8

Nuna peña al llau de la caleya, onde facía enllanadina, apaeció pintáu un ocho mariellu. Naide-y dio importancia: Sicasí, el trasiegu d’aquel camín creció. Súpose poles pataes en suelu. Entrugáron-y a Peito, que pasaba tolos díes al ganáu, qu’a santu de qué pintara aquello y él xingó los costazos: “Coses del ayuntamientu o del ministeriu. Buena burra me morrió…”

Una tarde entró en chigre, tres guardar les oveyes y echa-yos cebera, pidió un vasu y comentó: “Agora da-yos por tirar claveles” y nel silenciu sentíense les fiches de dominó y les baraxes arrastrar.

A la mañana, un golor berrón, a disolvente, llegaba dende la cuesta y
Peito vio qu’esborronaren malcurioso’l númberu y dexáranlo como la gocha. Los claveles taben machucaos en suelu. Comentó pa sigo: “polo menos podíen ser más curiosos, coime”. A la de baxar, un golor a pintura mecíase cola folla moyentao del camín. Retularen otra vegada aquel númberu, agora en colorao y ente almiraciones: ¡8! Los claveles asomaben enriba la piedra, pa que nun fueren pisotiaos. “Vaya gana comedia que tien la xente”.

Al día siguiente el fedor de galipota embarguiaba tol pueblu. Tola peña taba bañada naquel untu aceitosu y los claveles, amostalgaos. Pero a cosa d’unes selmanes la piedra taba llimpio; rascárenlo vete tu a saber con qué, ¡vaya trabayu!, y llibres de mofu, rescamplaben unos furacos que pintaren de colorao.

Peito, que casara con una muyer del pueblu, decatóse de qu’aquello yera dalgo gordo que venía d’atrás. Por más qu’entrugó en pueblu, naide nun-y quixo dar razón. El chigreru y los veceros miraben unos pa otros, con desconfianza. Foi la suegra la que-y contó qu’ellí había ocho vecinos enterraos, dos d’ellos padre y fíu, d’una batida cuando la guerra. Qu’agora -en pueblu sabíase too, el nietu d’ún d’ellos pintaba aquel ocho y qu’ún de los paisanos a los qu’acusaben del chivatazu- yera’l d’esborronalo.

Al día siguiente Peito paró enfrente la peña. Embaxo del ocho vio les mozquetadures de les bales y recitó los nomes de los que taben apilaos embaxo.

Entá taba esteláu de cómo nuna cifra había tantu dolimientu.

Quién fuere perru...

    La historia que vos voi contar sentíla a un paisanu que falaba con mio pá, dambos arguyosos de pertenecer a la clas obrera y trabayadora. “Ganase lo que llevamos a la boca llevantándonos tolos díes ye lo que nos diferencia de los animales, lo que nos da dignidá. Que nun-y lo debemos a naide.” Aquel paisanu díxonos:

    Esto yera un fíu que taba fartucu de trabayar y díxo-y al pá que pa vida bona la que tenía’l perru, que taba panza arriba faciendo xigomencies coles camparines. “Á fíu, ¿paezte?” y el guah.e comentó que sí, papa, que’l perru taba tol día echáu de la qu’ellos palotiaben; que s’echaba al sol cuando taben segando; que si esto y si lo otro y bien feliz que paecía…

    El pá sentenció: “Nun se fale más. A partir de mañana, perru serás.”

    Y al día siguiente, de la que’l pá taba palotiando, segando, cargando fardos, apradiando y rastrexando, el fíu miraba pa él echáu a la solombra d’un fresnu, moviéndose namás que pa quitase del sol.

     Nesto llegó la muyer de despachar el ganáu, cola manieguina de la comida y tendió’l mantel y punxéronse a comer. El pá, al ver que’l fíu s’acercaba, garró un peñón y azotó-ylu.

     “Futiando, perru, tate p’allá”, y púnxose a comer. La muyer, alcagüetona, protestaba qu’igual tenía cuayu pa dexar al fíu ensin comer. “Perru tengo, muyer, fíu non. Quien trabaya como perru, ha comer como perru”.

