Les muyeres de los mineros (madres, esposes, fíes...) y muches muyeres mineres de les cuenques carboníferes de toa España xuniéronse pa dir al Senáu pa que sos señorías escucharen la voz del pueblu al que dicen servir. La rempuesta fue humillales desnudándoles al entrar cola escusa de que podíen llevar dinamita, y desaloxales dempués cuando alzaron la voz, que yera la voz de toles nuestres cuenques.
A elles, a la so llucha que ye la nuestra, exemplu de dignidá, van estos versos humildes y asonantes nos pares.
Les muyeres vanse vanse
a la capital maldita
onde aquellos senadores
quieren quita-yos la vida
diciendo qu'al pueblu sirven
siervos son de la mentira
vanse les muyeres vanse
col alma tan combativa
tienen l'orgullu de ser
del mineru madre, fía
compañera infatigable
nes sos nueches de vixilia
pa sacar la casa alantre
y ver que pasa la vida.
Les muyeres vanse vanse
y na capital dormida
hermandá, llucha, ira
van cantando calle alantre
el cantar del alma altiva
el cantar que nun s'apaga
que nun conoz cobardía
que tán al pie del mineru
combatiendo nueche y día.
Y al entrar al gran Senáu
escurren sos señorías
por si esconden dinamita.
¿Qué temen tanto señores
d'esti pueblu que -yos grita
que quier un futuru dignu
que quier la pallabra escrita
qu'empeñaron sangre a sangre
les cuenques que tán ensin vida?
Confundiéronse señores
confundiéronse señorías
de la meyor dinamita
la dignidá que contaben
que la teníen perdida
ye l'honor col que se canta'l
“Santa Bárbara bendita”
mentres los perros lacayos
les echen de la so vista.
Allá ustedes malos homes
allá con so mala vida
envede representanos
échennos esta partida
si alcen al pueblu en so contra
esto tien mala salida.
Les muyeres vanse vanse
la so voz dignidá viva,
¿Qué silenciu habrá qu'apague'l
Santa Bárbara Bendita?
No hay comentarios:
Publicar un comentario