El saludu gánase

De la qu’entamé a poner clas en Grau una tarde (sí, los profesores trabayamos tamién peles tardes, munches tardes) empobinaba pal institutu detrás de comer nun chigre. Crucié cola reciella que salía, ruxerruxendo, escorriéndose, esgargayando, camín de casa. Saludélos ya inoráronme. Miraron pa min y riéronse.

Al día siguiente, en clas, entré y di los bonos díes. Respondiéronme. En clas taben dalgunos (y dalgunes) colos que me topare la tarde anterior.

«Home, menos mal… Creyí que me volviere invisible. Como ayeri nun me saludasteis…»

Punxeron cara de sospresa, y retrucaron.

«Home, profe…, ¿qué esperes? El saludu gánase»

Llevaba unes selmanes malpenes. Nun sabíen nada de min. ¿Y yo esperaba que me trataren con respetu, como a un igual?

Xingué’l costazu y tome nota. Pasaron los meses. Hubo coses bones y males, como en tou trabayu nel que se trata con xente; como en tou trabayu en que se ye nuevu, ún comete, dacuando, gambaes. Pero al final, reconocíemonos: ellos en min y yo nellos.

Pa cuando acababa’l cursu, hubimos quedar pela tarde a les evaluaciones. La cercanía del veranu ablandia los corazones del alumnáu y del profesoráu, y a la vuelta de comer, repitióse la escena. Pasaba un rebañáu d’ellos y, dende la otra cera, diben bullindiegos, al trope la cai, y saludáronme. Yo, dignu, como si nada. Gritaron, más alto… Sumáronse más y allegábame’l batavoléu de les quexes, «jo tía, el d’asturianu pasa de nosotros (güei diríen que los safé, o vaya safada…)»

Al día siguiente en clas taben esperándome sentaos (que ye gordo, y sabes que ye que pasa daqué):

-Á profe, ayeri vímoste y echémoste voz y nun nos saludasti…

 Punxi sorrisa de media boca, zorramplona.

-Ois, nin, ¿qué esperáis? Una xente mui sabio díxome allá una vezona que’l saludu ye dalgo que se gana…

Quedaron paraos. De poco, en viendo que -yos la devolviere, rieron y llueu hubo hasta un amagu d’aplausu amatagáu.

Aquella foi una llección que nun escaeceré na vida.

Nun se da de baldre lo que nos ye más querío: el respetu hacia nós y el respetu a los demás. El saludu gánase.