     Y dacuando, moyaba un tarucu de pan na escudiella y azotába-ylo de tal manera que’l rapaz brincaba y esparabaniaba y les más d’elles, cayía’l pan al suelu y cola fame, comíalo sucio y too; y eso si nun-y lo quitaba’l vivu del perru, que reviraba’l canil porque nun-y prestaba pa nada compartir lo poco con naide.

    Al día siguiente, a la mañana, taba’l fíu aguardando pol pá colos preseos al llombu pa dir trabayar. El pá entrugó: “Entós, ¿ello qué ye? ¿yá nun quies ser perru?”

    Y retrucó-y el fíu, como bien recordaba Aitana Castaño que dicía siempre’l güelu, “¡Ai, papa, quién fuere perru menos a la hora de comer!”

Deprendiendo a tastiar el mundu, nel cielu la boca

     Cuando neñu yera mui fartón. Sigo calteniendo esa zuna. Puédeme l’ansia: como a papu enllenu. Mio pá, daquella, intentaba a deprendeme a tastiar lo que taba mazcando y tragando entero, como faen los pavos.

     La comida, dicía, hai que lo llevar al cielu la boca. Abría la so boca y cola pica la llingua señalaba pal cielu. Yo intentaba de siguío face-y casu: metía les cuyaraes de cocíu ferviendo na boca y pegaba un allaríu y buscaba, azacanando, l’agua.

     Mio pá tornaba a reñeme. "Nun basta con llevalo al cielu: hai qu’esperar el momentu afayadizu. Hai que cuidar l’ansia y deprender a tener paciencia. Si quemes el cielu la boca nun vas ser pa saborguiar la comida en condiciones, y va date igual comer un filete que la suela una chiruca."

     Güei diome por pensar nello. Daquella nun lo sabía pero, al reprendeme y deprendiéndome a comer, col cielu de la boca como meta, mio pá taba tresmitiéndome tola sabiduría d’una vida, la suya, la que llevaba a cuestes.

   Nel cielu la boca, dicíame cuando comíemos pexe, yes quien a estremar si hai espines, pa nun t’atragantar.

     Agora, dempués d’una temporadina na que tuvi munches quemadures por meter más bocáu de lo que podía revolver; agora, cuando les pasé d’a quilu poles espines que nun supi alvertir estrellándoles contra’l cielu la boca; agora, esti mosqueteru gachu, esti perru caleyeru vuelve a les andaes pa escribir los sabores d’una vida, los bonos y los malos, nel cielu la boca.
     Los sabores d’una vida. La mía.

A estaya: un western asturianu

Sidoro Villa Costales
A estaya
Impronta, Xixón, 2016 (97 páxs. 10 euros)

     Sidoro Villa Costales tien una manera d’escribir posada pero firme, neto a lo que faen los sos personaxes, tal como lo describe na so novela (imperdonable qu’entardare cuatro años en poneme a lleela). Sosprende una prosa aparentemente tan cenciella pero, al empar, tán cuidada. Una prosa guapa, de falante d’asturianu que se pon a escribir y tresciende lo que diz; una prosa que naz de la oralidá y se fae arte; una prosa onde se pon procuru cuásique poéticu nes descripciones, onde nengún atapacer, nengún amanecer, nenguna vista dende’l llagarón ye la mesma.

     Quien me la recomendara comentábame que yera mui asemeyada a A esmorga, d’Eduardo Blanco Amor, (tornada al asturianu como La Folixa por Xosé Miguel Suárez, Mieres del Camín, Editora del Norte, 1996). Por embargu, nun tien nada que ver sacante l’afición a la bébora: d’un llau, La folixa ye un viaxe de tres amigos, un descensu a los infiernos en clave tremendista, un viaxe al tresviés de la nueche y la borrachera, demientres que A estaya ye xusto lo contrario: un duelu, una posa...   

