Memories d'un bosquinianu.

Poques esperiencies formatives tuvi más enriquecedores que’l mio pasu pel Colexu Públicu “El Bosquín” al que m’incorporé pa entamar en quintu cursu de la EXB. Al empezar cuartu cursu nel Colexu Públicu Marcos Peña Royo (actualmente “El Coto”) detectáranse deficiencies nos cimientos y hubo que lu derribar; al alumnáu y al profesoráu llevábennos n’autobús hasta les escueles d’El Serrallo. Mio ma, que siempre tuviere mieu de qu’andaremos en carretera, decidió cambianos d’escuela a la mio hermana y a min.

     Nun dexa d’abultame simpático  que lo qu’entamó por una resquiebra nos cimientos d’aquella otra escuela fuera la base na qu’aposienta la mio formación. Yo, qu’hasta entós namás me relacionare colos neños de La Vega, El Coto y la Barriada Santa Bárbara, descubrí un mundu nuevu: el contactu colos compañeros y compañeres que baxaben, naquella filera de seis o siete autobuses grandes y qu’aconceyaben a les puertes d’El Bosquín a los neños de Bédavo, La Fayuca, La Fayona, La Güeria, El Pullíu, Llantero, Tariz, San Vicente, Rebollos, La Llaniella… Toos ellos baxaben coles sos histories particulares que facíen qu’aquel neñu que nunca saliere del “burgo” estelare: l’aprendizaxe nun quedaba llimitáu namás a les aules.

     Abultábame bien poco lo que taba con ellos, namás les clases y la media hora de recréu, asina qu’a eso de les doce y media, escapaba como una posta pa en cá mio güela y comía apriesa por ver si llegaba cuanto primero al patiu.

     Los que nun quedábemos en comedor teníemos prohibida la entrada al patiu hasta les dos, pero yo esclucaba y, cuando nun había señorites nin maestros que guardiaren el patiu, saltaba la tapia pa mezclame colos cerca de cuatrocientos alumnos y alumnes que llegó a tener El Bosquín. A veces yera tan rápidu nel comer y dar la vuelta que llegaba enantes de que’l turullu anunciare’l segundu turnu del comedor. Porque había dos turnos: el primeru, nel que comía l’alumnáu de los primeros cursos (más aquellos que s’ofrecíen de voluntarios pa servir y cuidalos) y dempués el restu. 

     El comedor y la cocina ye un elementu fundamental al falar d’El Bosquín: aquel aroma a cocíu que nos facía ruxir les tripes cuando baxábemos al recréu (y qu’aprovechaben los de los viaxes d’estudios pa vendenos pinchos) sigue tando presente al tresviés de los más de venti años que me gradué. De vuelta a El Bosquín, percíbolu claro: cierro los güeyos y el camín del arume llévame otra vuelta a aquel mundu en que sentíemos el chocar de les cuchares y la cacía, un mundu pequeñu nel que la directora salía a poner orde nes files con un megáfonu; vuelvo  ver  aquel profesor que salía al patiu pela puerta d’atrás de la cocina y mordía un llimón hasta dexalu secu; nun escaecí entá’l color de los “senderos del libro” y el “grupu de llectura” del maestru Severino (nun había mayor premiu que confiare facer dalgún recáu al so despachu, al Seminariu); alcuerdo de la claridá qu’había na biblioteca onde podíemos lleer tolos comics de Tintín y d’Astérix; del salón d’actos onde vinieron dacuando en vez a danos charles o onde nos baxaba la maestra de música paque ficiéremos audiciones (que consistíen en sentir los elepés de música clásica nel tocadiscos) qu’ella escuchaba colos párpagos zarraos, cuásique adormecida…

     Ca requexu d’El Bosquín contién una anéudota y ca anéudota ye una enseñanza. N’octavu cursu, nel añu 1992 consiguí nesi colexu’l graduáu escolar. Entamaba una nueva etapa educativa pa min, pero enxamás dexé de ser y de sentime ún d’El Bosquín. Les enseñances que tuvi, les vivencies, acompáñenme’l restu de la vida. Nun me refiero solo a lo que los profesores nos deprendieron: refiérome a eses otres enseñances qu’emanen de la convivencia.

     El Bosquín aportóme aquel otru mundu que vieno de la mano de la convivencia con xeste de distintos llugares y acentu; na facultá de filoloxía, estudiando l’asturianu, sentía munchos fenómenos llingüísticos que traíen aquellos compañeros na so llingua; munches de les sos vivencies, que compartieron comigo, sirviéronme y serviránme pa siempre.

     Eso ye, en definitiva, lo que significa, n’esencia, la educación pública.

     Ún siempre quier lo meyor pa los fíos; por eso, cuando al mio neñu-y tocó la hora d’entamar el so camín formativu y educativu, quixi que los sos pasos siguieren los míos y nun dudé en batallar hasta consiguir qu’entrare n’El Bosquín. La melancolía, que n’asturianu tien el guapu nome de señardá, trae estes trampes.

     
De momentu tengo la certeza de que nun m’enquivoqué.