A fechos consumaos.

Ye fácil dividir a un pueblu o a un conceyu. ¿Femex en L’Entregu? ¿Alcuentru sí o non? Un par de términos grandilocuentes (“marxinación histórica”), avivar dalguna envidia (el parque, les piscines, la salida, l’alcampu, ente otros tantos que me recordaron esti mes) y la polémica ta servida.

     Porque llevamos el localismu dientro. Toos. Nun fae falta más que velo. Si nos quiten lo del nuestru pueblu, barriu o portal, remontámonos. Lluchamos como gatu panza arriba. Lo de la FEMEX (podéis creeme o non, cada cual al so petite) yera lo de menos. Un cebu. La garduña na que toos caímos menos aquellos allegaos colos que comenté l’enfotu del artículu: la falta de coherencia nel casu concretu del alcuentru. Repartu equitativu (siempre que seya lo del vecín). Igualdá. Sí. Les grandes pallabres usaes pa dividir, non pa xunir.

     Pudiere publicar esto al día siguiente, a la selmana de salir l’anterior númberu de La Cuenca del Nalón; pero quiciabes pensaríeis que tuviere mieu. Que m’eché atrás. Que reculé. Nun lo fago. Ye agora, a fechos consumaos, aguantaos insultos y descalificaciones, increpaciones, cuando yá nada gano de lo poco que me queda por perder, cuando lo digo. Porque ye fácil separar a un pueblu. Hasta un “papanatas, flipao, tipejo, poetucho, zoquete” (entre otros que me dedicaron), hasta esti perru caleyeru, pue facelo. Entenderé que muncho de la xente de Blimea, onde, como’l corríu diz, “tuvi amigos, tuvi amores” me guarde un rancor sempiternu.

     Lo que ye preocupante ye que la xente que nos representa -y non esti “precursor del y tu más”- xuegue a esto. A enfrentanos.

     Personalmente, dame igual ónde se celebre la FEMEX; lo qu'admiro ye’l determín col que'l pueblu de Blimea cierra files a la hora de defender lo qu’entiende suyo.

     Namás.

     Esti perru caleyeru lleva bien de tiempu, como don Quijote, lluchando batalles que nun son les de so. D’agora n’adelantre siguiré’l conseyu que tantos me dieron y dedicaréme a les “filoloxíes” que son lo mío.

FEMEX EN L'ENTREGU

Demientres  25 años l’ayuntamientu de Samartín del Rei Aurelio vien celebrando la FEMEX nel Parque d’El Florán. Ye una de les apuestes más importantes del consistoriu en cuantes a inversión de tiempo (ye l’ayuntamientu y el patronatu de la FEMEX quien organiza y programa) y de presupuestu (cuido que nun baxara de los trenta mil euros, tirando pelo baxo). La mayor de les apuestes culturales, con actuaciones musicales, teatrales, exhibiciones. Un elementu dinamizador non solo no cultural sinón no económico (al que’hai que sumar la Feria de Ganáu).

     Son, polo tanto, 25 años de marxinación sistemática hacia’l pueblu de L’Entregu, que nunca se ve beneficiáu de la inversión. 25 años años de marxinación histórica hacia un pueblu que tamién paga los impuestos colos que financia esti eventu.

     La Femex podría asitiase nos munchos terrenos del parque de L’Entregu o del Parque de la U, coles instalaciones deportives que tán al pie, nel Polideportivu y la cancha deportiva Valentín Vega p’abellugar los eventos deportivos; les canches del colexu El Coto y los terrenos del Parque inglés sedríen los más afayadizos pa la Feria de Ganáu. Amás, los munchos visitantes tendríen más a mano la feria si contamos coles places d’aparcamientu de los terrenos del Pozu Entregu, del antiguu institutu y, hasta incluso, del antiguu campu de tiru o del centru comercial Alcampo.

    Los beneficios directos sobre la hostelería sedríen inmediatos, si tenemos en cuenta que’l cordón hosteleru de L’Entregu ta cerque del parque y que, amás, nun habríen de colaborar con nengún donativu (como se fae con festexos) al ser una actividá del consistoriu.

      Nun pido tampoco que la FEMEX s’instale venticinco años en L’Entregu (como podría ser de xusticia); una alternancia ente los dos llugares sedría, cuido, lo más xusto. Los años pares en L’Entregu y los impares n'El Florán.