     Poro, la historia que cuenta Sidoro, sábelo bien quien escribe, nun ye fácil de contar. Nin siquier el periodista de la novela, llamáu pa facer una crónica del eventu, sedrá quién a ello. Ye una historia digna de western (y asina lo ve él y nos lo diz na novela: “Asina qu’acabaron callando, y el silenciu yera incómodu, como nun salón del Oeste cuando apara la música porque yá s’albidren los tiros.”); una historia más que de saloon de western, pola tensión na que se vive; de posada cervantina, polo que tien de cruce de caminos y de destinos, de noyu onde coincide una mayestra, un periodista, una pareya de la guardia civil, un burgués, los mineros, un marqués, un antiguu fugáu, un pensionista, un mélicu, los del pueblu…; una historia, sobre manera, de chigre asturianu. Pero non d’esi chigre aventáu a la salida d’una mina, non un chigre de villa onde siempre hai vecería estrando les meses; más bien d’ún d’esos chigres de pueblu apartaos, a desamano que facíen de centru social.

     L’argumentu reduzse a un duelu: tres bebedores queden pa ver quién ye’l que más resiste bebiendo sidra a estaya, como s’apregona nel títulu.

     Pero nun ye una historia fácil de contar porque la acción novelesca ye mínima y repetitiva: culete va y culete vien, d’ente ocho y diez minutos cada ronda. Y por embargu, Sidoro Villa revélase maxistralmente como un narrador: si nun se pue contar n’estensu, esto ye, poles acciones, hai que contar n’intensu, esto ye, polos personaxes. Y los personaxes de Sidoro, como los del western, garren traza de personaxes tipu: el mozu, el resabiáu, el célebre, el chigreru, la muyer… Estes son les riegles del xuegu y Sidoro persabe que pue ser servil o siguir col plan: escribir en profundidá. A partir d’esos personaxe tipu, fáe-yos un molde nuevu, distintu, estremáu. Garren tastiu nuevu y profundidá sicolóxica, garren personalidá gracies a un recursu pañáu de la convención teatral pero que na novela tien calter d’aparte: entamáu pol nome del personaxe en cuestión, en mayúscules, metémonos nos camientos de so y decatámononos de lo que piensen y, lo que ye más interesante, cómo piensen. Cada personaxe piensa distinto y esto amuésase na manera de falar.

     Nun ye una historia fácil pa contar, cuásique ye asfixiante narrativamente: una acción acutada, la del duelu, que de poco en poco va perdiendo trescendencia y queda, a la vista, el verdaderu rescampliu de lo que se quier contar: la historia de toos y caún de los personaxes y de les estremaes rellaciones que se van texendo ente ellos; nun espaciu llendáu a poco más d’El Llagarón de Visiegos y de la contorna, el verdaderu paisaxe ye humanu (otra vegada más, como dicíemos, esi narrar hacia adientro): los accidentes xeográficos y vitales que se cuenten y s’apunten na narración faen que podamos escarabicar pente’l megollu de les pallabres, qu’han dar más de sí.

     Nun ye una historia fácil pa busca-y un final. Y el final, cuido nun facer nengún spoiler, ye de lo más significativo de la novela.   

Folganza: articulismu que se-y da meyor que nada

Ismael María González Arias

Folganza. Folgando, que siempre se me dio más bien que nada.

Saltadera. Uviéu. 2018 (240 páxines. 19 euros)

Hai poco nesti mesmu blogue declaraba la mio pasión poles recopilaciones d’artículos, con cuenta de la reseña del llibru de Luis Arias Argüelles Meres, Testigo de un tiempo. Si un llibru d’artículos ye una bona nueva, un llibru d’artículos n’asturianu camuda, nun chisgaravís, nun verdaderu acontecimientu (¿nun lo ye acasu la espublización de cualquier llibru en llingua asturiana cola que ta cayendo?).

