!!

ROSALINDA: Bouzouki: llámase bouzouki.

TAULFO: ¡Bouzouki! El bouzouki ye un llanzacuhetes, como los de les güelgues, pero en sofiscicao. ¡¡Qué sabrás tu!!

ROSALINDA: ¡¡Pues agora ta cola mandolina!!

TAULFO: ¡¡Gondiós!! ¿Yá nun viven xuntos? ¿Dende cuándo? ¿Qué soi yo? ¿L’últimu monu n’enterame?

ROSALINDA: Non, siguen xuntos…

TAULFO: ¡¡Home Rosalinda, esto yá ye pasase de mordernez!! ¿Qué son de los que s’amontonen? ¿Qué tán montando un trifásicu? Porque entós somos tres families a repartir los gastos…

ROSALINDA: ¡Qué animal yes! La mandolina ye una guitarruca pequeña…

TAULFO: ¿Una guitarruca pequeña? Pa min que lo inventa… ¿Qué va entrar, na tuna? ¿Depués de vieyu, mandolineru? Home, nun me toques la badana.

ROSALINDA: Los neños son modernos, non como tu, fúsil, so fúsil. Los neños tán estudiaos y tán saliendo alantre: güei tán apuntaos pa dir al Muséu del Prado en visita virtual. Namás qu’hai entraes pa tres mil persones…

TAULFO: Sí, pero la so modernidá ta costándome media paga y la salú. Les entraes sedrán gratis, ¿non?

ROSALINDA: Los inicios son duros…

TAULFO: Duros y apretaos. Duro ye llevantase a les cinco la mañana pa dir a arrancalo al Sotón.

ROSALINDA: ¡Yá tamos! La épica del mineru… Si yeres lliberáu sindical, hosties…

TAULFO: (Cambiando de tema) ¿Siguen col cuentu esi d’entrar na TPA?

ROSALINDA: Sí… La nena tien audiciones ca poco…

TAULFO: (Sospréndese) ¿Audiciones? ¿Qué ta? ¿Quedando sorda? Non, si cola mandilina y el Sukuki.

ROSALINDA: Audiciones ye como entrevistes de trabayu, pero p’artistes…

TAULFO: (Ximielga la cabeza) Unes oposiciones, muyer, unes oposiciones… (Suspira)

ROSALINDA: (Depués d’un cachu, pensatible, dexando que TAULFO torne al noble arte de crucigraméu, sigue) Vamos ver: ¿Por qué nun sal a aplaudir?

ATAULFO.: (Posando’l boli enriba del periódicu, con mala hostia) ¡¡Vuelta la burra al trigu!!

ROSALINDA: Él ,que siempre se les da de solidariu, que si la comisión de fiestes, que si la fiesta de la sidra, que si l’asociación de vecinos, que si patatín… ¿Y agora nun sal a aplaudir?

TAULFO: ¡Á Rosalinda! Lo tuyo, compañera, nun ye gordo, ye hinchao: lo primero, Simón tien artrosis, de cuando la mina, y nun ye p’aplaudir; ca vez qu’aplaude, ye como si-y dieren con cristales nes manes, n’El Molinón, cuando marcaba’l Sporting glayaba: ¡plas, plas, plas!, porque nun podía aplaudir…

ROSALINDA: Non, si tien salida pa too…

TAULFO: (Va siguiendo l’argumentación cola mano, amosando dos deos) Lo segundo, nun pue salir al balcón, porque lu tien enlenu de les bombones. ¿Nun t’alcuerdes de cuando’l de Sabino nun-y les quixo pagar porque nun tenía contratu y Simón dicía qu’eso yera cosa de la muyer y encerriscóse y púnxoles al balcón? ¿Cómo quies que salga? Y lo tercero: nun sal porque nun-y sal del…

ROSALINDA: ¡¡Taulfo, fai’l favor!!

TAULFO: Bouzouki. (Escarabaya’l crucigrama con rabia) Ves, yá me xiringasti’l putu crucigrama, colo bien que diba… (Suenen ocho campanaes nel reló de la salita.) Hala, venga, ¿nun queríes aplaudir? Pues Vamos aplaudir, pa que nun piensen los vecinos que somos unos asesinos, venga…

(Camín de la ventana siéntense dar vueltes de llave na pesllera y descorrer de pasadores. Una puerta que se abre y se cierra suave. Fuera españa’l trotiar de los aplausos. ROSALINDA y TAULFO queden paraos, mirando l’ún pal otru. TAULFO tira pa la venta y ROSALINDA esmuzse pel pasiellu. TAULFO, dende la ventana, grita a la muyer)

TAULFO: ¡¡Rosalinda!! ¡¡Aplausos, por favor!!