     De xuru que los nuestros políticos, que tanto vienen aporfiando últimamente pola igualdá, la equidá, el repartu igualitariu de los recursos y la non discriminación ente poblaciones, tendrán a bien la humilde petición d’esti ciudadanu.

DE LOS MUNCHOS NOMES DE L'ENTREGU/EL ENTREGO (I). La lleenda del tributu les cien doncelles.

Nun tiempu de guerra, na temprana Edá Media, ente dos civilizaciones, cristiana y árabe, un rei cristianu apauta con unu árabe la paz, cifrada nel preciu de cien doncelles vírxenes a ca añu. El llugar, un fielatu que facía la llende onde quedó en facese l’entregu de les doncelles. Certificábalo una inscripción nun llábana que yá nun se conserva na que s’aseguraba qu’equí, “en isti logar, facíase vergonnosu entregu de un ciento de doncellas, fasta que foi roturado el pacto”. Eso desplicaba que cerca d’aquel entregu, mui cerca a galope de caballu, hubiere un Serrallo onde’l rei moru, Muslín, guardiaba les doncelles, cerca d’otru llugar, Tetuán, que tanto traía a l’alcordanza’l sitiu africanu a los homes que ficieron el serviciu.

Foi Aurelio, el rei nuestru, el que vieno a desfacer el pactu.

La historia, con delles variantes, repítese n’otros llugares de la xeografía hispánica y son dellos autores yá los que la tienen recoyida y tratada o recreada nes sos obres, contándose ente ellos el gran Lope de Vega que, na so obra Las famosas asturianas, que podéis lleer en llinia equí, da cuenta de la lleenda anque con actores estremaos. 

Llibru nel que se recueye la lleenda
y les sos variantes tanto culturales
como llingüístiques.

Nun llibru singular y bien guapu, El rescat de les cent douzelles/El tributu de les cien doncelles/ O tributo das cen doncelas / Las cantaderas/ El tributo de las cien doncellas, La Pobla de Lillet, Associació Medieval de Bagà, 2000, recuéyese esti “fabliau”, esti cuentiquín, esta llingua, nun solo n’estremaes partes, sinón también n’estremaes llingües. N’asturianu la versión tuvo al cargu de Severino Antuña y de Chema Blanco.

Esta yera la lleenda que se nos facía pasar por verdadera demientres la escuela, cuando queríemos saber el por qué del nome del nuestru pueblu, o pa entrar en farina nel tema de la Reconquista. Sicasí, nun entardemos en conocer qu’esa desplicación, tan guapa, nun yera otro qu’una etimoloxía popular.

Col nome d’etimoloxía popular conozse aquella desplicación fabulosa o anecdótica que se-y da a una palabra (nesti casu, a un topónimu, esto ye, a un nome de llugar) pa desplicar el so orixe, cuando se pierde la verdadera noción del so significáu. Viénennos a la cabeza una montonera d’exemplos, como’l de Blimea: un paisanu que va arreando la mula o la vaca (depende de les versiones), al llegar al sitiu onde ta la población, mandába-y al animal, “¡Bli, mea!”.

Lo que caracteriza a la etimoloxía popular ye que suel desmontase fácilmente polo pelegrino de la so natura. Ta a les clares que, pa entamar, Bli ye nome raru, que ye raro mandar a un animal mexar y que, pa finar, dando por esperable too eso, lo esperable ye que’l paisanu dixere:

-Bli, mexa.

La filoloxía, que ye la ciencia que s’ocupa de les pallabres y de les llingües, convién n’afirmar que Blimea ta emparentada cola palabra llatina viminis, que dio en castellán “mimbre” y n’asturianu “blima”.

Blimea sedría entós un sitiu abondosu en blimes (quier dicise, un fitutopónimu, un nome de llugar deriváu de plantes), como Llinares (del nuestru San Andrés de Llinares) lo ye de llinu.

Otros casos d'etimoloxía popular cercanos seríen los de Sotón y Sotrondio, llugares onde, el Marqués de L'Entregu, que tenía un caballu llamáu Ton, cuando diba a galope tendíu más allá de La Vega aparábalu diciendo:

-Soooo, Ton.

