Al pie del pozu, un puticlú

Diba poco que sabíemos d’esi negociu. Nuna resquiebra del tunelín alcontremos revistes LIB, les del peruyu mordíu. Arremellemos los güeyos, encesos los papos por aquel mundu del que los mayores nos protexeren.

“Son putes”, espetó’l Turdu. Cagamentabáse y engarriábase por nada. En casa reñíase abondo y él taba resabiáu. Contestaba a les paisanes y facía-yos burlla. Sinvergüenza, dicíen-y. Nun-y daba más que fueren colo de chivase al pá. Esti yera viaxante y malpenes paraba per casa.

“Al pie de ca pozu, siempre hai un puticlú” dixo.

Un día les revistes desapaecieron. Daquién hubo celosu que les quixo pa sigo. Recreemos el so recuerdu en tardes infinites, hasta que daquién escurrió acercase al puticlú del pozu.

“Ye la casa que ta pintada de Rosa y trae Club Medianoche”. 

Petín prometió arramblar colos prismáticos que so pá traxere de Ceuta p’achisbar curioso. Dacuando díbemos en bici d’escursión hasta la escombrera.

Una vegada una de les muyeres acolumbrónos y cagóse na puta que vos parió, guajes del demoniu, o marcháis o llamo a los municipales… Salimos escentellaos. Sicasí, el Turdu paraba y chistaba “putina, putina”, como si fuere una pita.

D’entós echábemonos en suelu na escombrera. Nunca víemos nada. De tarde nun yera bon momentu pal negociu. Como muncho mirábemos la ropa tendío nun cable de poste a poste, por ver si gastaben como lo de la revista. El Turdu ríase. “A ver si van tar cagaes”. Fuimos entardando en volver a casa. Y un día, al escurecerín, vimos les lluces d’un coche. Petín miró y quedó blancu. Nun quixo dexanos los prismáticos. Pero el Tordu emburriólu, saltó per él y quitó-ylos de mala manera. Fuimos viéndolu esfondase. Reconocimos entós la furgoneta del pá baxo la lluz collorada del portal y vimos al paisanu posase y entrar, coles manes en bolsu. Al poco, una lluz na primer planta prendióse. Dos solombres xugaben un teatru sordu de caricies.

“Vamos”, dixo’l Tordu.

Aquel día deprendimos que’l mundu de los mayores podía resultar bien cuciu pa unos neños que volvíen a casa en bicicleta, ensin falar, sintiendo cómo l’últimu compañeru facía por afogar el lloru y surniaba.