En monte, al pisar pela nieve, ye importante siguir les pataes de los que van delantre, marcando’l camín. Siénteste seguru y canses menos.
Arienza diba abriendo
camín pa que’l restu pisare seguro y cansare menos. Conocía’l monte porque lu
amaba y tresmitía esa pasión.
“Cuando ún me pregunta
si queda muncho, yá sé que nun-y ta prestando”, comentóme, “porque cuando
disfrutes del monte, chavalín, nun te preocupes de lo que te queda”
A Javier Arienza
brilláben-y los güeyos viviegos y aquella sorrisa frescachona de neñu cuando contaba
coses del monte que manaben del cañu de la esperiencia propio. Yera una persona
xenerosa dimpuesta a compartir la vida con ún. Chocaba aquella cercanía d’un
montañeru que trayía nes botes tierra y piedra pisao de tantos picos, de tantos
montes, de tantos continentes. Xenerosu y humilde.
Tratélu de va poco, pero
ye muncho lo que m’enseñó. Ye muncho, poro, lo que-y debo. Más allá de saber
que nun hai picu Campigüeños, del sabor a ablana de les macrolepiotes, del
romance del osu y la pandereta, de los nomes de la tierra…
Hai xente a lo que-y
debemos que t’enseñe los requexos del mundu, pero a Arienza debémos-y (yo, polo
menos) esa manera emocionada y tranquila de contemplalos.
Maestru de montañeros,
compañeru siempre. Nes rutes poníase dacuando percima del grupu, pendiente de
que naide nun quedare atrás, coles manes vueltes a la espalda, perbaxo de la
mochila, y aquel andar tranquilu y elegante.
Y digo maestru pola
escuela que dexó, una escuela como una familia: el Grupu de Montaña “Texu”. Una
familia na que facíemos por encaxar esta tanta y tan grande güerfandá na que nos
dexa.
En monte sabemos
apreciar muncho bien les güelles de los que van delantre. Arienza dexó güelga,
marca, en toos nosotros. Esta güella nun va ser de baldre; esa güella nun va
quedar en vacíu: vamos enllenala colos munchos recuerdos y enseñances que nos brindó.
Quédennos los inmensos caminos del monte,
el seu abiertu na peña, los cielos n’abertal que nos enseñó a mirar, almirar, amar.
Arienza tenía los güeyos viviegos y la
sorrisa de neñu.
Precioso Pablo....
ResponderEliminarSolo le vi una vez, en un autobús q no podía subir más x la carretera a Tarna, x una intensa nevada. Improvisó una travesía preciosa. X cómo le estáis describiendo, me doy cuenta de la gran pérdida q ha sido. D.E.P. y mucho cariño a todos sus familiares y amigos.
ResponderEliminarPablo, muy buen artículo que describe perfectamente a Javier en el entorno que lu conocimos.
ResponderEliminar