Patarramplán: pa crear hai que creer.

Nesti mes de payares conocimos a Patarramplán. Patarramplán ye un trasgu que vive na cueva del poeta Boniel de Les Llanielles. Esti poeta baxó de la cueva onde vive y traxo delles muestres coles que contaba inspirar a la xente pequeño a escribir poesía, ¡¡pero Patarramplán estrozó la exposición!! Nun quedó otro que ponese al llabor y escribir poemes y más poemes pa inaugurar, esti vienres 27 pasáu, una nueva esposición colos trabayos que se ficieron.

     Asina trescurrieron les Xornaes de Lliteratura Infantil y Xuvenil de Samartín del Rei Aurelio que dende va tres años asitien a los neños y a les neñes del conceyu nel epicentru de la creación, adeprendiéndolos a espresar y xugar demientres siguen dando aliendu a les pallabres d’esta llingua qu’heriedemos.  

     Ca añu’l númberu de participantes crez (llegando, esti añu, al puntu de desbordanos los participantes); y crez asina mesmo’l númberu de sesiones, la fondura de les propuestes y la implicación de quien organiza, collabora y participa.

     En tolos talleres la máxima ye la siguiente: “Pa crear hai que creer”.

     Prestaba qu’estes iniciatives fuesen más frecuentes. Dacuando suaño con un ayuntamientu, con una conceyalía de cultura valiente que se decidiere por la empresa d’una Escuela de Lletres pa la reciella (y pa los mayores tamién). Que se coordinare un calandariu d’actividaes nes “se punxeren en valor”, como ye lo de dicir anguaño, tola bayura cultural de les cuenques y  asegurando que la creación nun ye flor d’un día. Sé que tamién habría que’acompañalo d’un presupuestu (y al falar de perres acábense les bones pallabres y la maxa de los suaños) mínimu pa desenvolver les actividaes con éxitu.

     Apostar polo d’equí, dende equí. Aprovechar lo que tenemos. Creer en nós. Porque, como dicimos nos talleres, “pa crear hai que creer”.

      ¡¡Patarramplán!!

Antón quería ser porteru

David y Xurde Fernández
( con ilustraciones de Francisco Pimiango)
Antón quería ser porteru
pintar pintar 
2011

Namás los que fuimos porteros dacuando sabemos lo desagradecío d'esi puestu: el so papel discretu na victoria; el deu acusador na derrota. Lo apreciáu que pue ser un porteru porque naide, naide quier garrar la responsabilidá de mirar a los güeyos a esi héroe, el delanteru, cuando coloca la pelota y te mira en tientes, como un duelu nel far west.

Pero los porteros son bien necesarios. Son los que guarden les espaldes del restu del equipu; son tamién los qu'animen, los que griten; un gran equipu respira pel pulmón d'un gran porteru.

     Va tiempu que'l fútbol-espectáculu enmierdó'l fútbol-pachanga; aquelles tardes nes que la portería yeren dos morrillos, dos mochiles y el tiempu reglamentariu yera hasta cansar; l'arbitraxe de siempre se facía por consensu y nunca, nunca (vamos, yera bien raro) se sacaba una tarxeta colorada a naide. Los equipos yeren a boléu, de lo que cuadrare, lo mesmo que l'aliniación. El campu, una cai, el patiu la escuela; el tiempu parábase al gritu de "vien coche" o pasa paisanu". 

     D'esi fútbol pachanga cuento que parieron los grandes futbolistes que nos queden na memoria. Y nun puedo nun pensar en Maradona, por exemplu, nel arrabal arxentín.

     Desque tien conocimientu, Antón va pa porteru de fútbol. So pá suañaba con ello y, desque nació, enllanó-y el camín, hasta que dambos descubren qu'hai munches maneres de ser porteru de fútbol.