Y cuando cambió de montura, diendo a galope tendíu, paraba l'otru caballu, Trondio, de la mesma manera:

-Sooo, Trondio.

En verdá tien que ver con variantes de sotu, viesca o mata al pie d'un ríu: Sotón, aumentativu de Sotu y Sotrondiu, d'acordies cola teoría de García Arias, Sotu Redondu.

Nun dexa de chocar que pa los tres nomes de los nuedos poblacionales de mayor entidá del conceyu los sos habitantes afayaren una desplicación fantasiosa o máxica que poco tien que ver col so orixe.

La cruda realidá

N’acabándose la lleenda y el tiempo míticu convién volver a la cruda realidá y consultar lo que diz la filoloxía, que ye la disciplina científica encargada en desplicar los nomes de llugares. En verdá, El Entrego/ L’Entregu ye un hidrotopónimu, un nome de llugar que tien que ver col agua; la so desplicación, un ríu que fae entrada o entrega’l so caudal a otru mayor. Ello desplica’l paecíu con nomes como Entrialgo, Antrialgu, etc., como bien desplica Xosé Lluis García Arias equí.

XAQUE AL REI AURELIO

Hai diez años en L’Entregu nacía un proyectu ilusionante. Recuperar la figura del Rei Aurelio y del tributu de les cien doncelles durante les Fiestes de La Llaguna. Suméme al proyectu. Fici “Ente querelles y doncelles”. Fui pregoneru del rei na obra. Y n’acabando la fiesta pensaba yá na del añu siguiente.

     En 2015 cerrábase un ciclu. Pregonaba, como Rei Aurelio, les fiestes. Tres un camín onde taba la crisis, les crítiques (destructives les más), les descalificaciones que tocaben lo personal, mientras m’aplaudíen dicía: “Valió la pena”.

     L’Alcuentru medieval creara una alternativa cultural propia, identitaria, que complementaba la fiesta. Nun tuvi en toes. Poséme y volví a xubir, porque la fiesta tuvo abierta a quien quixo participar: el grupu de teatru El Refaxu, la implicación inestimable del Grupu de Baille de Blimea nos primeros años, los escritores...

      Diez años.

     Agora la oposición pon en xaque al Rei Aurelio y al alcuentru. Nun ponen en xaque la financiación. Si de verdá hai interés, si quixeren amosar más compromisu que’l prácticamente nulu interés (y a veces despreciu) d’estos años pol Alcuentru, los representantes políticos aprovecharíen pa regularizar lo que vean d’irregular y dar más tresparencia. Estableceríen los cauces d’otros ayuntamientos. Meyor aún. Lideraríen dende l’ayuntamientu l’alcuentru, coordinando la muncha y granible cantera cultural y asociativa de Samartín.    

     Sacáilo de la fiesta. Sácáilo, si lo consideráis, de L’Entregu. Celebráilo un añu en Sotrondio. Otru, en Blimea. La Güeria. Santa Bárbola. Sanamiés. Villar. Bédavo. Llantero.

     Aprovechái esti trabayu de diez años pa xunir al pueblu, non pa dividilu. Creái, meyorái, sumái: nun lo destruyáis. Tenéis equí un patrimoniu de diez años d’esfuerzu.

      Facéi vosotros porque seya de tol conceyu, de tol pueblu. Esi fue l’espíritu col que yo me sumé. Esi foi l’espíritu col que calcé la corona de Rei Aurelio 2015.

      Quien hai diez años echó a andar esta iniciativa quierla tanto que namás queremos una cosa, perriba de texemanexes, perriba de personalismos: que nun desapaeza.

Desalcuentros col alcuentru

Dende va diez años, pel branu, cuando La Llaguna, L’Entregu vuelve al medievu col Alcuentru Medieval del Rei Aurelio. Parte de la xente de L’Entregu (nunca orbaya al preste de toos) esperábemos qu’aportare la décima edición pa poder entamar los trámites y declarar la fiesta d’interés turísticu.

     L’Alcuentru medieval consiguió abrise un espaciu nel fiestes de La Llaguna, complementando la fiesta tradicional d’orquestes, xira y cachivaches pa la reciella, con una propuesta cultural qu’aprovecha la lleenda del tributu de les cien doncelles.

