Que la vida diba en serio

Asina, como entama un poema de Jaime Gil de Biedma, quiero titular esta entrada que nun ye otro qu'una despidida, la constancia de qu'ún va faciéndose mayor (ye dicir vieyu) y xunto los achaques, dolores de llombu y baldadures, y llaceries varies, los años van arrequexándolu de poco en poco. Too entamó cuando la reciella me miró torcío a la hora de xugar a les caniques; depués alcuérdome de mio madre reñéndome por mercar sobres d'indios, como los llamábemos, en Ponciano; y asina pasando pequeños ritos de pasu (les factures al to nome, un aniellu en deu, un ser al que ves crecer y te llama papá...), llegamos al últimu episodiu: yá nun podré publicar nunca más en Formientu. La revista moza, mui moza, escrita por xente mozo va soltando, de poco en poco, a los mayorinos a qu'andemos pel mundu a soles. Demientres, van entrando pela puerta xente mozo, relevu qu'asegura la continuidá inmediata de la lliteratura (que tando como tamos, ye yá muncho). Y cola edá, que lu fae a ún más sabiu, y repunante, arrepiéntome de nun tener collaborao en tolos númberos que pudi. Ye la mio historia de siempre coles revistes.

    Sicasí, señardaes aparte, esti númeru de Formientu ye un pasu más na reafirmación de la revista. Bones collaboraciones en xeneral (la narrativa breve na que destaca'l catálogu impagable de los cielos de Pablo A. Quiroga Prendes o la poesía dura de Ricardo Candás xunto cola voz personal d'Héctor Pérez) que van abriendo camín y esplorando rexones pa la narrativa como l'apueste futurista d'Inacio Rodríguez Solar o'l rellatu urbanu y xuvenil de Jorge Fernández García; cumple entós Formientu col propósitu col que se vio nacer y qu'Inaciu Galán (entamador oficiosu y trabayador de tantes sestaferies culturales en favor de la nuestra llingua y cultura) nos recuerda dende l'editorial que titula "Un númberu de transición" al que pon el ramu col epígrafe "Formientu, cinco años faciendo la lliteratura del futuru". Van cinco años yá (sí que ye verdá, que'l tiempu pasa) y, quien tuvo y tien o tenga l'atrevimientu de sacar una publicación periódica sabrá lo difícil que ye xestionar cada nuevu númberu, el mieu a que cada pasu que se da seya yá'l definitivu. Con too y con ello, Formientu va faciéndose mayor y meyor a cada nuevu pasu: l'aciertu del diseñu, la mesura y la escoyeta de los materiales, el procuru a la hora de distribuir la tipografía, la modulación de los colores faen que la publicación, modesta, seya al empar digna y durable, y les errates, anecdótiques.

     Si creyere na reencarnación y tuviere la fortuna de renacer n'asturianu col vezu y la zuna d'escribir nesta llingua, camiento que daría los mios testos a Formientu. Sedría una mui bona carta de presentación. Demientres, miraremos nesi espeyu l'alendar de la reciella, nosotros, los que vamos pa vieyos, que non pa clásicos.