Folganza atropa la producción columnística del mierense Ismael María González Arias, y recupera’l so llabor de va pa más de venti años (que yá llovió). Quien tuviere la suerte d’asistir a cualquier cosa qu’organizara Mael y de la que fuere presentador, decataráse de la so facilidá pa entretener. Primero de nada, a Mael adórnalu la virtú de ser un bon conversador, un escelente contertuliu. Y estos artículos, esta prosa de so, guarden muncho d’ello.

El llibru garra consistencia a cuenta de tres recursos: el primeru, los artículos apaecen afilvanaos pola espresión “folgando, que siempre se me dio más bien que nada”. Conviértese asina nel estribillu o nel leit motiv del llibru, un cantarín que garra delles tonalidaes d’acordies col tonu del artículu, anque les más de les veces seya socarrón, con esa ironía fina que gasta Mael.

Otru de los recursos ye la recurrencia nos temes (en delles vegaes, hasta se repiten los títulos, como “Belarmino Tomás” o como la serie de tres artículos nomada “Centru comercial”) que paecen axuntase en noyos temáticos: políticos, cola vida de los conceyos; culturales, con atención a los cambeos que se producen na tradición asturiana y los sos desafíos; sociales, col cambéu constante a cuenta de la desindustrialización, l’acabón de la minería y l’apaición de nuevos arquetipos sociales, como la figura del prexubiláu…

En verdá, la vida política de los conceyos, les miseries pequeñines, que son doblemente miseries, la mirada culta, tresversal, sobre dellos aspectos de la cultura asturiana (non solo la llingüística, pero tamién la llingüística), son exes temátiques alrodiu de les que s’arma esti libru; xunto ello, atoparíemos la tercer de les característiques qu’ayuden a dar cohesión al llibru d’artículos: l’estilu. L’autor va desendolcando la personalidá del articulista con toques propios: anécdotes, dichos que sintió y que vienen a cuentu, que rescamplen nel cuerpu del artículu y, amás de poner el ramu, arrínquennos una sorrisa (“El cielu pelos bárganos”, por exemplu); la facilidá pa buscar casos y comparaciones con situaciones que resulten pareyes n’otros llaos del mundu o del tiempu; la so bayura cultural y la vocación de viaxeru.

Consiguimos, de la que vamos lleéndolos, formanos una idea del autor: llambión (“La casadiella oficial”, “Carbayones de comer”, “Dulces suaños”), coñón, folgazán (que siempre se-y dio más bien que nada) y sobre manera, ensin mieu a la corrección política qu’argayó pela década del dos mil y que tantu dañu fexo (¿podría escribise güei l’artículu “Mayu del 68”?); como bon articulista, cumple con aquel primer preceptu que ye la independencia y que se podía traducir popularmente con “nun se casar nin con Dios” (nesl casu de Mael, con nengún Dios, pámique): artículos como “El Bono” o “Que trenta años son nada” dan cuenta d’ello.

La vida política asturiana, dende la vida de conceyu a la primera llinia rexonal tamién apaez chiscada per estes páxines  y estos artículos, con esa retranca áceda que tanta mancadura fai:  “Belarmino Tomás”, “Nuestru señor de Rodiezmo”, o dellos fenómenos, como la sobreimplantación de grandes centros comerciales n’Asturies y de proyectonos grandonos (“Plan Urban”, “Muséu de la Folganza”) que marcaron la dómina arecista y que, amás de dexar rastru nestos artículos, foi exa temática de delles noveles de Xosé Nel Riesgo, como Parque temáticu o Venti negrinos.

Nesti sen, duel ver cómo muncho de lo que se toca nesti llibru escritu va venti años tien vixencia o, lo que ye peor, los badagüeyos cumpliéronse pa mal, sobremanera no que cinca a la cultura asturiana.

Tamién, ente ellos, hai pieces que se revelen verdaderamente maxistrales, lliterariamente sublimes: “Xagó”, por exemplu, merez figurar en cualquier antoloxía de la prosa asturiana.

Tamién en munchos d’ellos Mael escribe párrafos que trescalen hasta'l tuétanu: “Asturies ye’l país con mayor capacidá pal olvidu. Ye posible qu’hasta seya una seña d’identidá”.

