Fundido a negro carbón
Monty
con prólogu de Pablo Rodríguez Medina
editorial El pescador de agua dulce
2013
(Parte de lo que s'obtenga va destinase a sufragar los gastos xudiciales de la xente represaliao na fuelga minera)
N'acabando les últimes fuelgues de los mineros, eses qu'entamaron el día 30 de mayu de 2012 como rempuesta al recorte del 63% de les ayudes del plan pactáu pa la minería, abrióse pa min un periodu de reflexón.
De primeres, cuando la fuelga, movíu pola sensación de solidaridá, quixi crear un bancu de recursos onde la xente pudiere apoyar a la minería coles sos creaciones, baxo llicencia creative commons que pudiere dar publicidá a lo que taba pasando equí, convencíu de que nun se llibraba solo la causa de la minería, sinón qu'ello yera l'empiezu d'un ataque a les conquistes sociales. Enguizárame la historia de les fuelgues del 62, cuando hasta Picasso dedicó aquel cartel y se firmó'l manifiestu de los intelectuales d'apoyu a los mineros.
Decatéme bien llueu de que'l tableru del xuegu y les riegles camudaren y que nós nun nos enteráremos. Sí, d'esta banda -porque convién dexar a les clares que nun hai oxetivismu y que l'apolítica ye tamién una postura política- nun nos decatáremos del cambéu.
D'ehí p'acó sigo analizando lo que pasó. Y delles de les conclusiones -que son fáciles d'estrayer a toru pasáu- son les que siguen y que pudi esponer nel prólogu de Fundido a negro carbón.
A principios d'abril contautó conmigo Montero, Monty. Conózolu del pueblu, dende chavaletos, dende qu'una vegada contauto comigo pa dicime que taba recopilando material sobre lo que pasó n'Asturies enantes, durante y depués de la guerra civil.
Caleyaba los montes entrevistándose con paisanos, recopilando información. Sigue nello. Va y vien a Buenos Aires, onde se forma. Ellí lu pillo esti últimu episodiu; cuando supo d'él nun foi a despegase d'interné y garró'l vuelu pa metese de frente na historia, pa vivila, pa que naide-y la contare y poder contala él.
Salió-y al encuentru.
En volviendo p'Asturies nel alsa, topetó col corte de carretera a l'altura L.lena; garró los bártulos, iguó les cámares y entamó un proyectu que cuayó nun llibru: Fundido a negro carbón.
Pidíame que-y ficiere'l prólogu.
En viendo les semeyes reviví'l conflictu.
Repensé.
Reflexoné.
Ando entá tantiguando los erros tácticos.
Fallu al midir les fuerces
Hubo un erru de llectura de contestu y un fallu de precipitación: la rempuesta foi efeutiva y rápida a la ruptura del acuerdu: anunciu de fuelga xeneral, corte de carreteres y encierru nos pozos.
Dende que naz arreyada a una materia prima non renovable, el poder de la minería del carbón va escosándose de mou directamente proporcional a la so estracción, ampliándose al empar que s'atopen otros recursos que s'obtienen de mou más económicu o prácticu. La minería yá nun mueve'l númberu de trabayadores d'antañu: una fuelga de venti mil persones echaes a la cai ye un problema d'orde social seriu pa cualquier gobiernu.
A partir de les últimes fuelgues fuertes (les del añu 1991, nel pozu Barredo, en Mieres, onde me llevó mio pá) hasta anguaño, en venti años el númberu de mineros n'activo foi amenorgándose por nun dicir diezmándose; entraron les subcontrates y les prexubilaciones. Esta mengua tan grande de personal venceyao a un sector, concentrao nun territoriu, fae qu'esti pierda'l so poder: la fuelga de la minería, avezada a bastase de sigo pa forzar negociaciones, avezaos a nun contar con más naide, va resultar insuficiente pa forzar a un gobiernu manifiestamente de dereches con mayoría absoluta.
El poder (gobiernu, plutocracia, mercaos...) entamó'l desarme de les conquistes sociales faciendo un xestu de fuerza: toa llucha necesita de señes y el sector del mineru, debilitáu, históricamente venceyáu a les reivindicaciones obreres, yera un frutu apetitosu que diba servir pa enseñar a otros colectivos (funcionarios, sanidá, educación, trabayadores en xeneral) qu'esti gobiernu diba en serio y qu'amparándose na mayoría absoluta conquistada con un programa que traicionó dende'l primer momentu, nada nun lu diba frenar.
De primeres fueron a polos mineros n'activu, dempués a poles contrates, siguieron colos prexubilaos... Suena talo qu'al poema de Bertold Brecht. Y al empar, cualquier niciu de resistencia foi espuestu a la opinión pública como un actu de terrorismu. Divide y vencerás: como siempre los "privilexos" de los mineros, lo muncho que ganen, lo bien que viven... Los mesmos argumentos pa dir escontra del funcionariáu, de la sanidá, de la educación... Una sociedá que se mide por rentabilidá conviértese nun mercáu xabaz ensin requexu nengún pa un rispiu d'humanidá.