    Diez años estrenando obres de teatru que s’encargaron y se crearon a costafecha, diez años encargando les obres a grupos teatrales, implicando a les asociaciones, tentando de dinamizar, d’abrise, de buscar un sitiu nel bien apretáu calandariu festivu estival; creáronse intercambios cola xente d’Alcoy, supimos del arte milenariu de la cetrería, de los espectáculos, talleres, animaciones que nos ficieron suañar.

     Agora, cumplíu’l duru requisitu d’una década, de diez años de camín andáu, atopámonos cola negativa de tola oposición del ayuntamiento de SRA. Resulta que son más papistes del papa, que quieren más antigüedá que la necesaria; que nun ven claro lo que parte del pueblu vemos col cielu rasu del branu nesta cuenca que cada vez va a menos. Resulta qu’envede sofitar y roblar un alcuerdu, un conveniu, un daqué, qu’afite d’una vez esti llogru, qu’envede abanderar y poner al ayuntamiento al frente de capitanear una nueva etapa, necesiten tiempu pa reflexonar.

     ¿Ónde anduvieron estos diez años? ¿Nun abasta’l trabayu desendolcáu al pasar d’esti tiempu? ¿Nun se dan cuenta de que’l dinero invertíu pol ayuntamientu revierte nel comerciu, na hostelería, na publicidá del propiu conceyu, na felicidá de la xente, na cultura propia?

     Por desgracia, nesta ocasión, como tantes, el pueblu va muncho, mui per delantre de quien nos desgobierna.

     Firmo esto col honor de ser Rei Aurelio de la Xª edición, aguardando que venga la persona qu’inaugure una XIª edición y con ella, una nueva etapa más bonaz.

Memories d'un bosquinianu.

Poques esperiencies formatives tuvi más enriquecedores que’l mio pasu pel Colexu Públicu “El Bosquín” al que m’incorporé pa entamar en quintu cursu de la EXB. Al empezar cuartu cursu nel Colexu Públicu Marcos Peña Royo (actualmente “El Coto”) detectáranse deficiencies nos cimientos y hubo que lu derribar; al alumnáu y al profesoráu llevábennos n’autobús hasta les escueles d’El Serrallo. Mio ma, que siempre tuviere mieu de qu’andaremos en carretera, decidió cambianos d’escuela a la mio hermana y a min.

     Nun dexa d’abultame simpático  que lo qu’entamó por una resquiebra nos cimientos d’aquella otra escuela fuera la base na qu’aposienta la mio formación. Yo, qu’hasta entós namás me relacionare colos neños de La Vega, El Coto y la Barriada Santa Bárbara, descubrí un mundu nuevu: el contactu colos compañeros y compañeres que baxaben, naquella filera de seis o siete autobuses grandes y qu’aconceyaben a les puertes d’El Bosquín a los neños de Bédavo, La Fayuca, La Fayona, La Güeria, El Pullíu, Llantero, Tariz, San Vicente, Rebollos, La Llaniella… Toos ellos baxaben coles sos histories particulares que facíen qu’aquel neñu que nunca saliere del “burgo” estelare: l’aprendizaxe nun quedaba llimitáu namás a les aules.

     Abultábame bien poco lo que taba con ellos, namás les clases y la media hora de recréu, asina qu’a eso de les doce y media, escapaba como una posta pa en cá mio güela y comía apriesa por ver si llegaba cuanto primero al patiu.

     Los que nun quedábemos en comedor teníemos prohibida la entrada al patiu hasta les dos, pero yo esclucaba y, cuando nun había señorites nin maestros que guardiaren el patiu, saltaba la tapia pa mezclame colos cerca de cuatrocientos alumnos y alumnes que llegó a tener El Bosquín. A veces yera tan rápidu nel comer y dar la vuelta que llegaba enantes de que’l turullu anunciare’l segundu turnu del comedor. Porque había dos turnos: el primeru, nel que comía l’alumnáu de los primeros cursos (más aquellos que s’ofrecíen de voluntarios pa servir y cuidalos) y dempués el restu. 