Nun nos escaecemos nós, llectores, de que tien pendiente una nueva entrega. Y yá sabemos que-y presta folgar, que siempre se-y dio más bien que nada, pero va siendo hora de que dea a la lluz aquellos otros artículos tan guapos sobre, por exemplu, les munches acepciones de la pallabra país, o de lo que-y pasó al indianu col garabatu. Olivamos por ello.

En chinu

Paecería una novela distópica de Nicolás Bardio, Mao Tse Tung en Valdesoto, de nun ser una realidá bien murnia. Al alcaldón de Siero un escritu n’asturianu abúlta-y como presentáu en chinu. Yá vemos qu’eso de dar llingües que valgan pa daqué, como’l chinu envede l’asturianu, yera una mentira. Col chinu, rapacería, que nun vos engañen, yá lo veis: nun llegáis nin a Viella. Porque al alcaldón de Siero tantu respetu -y merez l’asturianu como’l chinu que falen, de xuru, munchos de los vecinos que paguen impuestos (en castellanu estándar mesetariu) y tributen nesi conceyu.

L’alcaldón de Siero gasta traza de cosmopolita pal que’l mundu acaba nos pirineos. Aporfía que nun entiende la llingua de parte (de gran parte, toi por apostar) de la xente de los cantones de Carbayín, Curuxona o El Berrón. Sí, esa llingua rica en fenómenos como la metafonía y el neutru de materia, esa llingua que ye lo cotidiano de lo más de la xente a lo que representa, suéna-y o paez-y chinu. A lo menos, diz que-y merez el mesmu respetu: nengunu. Los derechos llingüísticos (que non la voz de la derecha) abúlten-y eso: un cuentu chinu.

L’alcaldón marirregueriegu del Carmín de la Pola gobierna con vara mandu nuna ciudá dormitoriu onde s’entretienen nel arte de pintar palafitos nos güevos envede tallar cuélebres de xade. L’alcalde esvanezse de suañu, princesín rubendarianu. Y ye que yá se sabe: ponse ún a fabular y, de sópitu, envede alcalde descúbrese emperador; les comedies de Noval camuden nuna amuesa del teatru tradicional chinu y los guirrios, en guerreros del Xian. L’emperador de Siero, asomáu a la so ventana ve alluendi cómo s’alcen les tribus enemigues navetes y los revenganos yerbatos y camienta facer una muralla china, de la que namás-y queden los resclavios: les autopistes. Con mano firme manda mensaxeros pa que dean anuncia de que van tar penaos los dazibaos que dellos de los meyores escritores en chinu d’anguaño (Pablo X. Suárez, Sidoro Villa, Sergio Gutiérrez Camblor, Rubén d’Areñes…) escriben.

Si nun fuera tan murnio, sedría pa chinase.

Escoyer el compromisu

     Señor Presidente del Principáu, Escelentísimu Rector Magníficu, Señor Presidente de l’Academia de la Llingua Asturiana, Académicos, autoridaes en representación del pueblu asturianu, amigos y amigues que m’acompañáis nestos momentos… 

     ¿Queréis que vos cuente un cuentu? Ello yera y nun yera y taben arando y los fíos que nun teníen, taben afesoriando… 

      Esta historia, la que me traxo equí escomencipia asina: con un rapaz, un sábadu de chornu, a la tarde, con una páxina en blancu y una ventana abierta. El futuru, por facer. Zarra los güeyos y ponse a escribir. Persabe que la vida garra un sen y un determín a partir d’entós. Una persona nun escueye les llingües nes que naz como nun escueye la familia, nin el país. Pero sí pue escoyer el compromisu. Yo vengo d’una familia onde solidaridá y compromisu son valores que nos marcaron; y el preciu a pagar nun foi baxu. Trabayar por, dende, pa, sobro, cola llingua asturiana tien muncho d’esi compromisu y d’esa solidaridá, y asina lo hai qu’entender: el compromisu ye facelo por, dende, pa, sobro, con un patrimoniu común: recibir esa heriencia y naguar porque nos sobreviva. Como dicía’l poeta Pablo Rodríguez Alonso yo nun quiero que “la mio boca seya fuexa a la mio llingua”. 