     La hestoria que nos cuenten los hermanos Xurde y David Fernández (coles llograes illustraciones del gran Francisco Pimiango, al que yá tuviemos oportunidá de gociar en Bruxes) trespórtanos al mundu de la infancia cuando los ídolos que teníemos (los que somos, yéremos o dalguna vegada fuimos del Sporting) llamábense Ablanedo I y Ablanedo II, Cundi, Eloy Olaya... El testu refrescamos na memoria aquelles pallabres máxiques (el balón de goma tan impredecible porque "variaba" ) y enséñennos que dacuando en vez convién nun posar nos fíos les esperances de les frustaciones propies; esti ye un llibru qu'enseña a ser y a dexar ser, a entender y a nun aneciar.
        De les munches maneres d'entender el fútbol que dacuando, paezse tamién a la vida.

     Un llibru recomendable dafechu pa tolos papis y mamis futboleros que se ponen como ogros esperando sacar un Messi o un Ronaldo de lo que, les más de les vegaes resulten ser namás un neñu  o una neña que namás tienen ganes de xugar colos demás y pasalo bien.
     Un llibru que nos enseña a recobrar esa otra dimensión, tan cercana, tan de sustratu, tan fonte que nutre al otru fútbol. Un llibru que nos reconcilia col fútbol y con nós mesmos.

Too esto (y muncho más) pue sacase de la llectura d'Antón...

Plutonianos

El mio fíu y yo tamos indignaos. El mundu, l’universu, nun ye como nos lu contaren. Él vien d’escuela protestando y entrúgame qué pasa con Plutón, si al final ye un planeta o non. Yo dígo-y que sí. Resulta que nun va pa tanto, cuando yo estudiaba (insisto, nun va pa tanto) Plutón yera un planeta. Dicíemoslo de carrerina, y hasta me sal el son na alcordanza: Mercurio, Venus, Tierra, Marte, Xúpiter, Saturno, Urano, Neptuno y Plutón.

Agora vese que non. Nun sé si ye a cuenta de que de verdá cola ESO enséñense menos coses o yera un más de los recortes, que van retayanos hasta’l sistema solar, pero lo cierto ye qu’agora Plutón nun s’enseña. Nun tien el rangu de planeta. Cayó en desgracia, como la llista de los Reis Godos, o’l diagrama de Vemm. Resulta que Plutón, al criteriu de los científicos, nun da la talla (y eso que’l tamañu, fártense a dicinos, nun ye lo importante).

Pa ser un satélite, igual; pero pa planeta…

Namás una raza soberbiosa que hasta nun va muncho creyó que la Tierra (esi planeta que tien tres cuartes partes d’agua) yera’l centru del universu y too daba vueltes alredor d’ella, pue permitise l’atrevimientu de facer una perrería como esta.  Con too y con ello, el mio fíu y yo reivindicámoslu como planeta. A riesgu de que nos llamen ignorantes o desfasaos. Él reivindícalu por caprichu, porque-y gusta cómo queda nel cantar. Yo, más talludín –esto ye, más repunante- por principios. Esto nun ye como enquivocase nel decimucuartu decimal del númberu pi, o pasase del pluscuamperfectu d’indicativu al del suxuntivu, o tracamundiar la metonimia y la sinécdoque. Pienso en tou un planeta borráu d’un plumazu: ¿cuántes cultures, llingües, races, topónimos, obre d’arte, lliteratura, vides fulminaes al petite d’unos científicos malos que paecen salíos d’una película de superhéroes de serie B?

Un Hermanu Plutonianu

Defiendo Plutón como planeta.

¿Quién sabe si allá, nuna tarde na que llueve –como pueda llover en Plutón- un ser enfrente d’una pantallina escribe un testu nuna llingua pequeña defendiendo la esistencia d’un planeta llamáu Tierra –que tien, insisto, tres cuartes partes d’agua- y asina, emperráu nello, consigue salvanos a toos?

El mundu nun yera como nos lu contaben.

El sistema solar, a lo que paez, tampoco.  

La colección Altea y David McKee

La biblioteca exerz sobre'l llector una presencia totémica. Ye una referencia, una puerta enllena de posibilidaes nes que s'abellugar en tardes de truena o hores perdíes.