     El comedor y la cocina ye un elementu fundamental al falar d’El Bosquín: aquel aroma a cocíu que nos facía ruxir les tripes cuando baxábemos al recréu (y qu’aprovechaben los de los viaxes d’estudios pa vendenos pinchos) sigue tando presente al tresviés de los más de venti años que me gradué. De vuelta a El Bosquín, percíbolu claro: cierro los güeyos y el camín del arume llévame otra vuelta a aquel mundu en que sentíemos el chocar de les cuchares y la cacía, un mundu pequeñu nel que la directora salía a poner orde nes files con un megáfonu; vuelvo  ver  aquel profesor que salía al patiu pela puerta d’atrás de la cocina y mordía un llimón hasta dexalu secu; nun escaecí entá’l color de los “senderos del libro” y el “grupu de llectura” del maestru Severino (nun había mayor premiu que confiare facer dalgún recáu al so despachu, al Seminariu); alcuerdo de la claridá qu’había na biblioteca onde podíemos lleer tolos comics de Tintín y d’Astérix; del salón d’actos onde vinieron dacuando en vez a danos charles o onde nos baxaba la maestra de música paque ficiéremos audiciones (que consistíen en sentir los elepés de música clásica nel tocadiscos) qu’ella escuchaba colos párpagos zarraos, cuásique adormecida…

     Ca requexu d’El Bosquín contién una anéudota y ca anéudota ye una enseñanza. N’octavu cursu, nel añu 1992 consiguí nesi colexu’l graduáu escolar. Entamaba una nueva etapa educativa pa min, pero enxamás dexé de ser y de sentime ún d’El Bosquín. Les enseñances que tuvi, les vivencies, acompáñenme’l restu de la vida. Nun me refiero solo a lo que los profesores nos deprendieron: refiérome a eses otres enseñances qu’emanen de la convivencia.

     El Bosquín aportóme aquel otru mundu que vieno de la mano de la convivencia con xeste de distintos llugares y acentu; na facultá de filoloxía, estudiando l’asturianu, sentía munchos fenómenos llingüísticos que traíen aquellos compañeros na so llingua; munches de les sos vivencies, que compartieron comigo, sirviéronme y serviránme pa siempre.

     Eso ye, en definitiva, lo que significa, n’esencia, la educación pública.

     Ún siempre quier lo meyor pa los fíos; por eso, cuando al mio neñu-y tocó la hora d’entamar el so camín formativu y educativu, quixi que los sos pasos siguieren los míos y nun dudé en batallar hasta consiguir qu’entrare n’El Bosquín. La melancolía, que n’asturianu tien el guapu nome de señardá, trae estes trampes.

     
De momentu tengo la certeza de que nun m’enquivoqué.

Cocu cenón

Un alumnu dizme qu’en so casa al cocu de lluz llámenlu cocu zenón. Y yo búscolu asina, como si fuere un filósofu d’Elea que busca, quién sabe si al revés que Dióxenes, les sos respuestes cola lluz na nueche; búscolu con “z”, y nun lu atopo. Y engárdiome nun llucha ente diccionarios y grafíes hasta dar col resultáu, una vegada que tamién a min se m’ilumina la tenyera, de que quiciabes y, ensin que sirva de precedente, convenga olvidase de filosofíes y buscalu con “ce”. Y entós sí, ehí, al fondu, despreciando lo que pue ser un epítetu: el cocucenandu (de nome científicu lanternaria fosforia), el cocu de lluz.

      Y, deformación filolóxica piensa que, de cocucenandu, nun sitiu con metafonía (como del que ye’l mio alumnu, ¿quiciabes debería llamalu informante?), cocucenondu o cucu cenondu, que’l mio alumnu trae entá vivu, brillando nos llabios y na so voz. Del cocucenondu al cocu cenón hai una perda del cuerpu fónicu, como si se-y desprendiese esa sílaba de poxa y cascarexa y saliere naciente camparna, ayudáu p’afitase pola semeyanza que gasta palos aumentativos: cococenón. Asina apaez, tamién, si ye que vos presta, nel DALLA (páxina 318).

                La relatividá del mundu, del universu, d’un bardial, enseñáronnosla los coquinos de lluz, esos seres qu’espaventes fosforescencies de difuntu, llume verde felechu encesu, máxico. Hai una lleenda antigua que pue restrexase nes tablines cuneiformes na qu’al héroe-y entreguen una fardelina con cocos de lluz que debe posar enriba de fueyes d’artal pa guiase nes nueches de nuble trupo, ente la borrina de la viesca. Compón con elles lo más asemeyao a un mapa celeste pa poder dir al aldu porque «la lluz llámase uno a lo otro, como se llama la escuridá», diz el versu, «y afitando la lluz redescúbrense los destinos».

