Manzajú: el viaxe iniciáticu

Ruma Barbero de Diego

Manzajú

Premiu Alfonso Iglesias 2009

Suburbia Ediciones

Xixón, 2010

 

D'ente les munches asignatures pendientes que tien la creación lliteraria en llingua asturiana, y que dende'l Xurdimientu se punxeron al llabor d'actualizar, quiciabes una de les más acusaes yera la del cómic. Nos años noventa, cola apaición de la revista El llapiceru, quiciabes tamién con aquella otra espublización que mercaba de guah.e, Tapón, onde vía apaecer a Gladius, a Xuanón, y ensin escaecer la monumental Crónica de Leodegundo, taba la semiente de lo que vien guañando agora. Ye dificil, ta a les clares, una industria del cómic n’asturianu y siempre vieno, como el casu de la lliteratura, acompañada pol sofitu institucional, bien seya de la mano de subvenciones o de la mano de los premios. Ello, anque nun ye desable, ayuda a que podamos difrutar de verdaderes ayalgues como esta obra, Manzajú, de Ruma Barbero de Diego.

     Si daquién s’avera a les principales obres de lo que vien denominándose esi xéneru alternativu de “novela gráfica” decataráse de qu’hai un tema que forma una constante y ye l’autobiografía como mediu de denunciar dellos aspectos sociales. Persépolis ye quiciabes la obra que más sobresal, dientro d’un xéneru que va espuntando y consolidándose.

     Nesi sentíu Manzajú ye l’axuste de cuentes de Ruma Barbero cola sociedá asturiana y española.

     Al tresviés de dellos capitulinos que funcionen como fogonazos cinematográficos, Ruma danos cuenta de dellos episodios significativos de la so vida. Y, veloende, que’l símbolu garra fuerza: nún d’esos capítulos da cuenta de la discusión cuando estudiante sobre’l símbolu del toru d’Osborne. La crítica de Ruma va más allá d’una simple y cenciella crítica la España cañí que representa: la so propuesta, la so negación d’identificación con esi símbolu va hacia adentro y hacia’l fondu. Ye la propuesta d’un intimismu auténticu envede la simplaya caricatura kistch y superficial que representa’l toru. L’escanciador, xunto col mayador y xunto colos demás símbolos publicitarios que semaben la carretera vieya dende Xixón a Tazones o Llastres, onde diba pescar col güelu, xurden como seña de la infancia xunto cola marca  del refrescu que da nome al llibru: Manzajú. Manzajú representa entós la infancia y, dende la perspectiva del home mayor, un sitiu nel que tar y al que pertenecener, como aquella calle qu’entamaba a separtar nel Somió rural les caseríes de los caserones, a los criaos de los amos.

    Manzajú ye la historia d’un posicionamientu y d’una toma de conciencia: de los que taben esperando l’autobús pa dir a la pública y enfrente teníen ¿vecinos?, colos que nunca nun xugaben y a los que cuásique nunca nun víen sacante enfrente la parada que los llevaba, n’uniforme, a la privada; de los que vistíen de chándal y de los que namás lu usaben pa les clases de ximnasia (agora educación física); de los que sufrieren la historia y de los que se dedicaben a disfrutala; de los que bebíen Manzajú y de los que bebíen Trinaranjus; de los qu’agora tienen una postura auténtica y crítica y de los que namás la tienen impostada.

    La técnica gráfica de Ruma, en blanco y negro, con dibuxos n’apariencia cenciellos, ensin un estilismu gráficu complicáu que nos distraiga de lo que ta contando, ayuda a llevanos pelos llaberintos de la neñes pentemedies de les alcordances, sacándonos dacuando una sorrisa compliz, faciendo que nos enritemos dacuando, nun nos dexando nuna indiferentes.

     D’aende l’aciertu de Ruma cuando confiesa que nun se documentó n’escesu, que nun revolvió ente cartelos de la dómina: la memoria, cuando se trata de dar cuenta de lo sucedío a ún, ye, si acasu y pesie a too, la meyor de les fontes.