Edición d'Altea Benjamín

     De neñu, na escuela, contábemos con una colección que pa min siempre foi de referencia naquellos años y que, de poco en poco y siempre que tengo oportunidá nuna d'eses mañanes de rastro, voi recopilando. Son los llibros de la biblioteca Altea, n'especial los llibros d'Altea Benjamín. Una maestra, pámique yera Carme, en primeru (quiciabes Maria Teresa, en segundu) mandónos comprar un títulu a cada escolín de la clas y asina, la biblioteca de clas contaba con ventitantos llibros diferentes que díbemos lleendo y compartiendo. Yeren llibros pequeños, manexables, editaos con un procuru y una calidá que pa nada tienen qu'envidiar a los álbumes illustraos d'anguaño. Yeren, pámique, la semiente d'estos.

Portada inglesa de la obra

A min tocóme mercar Cuatro mapaches, qu'en comparanza colos otros títulos, siempre m'abultó un pocoñón noñu (yá daquella) pero que col pasu del tiempu y la ñoñería que va faciendo posu nún, foi ganando. Entá anda per casa y entama diciendo “cuatro mapaches rompieron la alambrada...” y ye la historia de cuatro mapaches qu'entren nuna casa y de la estroza qu'armen nella.

     Lo bueno de los llibros ye que son piedriquines, como les de los neños del cuentu, que nos ayuden a volver a casa.

Anchoveta y Bogavante  faen de les suyes

     

Nestos díes consiguí faceme con un montonáu d'esos llibros (siete pieces del mio pasáu, más o menos) y agora veo qu'ente ellos hai verdaderos clásicos de la lliteratura infantil y juvenil. Ente ellos resalto, por exemplu, la edición de los llibros de David McKee, escritor ya ilustrador británicu: el bien conocíu Ahora no Fernando (tamién traducíu como Ahora no, Bernardo), con munches coses en común con dalgunes pieces de Gorey (dulcificáu, claro) y cola obra de Maurice Sendark Donde viven los monstruos.

     David McKee tresllada a esti cuentiquín la soledá de la reciella cuando nun son atendíos por los pas: a Fernando los pas, ocupadísimos, namás que-y son quien a dicir "¡Ahora no, Fernando!", y nin siquiera cuando'l mostru del xardín lu xinta y ocupa'l so llugar se decaten del cambiu. Una historia qu'a Gael inquietólu bien d'ello y qu'ofrez unches posibilidaes de trabayar.

Los del pueblu desquiciaos

     Por embargu a min prestóme muncho más la historia qu'atopé nesta mesma colección y de la que nun hai malpenes referencies: Los dos almirantes. La vida d'un pueblu pacíficu vese alterada pola llegada d'un almirante, Timón Anchoveta, que se retira de la marina y alloquez al pueblu; por si fuera poco, depués de les trapisondes qu'arma esti fenómenu, llega al pueblu Remo Bogavante, el segundu de los almirantes del títulu. Dambos entamen a rivalizar y el pueblu conviértese nun infiernu pa los probes habitantes que contaben ganar prestixu cola presencia dambos y qu'entamen a plantegase escapar del pueblu hasta que daqué trai la paz, de momentu.

      Na última páxina'l xeneral Botafuego y el xeneral Parapeto van dexar la puerte abierta a la historia.

Los llibros de Gael

N'ocasiones ún aprende a valorar la reciente paternidá como una oportunida de volver a recorrer acompañáu los cuartos que dexemos atrás, los de la infancia. Nos primeros pasos y el caminar al pezopé, nos tropiezos, vemos los nuestros tropiezos; nel primer día d'escuela facemos por alcordamos del nuestru y hasta llega'l golor de les tices y de les ceres y de los nervios y del qué pasa.

     Adeprende ún a aprovechar pa relleer los cuentos que de neñu lu plasmaron, a reestrenar la mirada sobre les histories, reformular les sombres del cuartu o plantear una lóxica alternativa y máxica al funcionamientu simplayón del mundu.

     Estos son los llibros de Gael, que son tamién los mios. Llibros que vamos lleendo en xunto.