     De mozu decatéme de la realidá na que vivía: había una llingua que nun falaba, anque escribiere y lleere nella; había otra na que nun escribía, nin lleía, anque fuere la que más dicía del mio mundu. Cuando mozu pensaba que l’arte yera a rediminos y forméme: la suerte tuvo comigo y como compañeros de viaxe dispunxo bonos maestros, cicerones a los que ye obligao reconocer el so maxisteriu, porque son maestros de docentes: Severino Antuña, Vicente Rodríguez Hevia y Asunción Hevia, “Suni”, enseñáronme con cuánta querencia se pue amar una llingua, cualquier llingua. 

     Aquel mozu, el de la ventana abierta a un agostu de chornu, contaba cola illusión de da-y voz a quien nunca nun la tuviere, na lliteratura, y en llingua asturiana. Una sociedá amuesa la so calidá democrática cuando tien en cuenta toles voces, independientemente de la llingua que falen. Como filólogu, como escritor n’asturianu, como ciudadanu: esi yera’l mio oxetivu. Como afilvana’l poeta y compañeru Chechu García, d’esa patria que ye la Tertulia Malory, nun versu maxistral, yo garré la vocación, a lo primero, “atrayíu pola mística d’un mundu que muerre”. 

    Aquel sábadu, en Cangas de Narcea, demientres los cursinos de l’Academia, esi rapaz que yera, que fui dalguna vez, escribió la historia de so pá cuando carboneru. Guardélo nuna carpeta de gomes y púnxi-y un lletreru: los paraísos perdíos. Aquel títulu convirtióse nun enfotu personal y nun badagüeyu: la llucha romántica, les vueltes, toles vueltes que dar, escontra l’escaezu, ente aires de mudanza, al aldu los caminos, al aldu la memoria, nortiando pa contra’l color de l’ausencia, nun tiempu d’esiliu y povisa ayeno. Tomo emprestaos, esta vez, unos versos de José Luis Rendueles, compañeru y amigu, que tamién falen nel dialeutu del grisú: “quien nun tien onde dir, llega ceo, / pero quien tien una meta yá llegó / anque inda tea en camín.” 

     Cola primera ringlera eché andar pel camín. Entagüéi sigo en camín, nun camín que nun s’acaba. En castellanu y n’asturianu combiné y tenté d’armonizar los dos mundos, les dos llingües qu’aliten en min. Nun hai conflictu nengún: son ferramientes que m’arriquecen. Nun hubo renuncia, sinón reconocimientu. D’aquella consciencia llingüística nació la conciencia llingüística y lliteraria. 

    Nesti puntu del camín acuéyeme y reconozme l’Academia como miembru correspondiente: una institución a la qu’almiro y cola que vengo collaborando; onde, amás de grandes maestros y maestres, amás de grandes exemplos de lo que ye’l compromisu col asturianu, hai grandes amigos. Onde conozo de la renuncia y sacrificiu personal de tantos y de toos: dende’l presidente a la secretaría Téunica, con un personal que trabaya con un enfotu emponderable. 

    Entro en l’Academia de la Llingua Asturiana cola illusión de siguir aportando y trabayando pol idioma. Esti nomamientu hai que lu concebir como los ánimos pa siguir nel llabor. Como investigador, estudiar la lliteratura de los nuestros clásicos, onde queda tanto por dicir y por descubrir, ábreme les puertes a nueves potencialidaes del idioma; como llector de la xente colo comparto tiempu y espaciu, ye una manera de reconoce-yos los aciertos; de que sepian que daquién hai a esti otru llau de la fueya y que’l so esfuerzu nun ye en devanéu. 