                Les lluces de los cocos de lluz acompañáronnos na neñez. D’ella apruz esta señardá quenos afuega, que nos fae suspirar fondo y sentenciamos: «anguaño yá nun queden», o «yá nun brilla la so lluz como enantes, too a cuenta de la contaminación llumínica del neón, de les llinies d’alta tensión que crucen les camperes, de les ondes electromagnétiques que crucien el mundo con mensaxes intrescendentes y descontrolen el sentíu de los seres vivos; quiciabes tamién el karma, el malrrollu, y esto, yá se sabe, enantes yeren too praos».

                Ye cierto. De neños esfrutamos la edá feble na que cualquier fechu, por pequeñu que seya, mozqueta nel alma, anque seya minúsculu, como’l rellumar dun cocu de lluz nuna sebe, a la vuelta de la güerta que habíemos en Sorriego, cola nueche amiyando duce al costazu. Apoderábanos aquel verde vivu; hipnotizábamos talo que si fuere’l firmamentu y como si supiéremos, de xuru que descubriríemos constelaciones xuniendo los puntos d’aquella xeografía caprichosa.

                La vida, de la que vas creciendo, empuércate esi poder de facete quedar solerte, con coses tan cencielles. Llamámoslo madurar, a esi procesu de dir escosando y quedando ensuchos, ensugaos; a esa perda d’encntu, a esi alendar fofu, a esi apagar de les lluces enceses de los coquinos de lluz. Asina foi esponiendo esi procesu de perda continuu’l poeta Rubén d’Areñes nel poema “Les lluces qu’apaguen”, del llibru Les páxines blanques. Sicasí, entá nos llega arremansáu l’intermitente brillu, el minúsculu fulgor.Entá somos a tropezar un resclaviu d’aquella lluz que nos maravilló.

Vivir nuna cuenca ye lo que tien: los pueblos andamiaos pel monte coos postes solitarios del allumáu públicu son coquinos de lluz; pueblos que lluchen por sobrevivir dende’l so étimu, profanáu y col atropellu acuñáu nos cartelos; pueblos que se caltienen en monte y nun ceden al quite de la villa.

Nes nueches en que vuelves a casa y ta’l cielu llimpiu de nuble, arramando xelada qu’amiya en forma de vafu, cuando la vida ye un versu nel Neruda modernista; esa nueche estrellada onde tiriten, azules, los astros allalantrones. Toi convencíu de que Neruda nun conocía los coquinos de lluz, porque de conocelos, de xuru qu’escribiera: “y temblaquien, averdosaos, coquinos de lluz na sebe infinita del tiempu”.

A min entá me salen al pasu alcuando. Camín de la Campa de La Ortigosa pa sentir la berrea, avanzao setiembre, peles cunetes víase tremao de coquinos de lluz. Un neñu que nos acompañaba de Carballo (Galiza) señaló pa ellos clamiando:

-¡Ehí hai un móvil tiráu!-confundiéndo’l so brillu verde col pilotu de cualquier dispositivu electrónicu.

Préstame pensar que los coquinos de lluz son como dellos líquenes, verdes también, pero que namás prienden onde la sencia del aire ye tan puro, tan puro qu’amerita’l calificativu de bioindicador, faciéndonos ver que la naturaleza ellí ta n’estáu d’ “on”.

Coquinos de lluz. Vilos alcuando en Cangas del Narcea, camín d’El Regueirón, nuna sebe al pie del camín, añaos pol duzayón sonsonar del ríu entemecío col ruxir de les xaronques y otres vegaes, incluso de la curuxa. Tamién nesa sebe s’acolumbra’l brillu suave de los coquinos de lluz per un terraplén que dacuando usen de basureru.

Ellí tán. Son como les pallabres que conxuramos con solo diciles. Pallabres qu’allumen n’intermitencia contra’l desaniciu. Brillos febles aporfiando por resistir a la negritú del escaezu. Lluz que flota rinchando na prieta solitú de la muerte: cocu cenondu, cocu cenón, cocu cenando, lluciérnaga, cocu de lluz, coquín de lluz…