Llíbrenos Marx del neolliberalismu
De neñu en mio casa víemos el parte y facíemos una llectura política. Mio pá siempre dicía que nesti país hai coses que fae la izquierda (albuertu, llei del divorciu, llei de les pareyes homosexuales...) porque nun pue facer la derecha y coses que fae la derecha porque nun pue facer la izquierda. Ente elles, esti mazazu a la minería. Pero nun nos enquivoquemos porque'l neolliberalismu (eso que José Luis Sampedro dicía que yera'l lliberalismu de siempre camufláu con aires de modernidá pentemedies de la partícula neo-) alita nos dos grandes partíos políticos d'España. Siéntolo polos socialistes de verdá que militen nun partíu que dexó de ser socialista, pola xente de bona fe que sigue nun partíu -en munches cases por tradición familiar- que tenía hasta nun diba muncho l'esmuelgu de reformar la Constitución pa continuar la llinia sucesora de la monarquía borbónica y que nun dubió en reformar esa Constitución intocable y sagrada pa contentar a los mercaos.
Nun sé muncho d'historia, pero dame que Pablo Iglesias nun fundó'l partíu pa llegar a eses metes utópiques nin tanta xente se dexó la piel pa que los gobernasen unes axencies que son les mesmes que nos metieron nesti pufu que se llama crisis.
Convién nun enquivocase nin echar nel escaezu que munches de les tesis de Soria encontiábenles n'Europa comisarios socialistes.
Avezaos como tábemos a ver los problemes de manera gremial, sectaria, el poder actúa de manera sistemático, atacando diversos frentes en diversos momentos ya intoxicando y torgando de pasu cualquier sentimientu de confraternización y, veloende, de solidaridá.
Vendieron privilexos onde namás había acuerdos y convencieron a muncha xente de que les víctimes yeren los verdugos y los verdugos les víctimes. Otra vuelta l'arquetipu plutonianu del mineru con rau y cuernos.
Los medios de comunicación encargáronse de vender el fumu de la barricada pa que nun acolumbráremos el problema de fondu: el desanicie de tou un territoriu.
El mineru.
Madrid obreru saluda a los mineros
El problema de la minería nun tien que quedar nun problema qu'acinque solamente al sector. Hai que concebise como lo que ye un problema social d'unes tierres que van camín de dos sieglos que vienen siendo espoliaes y saqueaes nel enfotu de la estracción de carbón.
Llevo dende neñu viendo les mesmes pancartes y les mesmes promeses de reconversión, viendo la incapacidá d'unos gobernantes de decidise a facer daqué con proyectu seriu que vaya más p'allá de les aules y los museos, de los edificios que se valten por falta de sentíu y d'usu.
El problema de la minería ye un problema social porque la ruptura del pactu escritu va treslladase a más frentes: la reforma llaboral y los recortes vienen dándose d'enantes.
El problema de la minería ye un problema social y territorial, y perende global tamién.
Et in arcadia ego...
Yo crecí ente les nates d'islán del Nalón; vi baxar el ríu prietu del llavaderu de Carrocera y cada domingu y cada agostu disfrutaba col agua llimpio. Dalgunes pallabres pésenme na conciencia y nel llau connotativu de la llingua: tayu, mamposta, costeru, derrabe, grisú...
Nun baxé nin una sola vegada a la mina. Esi mundu escuru, fundíu a negru carbón acompañóme dende neñu; foi heriencia d'un pá que dexó los meyores años en coladeros y chimenees; d'un güelu maquinista y d'otru que vieno dende Fresno El Viejo (Valladolid) porque los fíos se-y morríen (se-y morrieron dalgunos) de fame: y nun ye una figura lliteraria.
Acabóse la época de la épica: les semeyes de Monty recueyen nun solo la parte aguerrida, el mineru en llucha; recueyen esa otra parte qu'hasta agora quedó tapecida ente bastidores, la parte más humana de la traxedia, esa parte en que nada nos ye ayeno. La minería yá nun ye quien de por sí a facer cimblar el gobiernu de la inxusticia. Tien de ganase l'apoyu d'aquella xente a lo que nada humano -y seya ayeno. Porque eso son estes setenta semeyes: la visión humana del conflictu en dellos momentos, en dellos llugares.
L'oxetivu de Montero (de Monty) tuvo la suficiente sensibilidá de nun se dexar llevar pola sienda de lo fácil, de lo que nos ofrecíen dende aquella otra banda; ye eso y muncho más. Supo erguise frente a los cantos de les serenes (colos qu'agullen les grilleres) pa voltiar hacia les muyeres, los neños que xueguen indiferentes a eses coses de mayores; hai mineros que lloren, humanos; xestos de preocupación, incertidume... Tolo que somos, fuimos y seremos. Una mirada hacia esti llau qu'aparte de retener (que non detener) la historia, cuenta y da cuenta de les sensaciones nuna mirada estética y ética: la que nos diz que nin siquier l'oxetivu d'una cámara ye oxetivu.
La nuestra ye una guerra de resistencia y resistir ye vencer.
Si nos vencen, si nun resistimos, que'l nuestru fin seya un fundíu a negru.
A negru carbón.
Salú y república.
(Testu de la presentación de Fundido a negro carbón nel Atenéu de Turón el 19 de setiembre de 2013)
No hay comentarios:
Publicar un comentario