Ta’l mundu irreconocible. Tanta
globalización, tantu cambéu climáticu y tanta comedia tán dexándonos el
calandariu como farrapos de gaita. Nun sabe ún en qué tiempu vive, nin qué
fruta del tiempu ta pa garrar.
Pongamos un exemplu: ta cayendo
la fueya del fresnu colo qu’enantes s’allargaba la toñada nes caseríes de monte
altu, aprovechando la yerba; esti añu la toñada vieno per agostu. Otra preba d’ello
dánosla’l mio amigu Xavi Cayao. Na so cuenta de facebook amuesa una semeya con
una piescal atarraquitada, de la que pon el refrán “piescos floríos y piescos
maduros, nueches y díes, too uno”, col que se facía referencia a que dambos
fechos asocedíen nos equinoccios (pal que queda cerca d’un mes).
El tiempu ta camudando y los
refranes yá nun traen aquella certidume del posu de la tradición, la
esperiencia de los antiguos.
¿Convendrá plantar l’ayín per
Samartín? Dende que camudemos Tolos Santos por Halloween yá nun vemos la nieve
pelos altos… Les agües mil d’abril, ¿úlo?
El casu ye que vien l’añu
adelantáu, como si la priesa cola que nosotros nos damos por vivir la
contaxáremos a les estaciones. Nun ye normal qu’en metada d’agostu punxeren la
vuelta al cole nos supermercaos: xuntóse coles neveres portátiles y les caberes
piscines montables. Nun sabemos si los guah.es van venir a clas colos
retuladores o colos churros de playa. Más pruebes: el gremiu de xeladeros anota
qu’esti branu’l sabor de corte más demandáu ye’l de turrón y en munches
sidreríes alvirtióse que pidíen, como per Navidá, fruta axampanao y, los más
despistaos, cava.
Tanto camudó’l tiempu qu’envede
cantar del branu tuvimos al cantu de chigre d’echar l’aguilandu con un villancicu.
El branu, esti añu, duró lo qu’un
reel. La seronda será un estáu de whatsapp y l’iviernu, dará como muncho pa un
tiktok. L’iviernu nun lu comerán los llobos, pero dame que tán plizcando d’él. Yá
lo dicía’l poeta, que la primavera avanza, pero tampoco a reblagos, ¡coime!
Ta’l mundu irreconocible. Y hai
quien lo niega.
Anda la xente tol día a la griesca…
Igual eso sí ye’l calentamientu
global.
No hay comentarios:
Publicar un comentario