     Como docente, namás se pue enseñar lo que s’ama y cuento que los mios aciertos pedagóxicos, na UABRA, nos cursinos d’adultos, na ESO y nel Bachilleratu o nes comunidaes d’asturianos y asturianes y de los sos descencientes en Chile y Arxentina, vienen perende; cada alumnu y alumna enséñente la manera de relacionase cola llingua seya en L’Infiestu, en Grau, en Llaviana, en Santiago de Chile o en Rosario (Arxentina). Nunca nun dexé d’aprender d’ello, porque la fuerza, la vitalidá d’una llingua reside en quien la fala. 

     Como creador, foi’l mio suañu brinda-y la voz a quien nun la tuviere hasta entós; plasmar per escrito un mundu que se tresmitía pel aire y reposa na feble memoria de quien lo siente; hai tanto de creación nes mios obres como de recreación. Cuento que ye eso lo que l’Academia de la Llingua Asturiana y quien me llee ven en min: la posibilidá de reconocese, de recuperar una parte de sigo, porque hai requexos del alma, eso enseñáronme alluendi’l mar, n’Arxentina, en Chile, que namás retinxen n’asturianu. 

    Y eso ye, más que nada, lo que puedo ofrecer: el mio compromisu, la mio heriencia. Traigo comigo les pallabres que me dexó en prenda tanta xente, porque la llingua asturiana ye un patrimoniu común; traigo les pallabres qu’armen el mundu de Feliciano’l paragüeru, de Ludi, de Lluisón el material, de Vina, de güelu Cheri, de Linuca l’Argollana, Maxide, Tivo’l de Sorriego; ellos siguen falando agora per min; colecciono pallabres enduvielles como egragópilos, pallabres que burbuxen y achisben pel fueu, pallabres qu’enantes de facese solombra restallen y allumen, coquinos de lluz metanos la nueche y que nos xuncen, trespasando la muerte, con quien nos enseñó a poner nome al mundu; traigo comigo un mapa sentimental enllenu de topónimos cuásique escaecíos: Los Uranes, El Campiciu, La Zorea Cima, La Perallonga, San Andrés de Llinares, el Picu La Triguera, Les Cubes, Campa Cimera… 

   Pallabres nes que guarez el son de los arrieros y l’españíu de los barrenistes; sé del ruxir de los patios d’escuela y de los xuegos onde nos sentimos neños na barriada obrera de la plaza Santa Bárbara; na nueche adormezo col sonsonar de los ciegos, como’l Bique, al vigulín en Rales; amanezo y encoplo los cantares de los bandurrieros, y arrespígome cola asturianada con que despiden en chigre los mineros al compañeru muertu; en corazón retumbia la trompa de los ferreiros de valle en valle… 

   Atrayíu pola mística d’un mundu que morría, garré la responsabilidá que, como falante me tocaba: el mio compromisu nun ye otru que’l de la xente que cada día escueye l’asturianu pa encadarmar el so mundu; seya cual seya: porque la llingua asturiana, y neso taba enquivocáu, nun ye solo la llingua d’un mundu que muerre; ye tamién la llingua del futuru: del cosplay, de la xenética, del cine, del manga, de la ciencia y de la informática. 

     El nuestru compromisu nun ye otru que dexar a quien venga la heriencia d’eses pallabres coles que nomar el mundu, cualquier mundu. Sé que nesta xera, nesti compromisu nun toi solu. Sé qu’hai más xente como aquel mozu que fui, enfrente d’una ventana, dimpuesto a trabayar por, dende, pa, sobro, cola llingua asturiana. A esa xente, a esos que son y nun son y tán arando, y los fíos que nun tienen tarán afesoriando, ensin dulda, na nuestra llingua, prestaríame empobina-yos una adaptación de los versos finales del poema citáu de José Luis Rendueles: 

    “Anque nun tengas onde dir, si caltienes 

   esperances en dalgo, nunca vas tar solu dafechu. 

   Inda ta peor el que yá les perdió [esperances y pallabres] va tiempu”.

Semeya cortesía d'Iván G. Fernández